صباح/ مساءَ القوة والاعتزاز بالنفس
انا آكل على الارض مااحتآج مائدة طعآم (١)
جُملة تحكي عن تَصريح مُهم لابد الكل يتبعه، مااقدر افرض القاعده الي بتكلم عليها على الكُل .. لكن اتمنى تكون اطباع وشخصيات الناس هي حَقيقتهم ، مو طبع سخيف او غير مُريح يكون مُكتسب من غيرهم ..!
دائماً نحاول نَتخلص من حقيقتنا الي ماتتماشى مع المُجتمع او افراد المجتمع او ( مزاجيات افراد المُجتمع بما يخص المظاهر)
مُتعب ومُحزن ومُضحك وامر يدعو الى الشَفقة لما القى وحده تحاول تعيش حياه مو لها ، لما تهلك نَفسها وتصرف فلوسها على شَنطه او شُوز حتى تلفت نظر الناس لها( مرات الوحده توصل فيها تلبس او تشتري شي مو عاجبها لكن عَشان الناس !)
(تتزوج شَخص مو عَاجبها او مو مُقتنعه فيه لكن خايفه من نظرة النَاس لو فاتها القطار الوهمي !!) حبيبتي حطي ببالك (مافيه قطار اصلاً) ، مارحتي اصلاً محطة قطار وكنتي تنتظرين احد يتزوجك! الامر خِيره من الله ونصيب، ونلاحظ كَثرت القصص عن الي تزوجوا بالـ الثلاثينات والاربعينات بِنّعم الرجال ..بالعكس عايشيين حياتهم بالطول والعرض.. عاشوا اول شَبابهم بُحريه دون التزام قوي كإلتزام الزواج ، والنِصف الاخر من شَبابهم تزوجوا بأحسن الرجال !
الامر له طَريقين :
١-تتقوين وتعيشين حَياتك وتطورين نفسك بدون النطَرة على الاطلال.
٢-توقفين كل شَي وتكونين نَاطره على الاطلال احد ينقذك سواء زواج ، وظيفه، او حتى انسان يصحيك ويعلمك كيف تسعدين نفسك وتعتزين بذاتك.
بما يَخص الزواج ( ليس هُناك قطار اصلاً تذكري هالشي) .. اذا اتتك وحده او واحد ذو نفسيات شَمطاء وقالوا لك فاتك القطار ، قولي " ماكنت انتظره اصلاً " او" الحمدلله بمحطتك البائسه فاتني " او اختصري الامر واعطيهم على راسهم ، طَالعي بنظرة استهزاء وقولي " عادي يتأخر زواجي اهم شي مايكون بدري وفَاشل كبعض زيجات الي حُولي"
وغيرو كتيييير اووي مِن ردود لهم تخليهم ينبكمون فجأة .. الي محتاجه ردود شريرة تجيني هههههه ( المغزى اعطِيهم دَرس تأديبي ، تكسبين اجر وتفكين الناس من شَرهم) :30:
نرجع لموضُوعنا عن الاعتزاز بالذَات ..
عَقليات البشر غَريبه !
ليش اهلك نَفسي واتعب نفسيتي واجري جري وراء مايُعجب الناس !
لمتى البس كَعب واكسر ظَهري بالمناسبات عشان اعجب خلق الله واكون سمبتيك !
عندي خبرة بالميك ابَ اكثر من اي ميك اب ارتست اعرفهم ، لكن ليه اروح صَالون وادفع فوق الـ ٣٠٠ريال وينحط شي على وجهي مو راضيه عنه ! :09:
او ماارضَى الا بميك اب من شَانيل ، دُيور، لانكوم ، جيرلان، بوبي براون، سان لوران الخ...
بينما ريميل ، مَاكس فاكتور، ميبيلين، برجوا ،لوريال الخ ... ممكن اجد ضالتي عندهم !
(طبعا يظل الميك اب الاغلى او ذو البراند الاكبر هو الافضَل خاصة بالفونديشن ، برايمر ، ارواج ، ماسكارا لعدة امور ) لكن مُوب شرط ابي هالامور ! ( الامر قناعه وحُرية شخصية تماماً)
نرجع لموضوعنا ..
احب الأكل الشَعبي جداً واتقن طبخه ، لكن ليه احاول اعود نفسي على الاكلات الاجنَبيه !
احب اللحْم والذبيحه ( مفطح) واحب فيها الكِبده خاصة بالصباح ، لكن ليه انشر للناس الي حولي اني ماافطر الا بانكيك ووافل ودونتس ومَشروبي المفضل هو الاسبريسو ! بينما مَشروبي المفضل هو شَاهي جمر + شَاهي عَدني !
واخيراً ليه اعيش حَياة وهميه ليست حياتي واخلي اهلي ومُحيطي يعيشون اجواء وهميه حسب غبائي بتقييم مُتطلبات التَطور والسعادة !
