ام زوجي وعيالها بهذلوني

( ما احلل ولا ابيح اللي تنقل موضوعي لاي مكان ثاني ) في موضوع مضايقني وحابه افضفض لكم انا ربي رزقني توأم ولد وبنت ماشاءالله عمرهم سنه واربع شهور من وهم ببطني وام زوجي حاطه عينها عليهم كانت طول الوقت تقولي هذولي عيالنا هذولي عيالنا هالكلمه ماتفارق لسانها كانت تعد الأيام لين اولد وبس ولدت بدأت معاناتي
من انولدوا وهي متعلقه فيهم لدرجه مرضيه اقرب للتملك من انه حب
لاحظتها حريصه تحببهم فيها وتعودهم عليها ولاحظتها خايفه لايتعلقون فيني وتسوي أي شي عشان لايتعلقون فيني
بداية مشكلتي هي وزوجي اتفقوا ماتجيني شغاله لان وانا حامل طلبت زوجي قال انسي مافي شغاله باين انه راح كلم امه على طلبي لان بعد ماولدت دقتني مره بالكلام قالت اذا ماتقدرين تربيهم الا بشغاله انا باخذهم منك واربيهم! منعت عني الشغاله عشان لما اتعب اضطر اخلي عيالي عندها لان امي وخواتي ساكنين بعيد عني مره ولايقدر يجوني الا بالشهر مره
انا عرفت اللي ببالها فقررت اتحمل صعوبة اني اربيهم لوحدي ماعدا أيام معينه لما امرض او ينهد حيلي من التعب انزلهم لها لانها ساكنه تحتي او زوجي اللي يطلب مني ينزلون عشان امه تشوفهم غير كذا اخليهم عندي حتى لو دايخه او ميته تعب ولا اني انزلهم لها
طبعا قرار اني اتحملهم لوحدي هالقرار دفعت ثمنه من صحتي ونفسيتي كثير ذقت من التعب اشكال والوان والامهات راح يفهمون قصدي طفل واحد يهلك فما بالكم طفلين وادري الجاي اصعب
اذكر مره قالتلي مرد العيال يحبون امهم حتى لو كانت كلبه ! ماسويت لها شي ولا اذيتها بس مجرد انقهرت مني لما شافتني مارميت عيالي لها كرهتني هي كانت تبيني يوميا انزل لها العيال وهم توهم باللفه !واهم شي عندها اني بعد ما احطهم انقلع بيتي ! أي نعم مطلوب مني ارمي عيالي عندها وهم توهم طالعين من الأربعين لانها على قولتها تقوم بالواجب هي وبناتها !!!
هي توقعت ان لما تمنع زوجي يجيب لي شغاله وانهم طفلين وامي ماتقدر تجيني بكذا ماراح يكون عندي اختيار الا اني اعطيها عيالي
بالبدايه لاحظت انها كانت تبي زوجي ينزلهم يوميا وانا لما ابي أكون معهم تتضايق مني مره وانا صعب اتركهم توهم صغار
بكل مره اروح معهم تتضايق مني هي وبناتها وأولادها ويبدأون يضايقوني عشان اكره الروحه لهم
انا اعرف الجدات يدلعون احفادهم يبوسونهم يشترون لهم حلويات لكن ام زوجي غير تبي تقوم هي وبناتها بكل شي يخص عيالي من اساسيات زي اكل وشرب ولبس ونوم وتغيير حفاظ وكل ماراحوا لهم تعلمهم طبع جديد هي تحبه يعني باختصار الحرمه تبي تربي من جديد
ولاحظت انهاتبيني بوجودها هي وخوات زوجي ينتهي دوري كأم وهم يصيرون الأمهات تنقهر لاشربتهم حليب او غيرت حفايظهم ولما امسكهم تنادي بناتها تعالوا شيلوهم منها تقصدني! وانا اجلس مصدومه
كلما رحت عندها مع عيالي تقعد ترمي علي كلام زي السم بهذلتني بلسانها السليط وكل ذا عشان ابي أكون مع عيالي
تعطيك كلمه بقمة البروود وبأسلوب يغبن تخليك أسبوع ماتنامين من القهر
لما اروح لهم ساعه او ساعتين وحتى عبايتي ما افصخها يبهذلوني بحركات اهانه بمعني الكلمه انا عارفه انها مجرد تطفيش عشان اروح بيتي واترك لهم أطفال بهالعمر تبي الكل مع بعض وانا أكون ببيتي
ومع ذلك ينزلون عندها كثير لحالهم عشان زوجي يبي يرضيها لكن يوم اللي اجي تضايقني بالكلام السم وتحقد علي مره طيب ماتبيني اتركي عيالي اما تتشرط تبينهم وتطردين امهم؟
ولو دخلت بيتها ترمي علي كلام يغبن اعطيكم امثله انا ولدي متعلق بابوه مره وبنتي متعلقه فيني كل عماتي وخالاتي شافوها قالوا ماشاءالله متعلقه فيكي كل اللي يشوفها يقول نفس الكلام
