ام زوجـــي وزعلها على فلوس بنتها

'اخت زوجي طلعت من النفاس واتصلت على زوجي وعزمتنا على مطعم بهالمناسبه اوكيه؟
انا طلبت من زوجي يعتذر عن الروحه لان قبل فتره نزلت موضوع اني رحت معهم مطعم وكانوا ابد مو اتيكيت فرضوا علي ناكل من صحون بعض وهذا مو عيب لكن العيب اسلوبهم في فرض الطريقه يعني لا استأذنوا ولاشي قالوها بأسلوب امــــــــــــر قالوا ترى الصحون مشتركه للجميع واسلوبهم كان سيئ وام زوجي كلما رفعت عيني من على صحني القاها تناظرني من بينهم ومحتده بالنظر لي ولااشتكيت لزوجي ولاابديت له زعل ولاحس اني تضايقت ابدا ولاقلتله طبعا لاحساسيه مني ولاشي انا عندي عيون وعندي احساس واشوف واحس المهم وهذا المره الثانيه اخت زوجي عزمتنا انا قلت اكفي الشر وقلت لزوجي اعتذر منهم قال ليش اعتذر هذه اختي عازمتنا بمناسبه وخلينا نروح قلتله فيني صداع قال خذي بنادول وجهزي نفسك بنروح

طبعا زوجي مااااااااايرضى على اهله كلمه بس عشان البعض يفهمن
ورحنا المطعم ومسكنا المنيو كلنا نختار وهم يختارون لحالهم وهكذا قال لي زوجي بنختار هذا وهذا وهذا قال هم لحالهم وحنا لحالنا كل واحد يطلب اللي نفسه فيه
جا الجرسون واخذ الطلبات وحنا ننتظر اخو زوجي قال بالفم المليان ترى كل الطلبات مشتركه بيننا بصيغة امر! قال حركات حقي وحقي هذه مو عندنا فاهمين ولا مو فاهمين؟ طبعا كلهم اخوان وخوات انا الغريبه بينهم فهمت ان الكلام موجه لي بس ماعرفت ارد
انا سكت وزوجي سكت وجا اول طبق طلبه زوجي قالت اخت زوجي خذوا راحتكم تقصدني انا وزوجي قامت ام زوجي عصصصبت قال لاااااااااا كلنا بناكل مع بعض ! ورفعت حاجبها كانت ام زوجي معصبه جدا عشان زعلانه ان بنتها بتدفع طيب هي اللي عزمتنا
ملاحظه تراهم من مرتادين المطاعم باستمرار يعني مافي مطعم مادخلوه ومستواهم المادي ممتاز بس زعلانين عشاني جيت معهم

و بس انحط طبق السلطه اللي طلبه زوجي كلهم حطوا يدهم بنفس اللحظه وبغمضة عين خلص الصحن لان خوات زوجي واخوانه كثار ويمونون على بعض بس انا غريبه بينهم
وشوي تجي الاطباق الرئيسيه كل واحد كان طالب طبق والجرسون حطها بالنص وبدينا ناكل وقلنا بسم الله راحوا اخوان زوجي وام زوجي بدأوا بالاصناف اللي انا وزوجي طلبناها وغرفوا منها وراحوا بعدها بسرعه على اطباقهم اللي هم طلبوها وبسرعة البرررررق غرفوها كلها ماخلوا لنا ولالقمه لانهم غرفوها بسرعه !! وانا ناظرتهم لقيتهم يبتسمون قام زوجي قالهم طيب انتوا شاركتونا وحنا ماناكل معكم؟ اخوه قاله خلص وانا اشوف نقاشهم لقيت ام زوجي معلقه عيونها علي شوي وبتكفخني
قعدت اكل بكل هدووء وفجاه كلمتني اخت زوجي بسالفه رفعت عيني لقيت ام زوجي تناظرني بحده وانا اكل (لانها جالسه قدامي مباشره)
وحنا بالبيت زوجي قالي ان امه زعلانه ماتبي اختى تضيع فلوسها بس اخته اصرررت تعزمنا
شوي وحنا لسه ناكل ام زوجي اخذت طبقي اللي انا طلبته وهو مليان على اساس اغرف منه بعد ما اخلص ام زوجي شالته وغرفته بالكامل في صحنها ورجعته للسفره فاضي! انا احترمت نفسي وقلت فلوس بنتها كيفها
ورجعنا البيت وعمري ما ذميت حمولتي عند زوجي ابدا متزوجه لي سنوات عمري ماذميتهم بس حسيت زوجي مقهور مره وحس ان امه واخوانه ماكانوا يبونا بس اخته اصرت وغصبتهم فكانوا زعلانين وانا سكت
بعدما كلينا ام زوجي واخته راحو الحمام وطولوا زوجي قالي قومي استعجليهم ورحت الحمام وعند الباب سمعت اخت زوجي تهاوش امها وهي صوتها من النوع القوي قالتلها حررررررام عليك وش خليتوا لفلان وزوجته يوم اكلتوا كل الاطباق حتى صحن الحرمه ماوفرتيه لها اخذتيه منها؟ امها قالتلها اوووووووووص ودخلت انا وسكتن
قبل ما انام تذكرت اهلي شلون يعاملوا زوجي عمرهم ماذبو عليه بالكلام ولا امي تعامله الا ولدها حتى هو يحب يزور اهلي كل اسبوع يركض لو امي نادتنا وتذكرت اني ببيت اهلي كنت معززه مكرمه وعمري محد ذلني على شي كبير عشان احد يذلني على لقمه, وزوجي نايم انا لوحدي بكييييييييييت بكاء لين قلبي انقططططع والله انا مو صياحه ولا بكايه بس نظرات ام زوجي لي بكتني كانت حاده مرره لان المره الاولى اللي عزمونا فيها سوت معي نفس هالحركه كنا نسولف انا واخوات زوجي شوي القى ام زوجي محتده بالنظر لي بقوووه تناظرني وهالمره الثانيه تكررت نفس النظره نظره كلها حقد وزعل وياكلون اطباقنا بدون استئذان وياكلون بسرعه ويمسحون الاطباق مايراعون اني مهما اكلت ما باخذ راحتي مثلهم
بكييييييييت قلت تذلني عشان لقمه؟

المشكله قلت لزوجي روح لحالك انا ما ابي اروح قال لاتفشليني مع اختي لكني حلفت بقلبي ان المره الجايه ما اروح لو وش ماصار اصلا صارت مرتين وان شاءالله ماتتكرر بس زوجي راح يسويلي هوووشه وبيسألني ليش
طبعا اللي حاقده على زوجة اخوها وترد على موضوعي على اساس اني زوجه اخوها وام زوجي امها هذه بطنشها ولا كأني شفت ردها عموما بس حبيت افضفض على اللي بقلبي