هل راح احقق ارضَاء لذاتي لما ابحث عما لا يناسبني ولا يناسب احَبابي ونمط حياتي ؟
هالسؤال لابد الكُل يفكر فيه قبل هَلك الروح على شَغلات وافكار ماتسوى !
مُحاولة التطور وتسلق الصِعاب امر جميل حتى نصل لقمة النجاح وفرض قوتنا وجهدنا بهالدنيا..لكن التقليد او عَمل امور لإرضا المجتمع لابد تكون نتيجته مُحبطه .
من اتفه الامور بما يَخص التقليد هو تَقليد الشَكل .. للحصول على نفس الجَمال !.. مع العلم هالشي مُستحيل ومجرد التفكير فيه امر غبي ..
من سنين طويلة شَريحه كبيرة من النِساء ماتفارق حَبة الخال ( الكذبيه) خدهم ، طبعاً هالشي بظنهم بيخليهم مثل جَمال سميرة توفيق! ماهمهم كيف شكل حبة الخال عليهم!بظنهم حبة الخال عبارة عن زر يحولهم لسَميرة توفيق !
السَنوات الماضيه حَواجب توبا (لميس) المرفوعه كانت مُوضه بائسه بسبب البنات الي قلدوها بطريقه سيئة ! اصبحت الاشكال بذاك الزمن تخوف وحَواجب شيطانيه تشكك الواحد هل البنت رايقه او تبي تتضارب !
هالسنتين ربما حَواجب مايا دياب وسمرة بشرتها بسبب السولاريوم خَلت بعض البنات جزراات او كأنهم تَعرضو للحرق!
بالنسبه لي البنت الي تزبط التان مع لون شَعرها وحواجبها اعتبرها بطلة ، فعلاً بطلة لانه امر اشبه مايكون مَعدوم هنا بالخليج !
التَان ، يحتاج لبشرة تتقبله .. بشرة ناعمه خَاليه من العيوب مش حياالله بشرة وحياالله مَلامح !
اتوقع بعد المُسلسل التركي الحَالي البنات بيخلون حواجبهم مُبعثرة بسبب ان الممثله التركية توباَ اختارت هالشي لها !
فيه ناس تظن ان الحَواجب لها مُوضة ! الحواجب مالها موجه معينه ! هي تُرسم وتكون مُرتبه ومتناسقه مع سحبة العين !
الافضل دائما نخليها بشكلها الطبيعي او نهذبها تهذيب بسيط، غير كذا لو بالغنا بشكل الحواجب راح نطل على الصور بعد سنين وننصدم!
اجنبيات مِنهم بروك شيلدز ، صورها تفتح النفس زمان لان مالعبت بحواجِبها لعب !
ارسي على بر .. اختاري استايلك ،اكتشفي طبعك ، واسلوبك بناءً على حقيقتك ..
غوصي بذاتك ، اظهري هَويتك المُستقله عن اي انسان ، استنتجي بعد البحَث ( من انتي) ثم اختاري مَسيرتك بهالدنيا ..
دائماً اثناء التفكير .. لا نِخجل من حَقيقتنا ، لابد نواجه فَشلنا ، عَباطتنا، ضعفنا .. ثم نفكر كيف نحسن الوضع ونطور من انفسنا ..
لا نمحي ذاتنا بهالدنيا ، لو كُل شخص ظَهر بحقيقته الطبيعيه الجيدة راح نكتشف شَخصيات وارواح جميلة ومُتنوعة .. راح نلاحظ بعدها روتين التقليد بالاسلوب ، اللايف استايل بيختفي .. راح نعيش برآآحه حتميه ، لان التكلف والتَقليد والخَوف من المُجتمع او الحِرص على الانتماء بطريقة غَبية امر يُهلك الروح ..
القناعه مُريحه للنفس .. من كَم يوم اكثر من وحده على انستقرام يقولون لي "كلامك مُقنع عن الكريم الفلاني لكن نبي نشوف يدك حتى نصدق اكثر !" استغربت وضحكت وقلت لهم انه معليش "مابحط صورة يدي ارضاء لقناعتكم ، لابد انا اقتنع اول بمزاجي ثم اسوي الي طلبتو" .. قلت هالشي لـ ٤ بنات تقريباً ٢ منهم احترموا قراري الحالي ، ٢ منهم نفذوا بجلدهم هههههه .. مايبوني شكلهم يبون يتسلون بحسابي بالانستقرام ! ناس غريبين فعلاً ! والحمدلله اني تعديت سن التذبذب لتحقيق اهواء البشر .. اسوي الي ابي اهم شي مُقتنعه فيه .. حتى لو حسابي كل صوره عن المفطحات والكِبده والكلاوي ..اهم شي انا عاجبني وحُره .. حُره .. حُره .
مُوفقين ..