لما نروح بيتها لازم تقول لزوجي ولدك متعلق فيك ويحبك تعيد وتزيد بهالكلام ولما تجي لبنتي تسكت ماتعلق مع انها شايفه بنتي كيف تقرب مني وتلعب معي وقريبه مني بس يجيها خرس سبحان الله
وبيوم من الأيام كنا انا وزوجي نسولف قال لبنتي تعالي طنشته وجات عندي قمت قلتله ولدك متعلق فيك وبنتي متعلقه فيني تدخلت بالكلام بأسلوب يقهر وقالت لاااااا يتهيألك محد من عيالك متعلق فيكي عادي
وايام ثانيه تقعد تستفزني تقولي بنتك تحب اعمامها وتبكي لاغابوا عنها والولد يموت بأبوه وتجي عندي انا وتسكت .انا ادري ماقالتها الا من القهر اللي فيها تقول كذا عشان تتجاهل الحقيقه وماتبي تقول ان بنتي تحبني غيرانه على بنتي مني ! بس بداخلي انقهر من الأسلوب يعني تحارشني على محبة عيالي
مدري وليش يخفون حقيقة تعبهم مع عيالي او يسوون انفسهم مو ملاحظين محبة عيالي لي ؟ لكن يوم يكون الموضوع عم انفسهم يطلع اللسان والمدح يمدحون انفسهم يحبونا ومتعلقين فينا الخ
يمكن تسألوني ليه تدخلين بيتها طالما ماتبيك انا بكل مره اغصب نفسي اروح عشان لاتتعود انها تبعدني طالما انها تبي عيالي اجل تصبر على وجودي
هي لو تكتم غيرتها كان ماهمني لكن اللي تبي تقولي تطقه بوجهي بكل جراه وياليت لها حق بهالغيره لاهي امهم ولا شالتهم ببطنها على ايش كل هالتملك والغيره؟ يمكن تشوفونه سخيف لكن بالنسبه لي جدا مستفز انقهر لما اعمام عيالي وعماتهم كل واحد يسمعني والله فلان متعلق فيني والله فلانه تموت فيني وانا الام يدقوني بالكلام ان في عيال امهاتهم راحت او جات مافرقت عند عيالها .. دايما يحاولون يفقدوني ثقتي بنفسي كأم
طبعا من ضمن مشاكلي بالفتره الاخيره ان كل ما انزل عندهم صاروا يتفننون هي وعيالها بأنواع المضايقات اللي توصل أحيانا للاهانه سواء منها او من أولادها وبناتها لازم اطلع من عندهم وانا مقهوره على نفسي
أنواع الاستقصاد والاهانات والتجاهل غير رمي الكلام متفقين انهم يكرهوني الدخول عندهم يبوني انزل العيال وافارق
انا مستعده طول العمر ما اعتب بيتهم بس مشكله والله ام زوجي نظام هاتي بناتك وفارقي كيف يعني ؟ وبهالعمر الصغير تبيني اتركهم أحيانا يوم كامل
بس تصرفاتهم زادت عن حدها الفتره الاخيره
من ضمن تصرفاتهماني بكل مره ادخل على ام زوجي تتعمد تتجاهلني لحظة السلام ولا كأن احد دخل بيتها انا أحيان اسلم واحيان ادخل ورى زوجي واسكت لان تتجاهلني بشكل مهين وانا عارفه انه من القهر تتجاهلني ولما اسلم عليها يادوب ترد السلام وعلى طول تكلم عيالي شلونكم شخباركم وتطنشني يعنني مو شايفتك بكل مره نفس الحركه
ومثلا أكون انا وزوجي بمجلسهم يدخل واحد من اعمام عيالي المجلس وبكل حقاره يكلم امه وخواته وزوجي وانا حتى السلام عليكم ولا هلا يا ام فلان مايقول ولا كأن في انسان موجود أصلا حتى مايناظر ناحيتي متضامن مع امه وخواته هالحرمه استغفرالله
ومره ثانيه دخل واحد من اعمام عيالي وانا وزوجي قاعدين نفس الشي ماسلم وقاعد يسولف مع اهله كأني نكره وكان ولدي في يدي قام ناحيتي ومد يدينه وقال هاتيه بأمر اقسم بالله هالموقف محفور بقلبي ليومكم هذا وصرت ادخل بيتهم اكثر من قبل عشان اقهرهم بوجودي لان حركاتهم تدل على قهرهم من وجودي وانا بسوي الشي اللي يقهرهم لكن لان كلهم يد وحده ومتفقين نفس التصرفات كل واحد يهيني بالدور خلاص يتعب قلبي وانهد أحيانا
