ام زوجي وعلاقتي معها

ياصباح الخير والنور عليكم جميعاً
ودي استشيركم هل تصرفي صحيح او لا
انا عشت مع ام زوجي خمس سنين وماصارت بيننا ولا مشكله في هالخمس سنين وماعمري زعلتها ابدا واساسا ماكنت احتك فيهم بالبيت كثير, اغلب وقتي بالدوام او بغرفتي ,, انا شخصيه هادئه جدا ومسالمه يعني طول هالسنين الي كنت فيها عندهم ماكنت اتدخل في شي ابدا حتى لو تصير عندهم مشكله عائليه ما اقولها لاحد برى بيتهم ولا اتدخل فيها اساسا
بعد هالخمس سنين طلعت شقه لان الغرفه ماعادت تكفينا وصارت احتياجاتنا اكثر وانتو عارفين هالكلام كله
المهم بعدها بشهرين زرتهم برمضان الي فات وكان عادي, وزرتهم بالعيد وعادي لكن اذكر يوم العيد يوم زرت ام زوجي وخالاته كانت نظراتهم غريبه لي كنت حاسه انهم مستثقليني او ماعرف بس قلت يمكن يتهيأ لي
بعدها بفتره ام زوجي كانت بالمستشفى مسويه عمليه ورحت زرتها مع زوجي وحسيتها انصدمت يوم انا دخلت بس قلت يتهيأ لي .. وطول الوقت كانت تتفادى تناظرني حتى اذا اسولف لها ماتحط عينها بعيني كانت غريبه ... بس بعد قلت يمكن انا اتوهم
بعدها بكم يوم عرفت ان للاسف ام زوجي بعد ما انا طلعت من غرفتي ورحت الشقه الجديده كانت تروح فوق وتدخل الغرفه وتفتش وتحوس فيها
انا يوم طلعت ماشلنا اغراضنا كلها ولا شلنا الاثاث كله .. يادوب كم لبسه لي ولبنتي والاشياء المهمه فقط وطلعت لاني كنت مابين الدوام ودراسة بنتي ماعندي وقت افضي الغرفه اللهم نظفتها وخليت اكياس القمامه وانتو بكرامه عشان زوجي يشيلها .. المهم بعدين عرفت ان الاكياس ظلو فتره وصار في حشرات لان كان زوجي كل يوم يروح لكن مايصعد فوق فينسى الاكياس
وامه صارت تتصل على خواتها وكل احد تعرفه تتكلم عني واني وصخه واني قذره واني موصخه بيتها وكلام كثير عني جرحني ... هنا تذكرت يوم العيد نظراتهم لي حتى ماكنت مرتاحه ومشيت ماطولت
انا يابنات ام زوجي عمري مازعلتها بكلمه حتى اذا زوجي زعلها او رفع صوته عليها ازعل منه واقوله هذي امك شلون تكلمها بهالطريقه او شلون تسوي معاها كذا وكذا واخليه يروح يعتذر منها بدون ماتدري اني مكلمته حتى
ام زوجي اول ماعرفت اني حامل ببنت قلت باسميها عليها لان عندها اكثر من اربع حفيدات ومحد سمى عليها فقلت ابي افرحها حتى ولدها الي هو زوجي مافكر يسمي عليها :) كل ما ادخل او اطلع كنت احب راسها وامشي من كثر ما كنت احترمها وبالنهايه طلعت تتكلم فيني وطلعت لما ادخل اسلم عليها تبتسم لي وترحب وبس امشي تتكلم عني واشياء كثيره ماعرفت عنها الا الحين
اول ماعرفت بهالكلام كله انجرحت وظليت افكر افكررر انا غلطت عليها؟ انا زعلتها بشي؟ بس ابد مافي اي شي .. وجلست مع زوجي وكلمته وقلتله الموضوع كله وقلتله مابيك تقول لها شي لكن انا بيتكم ماراح ادخله مره ثانيه وهاذي بنتك متى مابغيت توديها عند جدتها عادي انا مابقول شي بالعكس هي جدتها بالنهايه يعني لكن انا ماراح اروح ابدا وقالي من حقك لان الي صار مو بسيط وانا مو مستغرب لاني اعرف ان امي تتكلم حتى عني وعن اخواني مع ان احنا عيالها وادري انها تتكلم عنك بس شفت علاقتك طيبه فيها فماحبيت اخليك تكرهينها
بنات انا كنت احبها واعتبرها امي واحترمها كثييير كنت اشوفها طيبة جنه وانصدمت حيل بعد ماعرفت شخصيتها الحقيقيه وظليت اسبوع كل ما اتذكر الموضوع ابكي وكل ما انام احلم فيها
المهم مر على الموضوع اكثر من ست شهور ومازرتها ابدا ولا حتى كلمتها باتصال .. قبل فتره بسيطه صار معاها نزيف واكتشفو ان عندها سرطان بالرحم عسى الله يشفيها يارب ويشفي جميع المرضى ... المهم ماخبروها عيالها بالمرض قالولها تكيسات بسيطه وبتسوي عمليه بعد العيد


انا الحين في حيره .... هل انا تصرفي صح او غلط؟ اظل مبتعده كذا عادي ولا غلط او علي ذنب؟
زوجي يقول الله سبحانه اوصى بصلة الرحم واهلي مايعتبرون ارحامك فعادي سوي الي تشوفينه يريحك
بس ياربي مجروحه حيل منها وبنفس الوقت مابي اعاتبها لانها مريضه وبنفس الوقت احس بالذنب
ريحوني الله يريحكم دنيا واخره طمنو قلبي