ام زوجي تكرهني مادري وش مسويه لها

السلام عليكم
حبيباتي بنات حواء حبيت اقولكم اني ولدت بالسلامه وجبت بتوأم بنات وسميتهم ريماس و ميرال
ولاتسالوني عن الولاده لانـي من جد تعببببببببببببت من العمليه وتنفخت صرت وحده ثانيه
المهم مشكلتي مشكله بسييييييطه مره وانتو احكمو عاد
اول شي بقولكم عن حالي انا كنت متزوجه من واحد يحبني حب موصاحي وطيب القلب وجبت منه عيال وتوفى الله يرحمه:44:
وربيت عيالي قعدت 6 سنوات وانا اربيهم لحالي
وتقدم لي واحد من جماعتنا بس من بعيييييييييد وسبحان الله كان متقدم لي من اول وكنت بقبل الزواج منه بس في ناس فرقو بينا
المهم تقدم لي وهو عازب مو متزوج وقلت لعيالي انا ابي اتزوج اذا توافقون بوافق واذا رفضتو برفض وفكرو بالسالفه وقالو يماما على راحتك وانا كنت رافضه الزواج بس امي واخواني اقنعوني وقلت لازم اشوف حالي وبعدها تزوجته وحملت وجبت هالبنوتات وسميناهم ..ام زوجي ماتحبني دايم تسوي حركات تنغزني فيها تقول لولدها قدامي ليه تتزوج وحده عندها عيال وش قاصرك وانا اسكت والله مارد عشان بس زوجي المهم تعبت منها وقلت لزوجي مابي اروح ماتحمل اهانات قال لي على راحتك وصار لي اكثر من 4 شهور ماروح لها لان مو بس تجرحني سوت لي اشياء مايعلمها الا ربي
ام زوجي قالت لزوجي زوجتك فيها ولد والا بنت قال لها مدري لين الحين انا وياه متفقين مانعلم احد يعني تكون مفاجاه لان اذا قلنا توام والله بيعطوني عييييين وبتعب
المهم ام زوجي سالت زوجي كم مره وقالت له ليه ماتبي تعلمني وانا امك مو غريبه الحين الشهر الساابع وش دعوه مابين جنسه
قالها بصراحه نخليها مفاجاه
زعلللللللللت وقالت مو ولدي اللي اعرفه انت تغيرت وعطته تهزييييييييييئه :44:
قالت له وش تسمون المولود اذا ولد واذا بنت
قال لها الين الحين ماقررنا هي فبالها اسم بس ماقدر اقوله احترم رايها
هي عاااد هالوقت انقهرت وقالت له يعني مو مسمي على امك
بصراحه ماعندي مشكله اسمي عليها بس يابنات اسمها طفله ومره قديم وخاطري باسامي جديده والله مالها حق تزعل
هذا بدل ماتفرح ..اخوانه الثنين سمو عليها كفو ووفو واحنا محترمين قرار بعض ليه تسويها سالفه والله مالها حق
وزوجي الحمدلله يفهمني هذا اللي عجبني فيه التفاهم
ووقت نفاسي ولاجتني ولاشي ولاكلمتني وقاطعت زوجي وقالت له ماني راضيه عليك الا لمن تسمي علي والا ترا غضبانه عليك الين يوم الدين


هي مقهوره انه جابلي خدامه من شهري الثالث واني سميت احلى الاسامي وانا زوجي بكل شي معاي
بس هو ماشي معاي بالصح مو بالغلط والله يابنات ماودي علاقتي معها توصل لهالطريق بس هي مره غيوره وماتحبني مرت الايام وصار زواج اختي الصغيره وعزمت اهله وكلمت امه وعزمتها المهم جو الزواج الا ام زوجي كذبت على زوجي وتبكي قالت له زوجتك ماعزمتني ولادقت علي:44: لييييييييييييييييييييييه تكذب والله فوقها حررررررررام عليها
زوجي هالمره صدقها وزعلت علييييه والحين انا وياه متزاعلين بسبة امه والحين هي اكيد طاقة اصبع بس خوانه وخواته عارفين امهم تكذب ومصدقيني والحمدلله الكل يحبني بس امه تكرهني والحين مايكلمني
وش اسوي تعبت مع هالام الزوج والله وشلون ارضيها اصلا مازعلتها بشي عشان ارضيها
انتظر منكم حل