ومير عقب ماقريت لي كم موضوع عن الرومانسيه قلت خل اجرب هالطريقه
واقوم وازبرق بيت اهلي حطيت لمبات تلااامع وزكرشات مابقى قماشن ماعلقته حتى شلحت الشغاله علقتها مع القش
ولا نسيت البيت من براء زبرقته وسيارت ابيي مليتها دناديش
بيتنا صار كنه مرقص كلشن يتلامع وكلشن معلق
واشتري من هالطرطات اللي يحبها قليبتس وحطيت صورته على هالطرطات
وسويت له دروعن وشهادتن من كثرها ماقريت وشو اللي مكتوبن فيها
واسرق لي لبس من اخيتي مشغلعن وبوه دناديش وقروش وكل ابو شي حتى اني لقيت عالق بوه بطاقه شحن
ومير اقوم ازهم على ابو سعيدان يجي
وجاء
ومير تطير بوهته ويدق من عند الباب
قال عندكم عرس؟ ترا ثوبي معفط
قلت ادخل بس ادخل وتجيك العلوم
ويدخل واشغل الاستريو واقوم ارقص لين وصلت باب الشارع وانا اللي اعطيه ورده واسحبه بيده وادخله المجلس وابداء اررردح له
وهو ابد وجه مثل ذا >>
وادخل اهلي نفر نفر يباركون له وهو يقول وشو عليه قلت عشانك زوج مثالي دوك هالدروع والشهادات وانا اعطيه صندوقن مليان
والرجال مبلم مابعد استوعب ومير اصرف اهلي واجيب له هالعصيرات والطرطات واقول سم اطفح ياجعله بالعافيه يابعدي
قال بسالتس سؤال
ومير تعالي شوفيني تشققت قلت بدا المفعوول
قلت اقول اطفح
واحط في ثمه قطعتن وش كبرها قلت كوده يغص وافتك
ومير نخلص من البلع
قال يالله مشينا للبيت
قلت يالله
قال وين العيال
قلت خلهم عند اهلي نبي ناخذ راحتنا الليله
قال يالله توكلنا على الله
ومير البس عباتي بسرعه متحمستن باشوف وش يبي يصير عقب هالعرس اللي سويته له
ولاي اشوفه راكب وكرتون الشهادات ماتحرك من مكانه
قلت اكيد مع الوناسه نساه
وادق عليه قلت تعال شل هالكرتون
قال ماعلينا قاصر اوراق امشي اركبي بس ورانا نوم