لاقلت يمة حنان الاسم يكفيني
وشلون ضمة يدينك يابعد راسي
برجع الوقت وانسى اللي معنيني
يومي صغير وحنانك مالي الكاسي
السلام عليكم ورحمة الله وبركاته
امي امي امي ضاعت حروفي وضاعت كلماتي ولااعرف اعبر بس بكتب كل ماعلمتيني اياه
احلى شي واقوى شي تعلمته منها الصبر الصبر يالله ياامي كم عانيتي عشاننا
كم راجعتي مستشفيات كم تنومتي كم عانتي مع مرض اخوي سنين وهي تشيله وتلبسه ويارب لك الحمد الله عوضها خير صحيح اخوي ماتعافى من مرضه مية بالمية بس اللهم لك الحمد دامه صار يمشي ويفهم علينا شوي ويروح يقضيلنا اغراضنا من البقالة هالشي خفف عليها كثييير ومااخفيكم للحين تخاف عليه مع انه كبير الحين الله يلطف بحاله والله يشافيه ويعافيه
امي عانت معاي بولاداتي رافقت معاي بالمستشفى وياما راحت معاي مراجعاتي حتى وانا متزوجه خوفها علي لازال مستمر واهتمامها فبنتي من يوم جات تشيلها وتلبسها وترضعها ويوم رجعنا البيت فترة الاربعين تنومها عندها كله عشان ارتاح شوي لاني والده قيصري
وعلمتني كيف اروش بنتي وكيف اتعامل معاها وقت البرد وكيف تكون ملابسها
وكيف اعطيها علاجاتها وقت تتعب وكيف اتصرف وقت تسنينها
امي يابعد قلبي يوم ودهم اخواتي بطبخه مو دايما تطبخها امي ماترضى تسويها الا لما اكون عندهم تقولهم لا استنوا اختكم لما تجي ناكل كلنا سوا مع اني اقولهم لاتستنوني كلوا اختي تقولي والله لو نفحط ماتسوي الا لما تجين حتى لو مثلا بيطبخون اكلة انا احبها تقولهم خلوها لما تجي اختكم او ان طبخوا اول مااجي عندهم تخلي اختي تسوي نفس الطبخه ويوم يكون بعض اخواتي نايمات واحنا بنطبخ ماترضى نطبخ الا لما كل البيت يصحى وناكل سوا
ولو اجلس اكتب واكتب ماراح اوفيك ياامي
امي
الله يجعل لك من اسمك اكبر نصيب يارب
اللهم احفظها وعافها واجعلها سيدة من سيدات الجنة يارب