واذكر موقف من المواقف القاسيه اني قمت الفجر والقى عيالي ارتفعت حرارتهم وصلت 40 كانوا دايخين وانا كالعاده لوحدي كان موقف صعب ما انساه لبستهم بسرعه وجهزتها وركضنا انا وزوجي عالطوارئ لانهم صغار مايتحملون هالحراره وطولنا بالمستشفى خافض حراره بالوريد وعشان يدخلون الابره بايدهم صياح ومناحه وانا اتنقل من سرير ولدي لسرير بنتي وتبهذلنا وامه كل شوي تدق المهم وحنا راجعين البيت وتعبانين زوجي طلبني ان ندخل عند اهله قبل لانطلع بيتنا عشان امه تبي تتطمن عليهم وبس دخلت عليهم اقسم بالله لو اني كلب الله يعزكم بيعاملوني افضل كانوا كلهم موجودين خواته واخوانه وامه قعدوا يكلمون زوجي طمنا كيفهم وش صار بالمستشفى واشوف زوجي منحرج مرره قام زوجي قالهم اسألوا فلانه هي اللي قعدت معهم يقومون يغيرون السالفه ويكلمون عيالي سلامتكم ماتشوفون شر الله يشفيكم ماكلفوا نفسهم يقولولي اصغر كلمه سلامات !ولا فكروا بتعبي بالمستشفى وهم ياخذون المغذي انا قاعده فوق السرير وصرت انام وهم بيدي لا اكلت ولاشربت ودخل علينا الظهر هذا غير الدرج ارقي بهم وانزل بهم وانا شايلتهم على ظهري وهم اهم شي يعاقبوني لاني مضايقتهم وجالسه وسطهم خربت عليهم جمعتهم يبون يستفردون بعيالي حتى وهم مرضى وبعدين بفتره بعد ما خلوني اشوف التجاهل على اصوله قامت ام زوجي ابتسمت بطريقه تغبن قالت يوم تصدقين نسيناك يافلانه شلونك؟
كل هالحركات متعمدينها يبوني اتعقد وماعاد اجي لان كلهم نفس الأسلوب
ومره ولدي سوى عمليه يوم جو زياره كنت انا جمب ولدي عالسرير يجون يبوسونه من جمبي ويتعدوني ولايكلموني حرق دم حتى بالمواقف الصعبه وكله من الغيره عى هالعيال من امهم اللي شالتهم ببطنها وقعدوا يسألون زوجي عن مستجدات ولدي وبعد ما قعدوا يسولفوا قالوا يووه نسيناك يافلانه شلونك ؟ موقف لايمكن انساه لهم كانت نفسيتي دمار بسبب مرض ولدي وخباثتهم
واذكر مره ان بنتي مرضت وكان زوجي بالدوام فطلبت منهم يودوني الطوارئ وراحت ام زوجي معي المستشفى والله ياناس البنت مريضه كانت تبكي وطبيعي انها ماتسكت من المرض قامت ام زوجي تقولي هاتيها يعني اني معرف اسكتها قلت لها لا خليها بحضني وقعدت تناشبني وخذتها وطلبتها منها وللمره الثانيه بكت على طول تمد يدينها هاتيها يعني انك ماتعرفي تسكتيها وانا ارفض وشوي بكت بنتي بكاء حار للمره الثالثه وانا بسبب ام زوجي وترتني هاتيها هاتيها هاتيها صرت مو قادره اسكت البنت من مناشبتها فالبنت ماسكتت قامت ام زوجي نزعتها من حضني نززززع وراحت بعيد والله اني انغبنت غبنه ليومكم ذا والله حاقده عليها
انا امهم تحملت بتربيتهم الكثير من صحتي وعافيتي ووحدتي امي بعيده وعدم وجود شغاله لما اروح مول او مستشفى القى حريم معها طفل واحد ومعها شغاله وربي ادعيلها بالبركه لا احسد ولا شي بس اقارن وضعي غير ان زوجي مجنون نظافه ويقارني بحريم زملائه بدون لايراعي ان البيت فيه طفلين والله ثم والله اني ارتب البيت ورى عيالي ولاعشر مرات باليوم والامهات بيفهموني وهو يجيب اكل من بره
غير طبع زوجي انه يحب ينام بهدووء تام بس يدخل ينام اصير بوضعية طوارئ أخاف لايطلعون صوت انقلهم من غرفه لغرفه وقبل لايصرخ الطفل أكون موفره له اللي يبي
وبعد كل هالتعب تجي ام زوجي وتستكثر قداامي محبة عيالي لي وبكل مره اقابلهم يعلموني كيف اهتم بعيالي وهذا اكثر شي يضحكني انا اعطي دروس في الاهتمام بالأطفال وجايين هم يعلموني كيف اهتم
امه كلما شافتني تتأمر علي لاتقصي شعر البنت سوي للولد كذا لاتقولي للبنت كذا علمي الولد كذا لاتعلميه كذا وهي ترى تدري انها قاعده تستفزني لان زوجي يشرحلها كيف اتعب معهم واحيان كثيره لما ينزلون عندها عيالي تقول لزوجي انهم تعبوا مره هذا وهم عدد كبير وتعبوا وتطلب منه مايعلمني ولما تشوفني تضغط علي بالاوامر بالرغم من معرفتها اني شايله حمل يهد جبال لكن الله مايضيع حق احد عندها بنات وكلن بيذوق من الكاس اللي شربه غيره
انا ابي منكم نصايحكم بشكل عام وابي تقولون لي كيف ارد على استفزازها لما تقرر اذا عيالي يحبوني او لا لان حتى زوجي يقولي عيالك متعلقين فيك وهي عيني عينك تكذب الكذبه وتصدقها على راسي
واسفه عالاطاله