ام زوجي وبنتــــــــــــــي والحل؟

بدون مقدمات ام زوجي عندها 5عيال كلهم كبار تموت فيهم زياده عن اللزوم تموت بالارض اللي يمشون عليها ابو زوجي توفى بدري قامت وقفت بوجه اخوان واخوات زوجها عشان مايتدخلون بتربية عيالها ولما رفضو قاطعتهم تخيلو زوجي واخواته واخوانه كبار ولايعرفون عماتهم واعمامهم المهم حبيت افهمهم نبذه عن شخصيتها
انا حملت وقالولي ببطنك بنت ومن يومها صارت ترمي علي كلام ان اللي ببطنك لي وانا اللي بربيها وانها بنتي وحقي انا بالبدايه قلت تمزح بس لاحظتها استمرت طول فتره حملي تعيد نفس الكلام مالكم بالطويله ولدت وصارت ماتناديها الا بنتي و بنتي ماتناديها باسمها ابدا
ودايم تقول لبناتها امسكوها عودوها على ريحتكم وحصلت مواقف كثير اذكر منها اني راجعت مستشفى وتركت بنتي عند ام زوجي لانها ساكنه فوق و امي بمدينه ثانيه جيت من المستشفى وجلست جمب بنتي وفجأه بدون سبب قالتلي قوووومي خلاص من عندها (تقصد بنتي) وقالت لاخت زوجي يلا تعااااالي اجلسي مكانها اقسم بالله اني انصدمت صدمه انحفرت بقلبي ليه تطردني من عند بنتي؟
ومره جات زارتني وبنص الجلسه انا حضنت بنتي قالت هاتيها حقي انا احسبها تمزح لقيتها ماده يدينها وانا عطيتها البنت ومستغربه منها
ومره زرناها انا وزوجي قامت قالت وجيهكم مرهقه قالها زوجي البنت مانومتنا طول الليل تصيح قالت احسن سهريهم وطلعي عينهم والعني خيرهم .
ومره ام زوجي زارتني وكان عمر بنتي شهرين قامت بنتي تناظر ناحيتي قامت ام زوجي انتبهت وقالت لبنتي ياوسخه انا امسكك وادلعك وانتي عينك على امك؟ قامت قالتلي والله البزران ذول امرهم عجيب يموتون على امهم حتى لو كانت خر.... !! انا ادلعك واخرتها تناظري امك؟ انا سكت تماما مع اني اقسم بالله قادره ارد عليها واقولها صح كلامك ياعمه والدليل شوفي عيالك يحبونك , بس احترما لكبر سنها احتسبتها عند ربي مع انها مااحترمت نفسها وسنها وكلمتها مره قويه ولاشافت مني الا كل خير عشان تقول هالكلمه لكن غيره وحب تملك تملكت عيالها والحين تبي تتملك احفادها وانا الحاجز بالنسبه لها
وتكرر معي هالموقف للمره الثانيه كنا جالسين كلنا قامو خوات زوجي قالو يوووه يافلانه بنتك تناظرك قامت ام زوجي قالت لبنتي والله انك حيوانه ووسخه انا ادلعك ولايثمرررر فيك قاعده تدورين على امك يالوسخه؟والله كرهتك ! يعني مدري وش تخطط تبي بنتي تحبها اكثر مني؟
ومره كان فصل الصيف وكان عز الظهر درجه الحراره 48 روشت بنتي ونومتها اتصلت علي قالت طلعيلي البنت قلتلها نايمه قالت حتى لو نايمه طلعيها ابيها , عمرها شهرين ياناس تتهجول من الدور الارضي للدور اللي فوق ولازم تمر من الشمس وصحيت من نومها تبكي حسبي الله ونعم الوكيل
الحين ابي اشطح شوي ام زوجي رضعت عيالها كلهم وتفتخر انها رضعتهم وقبل ما احمل بنتي كانت تقولي احلى شعور لما الام ترضع عيالها المهم وحده بس من خوات زوجي اللي ام زوجي مارضعتها لانها كانت مريضه مررررررره ولاقدرت ترضعها وعمر اخت زوجي ذي 36 سنه ,تخيلو من تزوجت زوجي وامه ماعلى لسانها الا طاري القهر انها مارضعت بنتها فلانه كل كلامها انا مارضعت فلانه كنت مريضه انا مقهوره ماقدرت ارضع فلانه انا قلبي محروق لاني مارضعت فلانه
هالشطحه عشان تفهمون عقل ام زوجي لانها تطور موضوع الغيره عندها وصارت عالطالعه والنازله تقولي لاترضعين بنتك كثير تخيلو؟! بدون سبب فجاه كذا
ومره قالتلي اذا بنتك ماتحب حليبك لاترضعيها وتجبريها قلت لها من يقول؟ قالت فرضا يعني!
ولو بنتي زكمت او سخنت او جاها مغص اول كلمه وقفي الرضاعه مع ان الدكاتره يقولون الا الرضاعه لاتوقفيها
ويوم تجي عندي او ازورها انواع المضايقات لو رضعت بنتي بتقولون اجليها لين ترجعي بيتك صح؟ اقولكم لو بنتي راحت عندها تقعدها ساعات طويله ماتعطيني اياها بسرعه وزوجي يساعدها يقول خليها تتعود على جدتها وتجيني البنت اخر الليل نايمه ومشبعتها حليب صناعي ! فاظطر اطلع لام زوجي ارضع بننتي شوي وماتخليني بعد تضايقني بعيونها يا بنات تخزني بزعل وتحط عينها بعيني وتطير عينها علي!
ومره من المرات زوجي استاذنها قالها فضي لها غرفه عشان ترضع قالت بزعل لااا تروح بيتها ترضع بكيفها طيب بنتي عندك اغلب الوقت ذبحتيني قاطه معي فيها وحتى الرضاعه حرمتيها منها وعمرها شهرين وين تروحين من ربي؟
ومره زارتني قلتلها استاذنك ربع ساعه بس ارضعها قالت لما اروح سوي اللي تبينه الحين عطيها صناعي
و قبل فتره كان عمر بنتي شهر ونص صارلي ظرف قوي ودخلت باكتئاب شديد وثلاث ايام مارضعت بنتي قمت لاشعوريا فضفضت لام زوجي قلتلها من قو الاكتئاب لي ثلاث ايام مارضعت بنتي والله انها قالت بالحرف احسسسن لاترضعيها ولو تفطميها احسن تخيلو ذاك الوقت كانت تبيني افطمها و عمرها شهر ونص؟ وعيالها رضعتهم سنتين كامله كلهم !!!
وكل يوم يابنات تتصل علي وتتطلب مني اطلعها البنت وتجلس عندها بالساعات الحين عمر بنتي شهرين و10 ايام اغلب اليوم عند ام زوجي تشوفها وتجلس معها اكثر مني انا امها ! والله تعبت احيان فجاه اشتاق لها اتذكر انها فوق عند ام زوجي احيان اسمع صوتها تبكي قلبي يتقطع ودي يومين ورى بعض تكون معي واحس ان لي بنت وان بنتي لها بيت ماغير كل يوم تدق هاتوها هاتوها غير انها صغيره على هالتعب كل يوم مشيوله من يد ليد مره اخت زوجي تجي تطلعها ومره اخو زوجي يجي ياخذها ومره انا هذا غير اني ما احس اني مخلفه كل يوم بنتي مو معي
مدري انا ابالغ ولا وضعي غلط؟