قبل كل شي حبيت اقول وبفخر اني اعشق شي اسمه ام فمابالكم بأمي حبيبتي ,, تفننت في خدمتها وابتكرت كل مايفرحها ويرضيها خاصو انها تعاني الم العظام والركب والمفاصل والكليسترول والفراغ الدايم يعني جالسه لاشغله ولاشي لاني اخدمها بعيوني وكلنا كبار فالراحه زينه لها رغم انها تشتغل شوي بس غالبا فاضيه فكرت وفكرت وتفننت في اسعادها رغم ان امي الغاليه قاسيه بعض الاحيان لكن احبها ومازلت مقصره معها مهما اسوي الله لايحرمني ريحتها
بعض افكاري الي ادخلت السعاده على قلبها والبسمه على مبسمها بيوم من الايام كانت طفشانه مااااله واحسها مكتئبه من الملل قلتلها يمه وشفيك قالت الملل اعوذبالله منه وحزنت لحالها لانها مب مثلنا نت وتسالي وتلفاز وخلافه يعني جالسه طفشانه فديتها قمت سولفت عليها شوي حسيتها مالها نفس تسولف خخخخ تجاملني وسكت وفكرت وفكرت ونزلت الشارع جنب سورنا حنايه حقتنا نزلت قصيت منها بالمقص مجموعه وطلعت عند امي وفرشت سماط وقالت وش ذا يابنيتي قلتلها حنا ودي اتحنى واحنيك (علما اني ماابي اتحنى ولافيني حيل له) بس لعيونها بونسها وانا اعرف ان امي ماتنسى الملل والكأبه الا اذا اشتغلت شي بيدها وشي تحبه وحرصت يكون شي مايتعب قلت يمه ماشاءالله عليك تعرفين تقطفينه قالت ايه قومي خليه علي ودي اقطفه لحالي فديتها وجلست تقطف الورق من الاغصان يمكن نص ساعه حسيتها ارتااااااااااااحت لدرجة بعد ماخلصت قامت تسولف وتحكيلي حكايات قديمه ومتحمسه فديت قلبها وقتها حسيت انها ارتاااحت وراح الطفش منها وصرت اعرف مفتاح امي حبيبتي يعني اذا شفتها طفشانه او متنكده ادري ان ودها تشغل ايدها بشي تحبه وبنفس الوقت احسسها اني بحاجتها وابيها تسوي هالشي بيديها عشان تحس بقيمتها اكثر صرت كل فتره وفتره يعني من اسبوعين لاسبوعين مره ادخل عليها بعدس واطلب منها تنقيه لاني مااعرف زيها وتستانس لانها اشغلت ايدها واذا اشغلت ايدها امي ترتاح لان عقلها يرتاح وماتجلس تفكر فصرت احرص على شغل ايدها بشي تحبه وادري انها تستمع فيه يعني مارحت شغلتها بشي منيه والطريق لا
شغلتها بشي اعرف واعرف واعرف انها تحب تشتغله وتستانس عليه مثل تنقية الرز والا قطف اوراق والا تحني شعري
يووووووه تستانس حيل اذا طلبت منها تحني شعري والا تظفره فديتها الله لايحرمنا منها ويشفيها فخلاص صرت احرص كل الحرص اداريها وادور سعادتها لو بشي بسيط حتى القهوه كل يوم لازم اتقهوى معها واسولف وانا مافيني بس لعيونها كل شي يهوووون
في شي ثاني امي تحبه وصرت احرص عليه الا هو تلاوة القران احيانا اذا جات تقرا اجلس معاها لانها ماتعرف تنطق بعض الايات الصعبه فساعدها بدون قصد عشان تستمر والحين ماشاءالله عليها تقرا لحالها ماتحتاجني خلاص تعودت
المهم حياتي كلها اساسها ادور رضا امي وماخليت شي يرضيها الا وسويتها وامي تستاهل الله لايحرمنا منها
والله مايمديها تقول نفسي في .... الا اليوم الثاني اشريه واعطيها ياه وتتفاجأ تحس بقيمتها بشكل مو طبيعي
وحاليا من الشهر الي راح صرت اعطيها 200 شهريا رغم اني مااملك الا كم ميه مصروف بس اعطيها الربع واخذ الباقي واحلف عليها الين تاخذها تقول وش ابي فيها تدرون وش ارد عليها وتستانس حيل من هالرد
اقولها تصدقي منها اعتبريها مالك الخاص وتصدقي لنفسك ووالديك والله اشوف الفرحه بعيونها تسوى الدنيا ومافيها
حكيتلكم بعض مواقف البر بوالدتي مو عشان اي شي الله يشهد بس عشان انبهكم امك ثم امك ثم امك صحيح اني احيانا اعصب واحيان اطنقر واحيانا تسبني وتخاصمني بس مهما حصل انا بنتها وهي امي الغاليه وننسى بسرعه المهم ماينقطع بري فيها وانسى اي شي حصل امس واعوضها اليوم الثاني بدون ماتحس
يارائعة أنت
أي جمال شغلتِ به نفسك وفكرك
هنيئا لك بوالدتك وهنيئا لوالدتك بك
جميل سعيك لتعليمها تلاوة القرآن واقترح عليك أن تعينيها على الحفظ