ياقمر ام زوجك قالت لك انتِ موعاقلة ..أنا بقولك ليش قالت لك هالكلمة ..
ولاتزعلين ولاتشيلين بخاطرك علي ..لأن الكلام اللي راح أقولة راح يعلمك وين خطأك ..ويعالج مشاكلك ..من طرفك أنتِ وبالطريقه اللي راح ترضيك باذن الله تعالى ..
وساعتها راح تعتفرين بنفسك انك كنتِ موعاقلة أبدآ ...>>>لاللزعل أووووووكي ..
أول شيء ياقلبو ..
سبحان الله ..الله اعطا كل وحده منا اسلوب اللي يقرأه يترجم فيه أفكارها ونفسيتها ومشاعرها ..
يعني اللي تكتبينه بأسلوبك ..أحنا نستشف منه طريقتك مع الناس ..
يمكن انتِ مايتضح لك هذا الشيء ..لكن كل من قرأ موضوعك فهم أسلوبك وطريقتك في التعبير عن نفسك ..
طبعآ لو ان الكلام اللي بقوله بيزعلك ..لكن أنتِ أنسانه تبغين تعرفين حل مشكلتك ..وتبغين حل دائم ..فلازم بالأول تعرفين غلطك ..وتصلحينه ..علشان ترتاحين على طوووول ..
أقدر اقولك طنشي ..ومشي ..وماعليك ..وأحقريهم ..وووو..ألخ
لكن هذي مسكنات مش حلول نهائية ..
أذا تبغين الحل النهائي لمشاكلك مع أهل زوجك أسمعيني للآخر ..وبدووووووووون زعل ..
شوفي ياغلاتي أسلوبك أعطى أيحاء لي أن فيك شيء من الكبر ..ولاتزعلين مني ياقمر على هذي الصراحة ..
بدليل أن مشاكلك كلها حول اللبس والكشخه وشغلات خاصه بالمظهر والماديات ..
وهذي الأمور اللي المفروض تكون آخر شيء تفكرين فيه ..او تزعلين علشانه ..
ثاني امر اوحى لي بالكبر أنك تعتقدين ان من حولك يغارون منك ..(بدليل أنك تقولين انهم يناظرونك أذا دخلتي لمكان وشلتي العبايه ..)
وهذا دليل أنك تلاحظين وتدققين على نظرات من حولك لك ..وتهتمين لها ..
المفروض أنك تلبسين لنفسك ونفسك فقط ..مايهمك كيف كانت ردة فعل المجتمع من حولك أو ايش رأيهم فيك أو في لبسك ..صح ..!!
لاتتوهمي ياقلبي أن العالم ماعندها شيء غير لبسك او مظهرك ..ممكن نظراتهم عابرة ..مجرد فضول ..زي ماأحنا نطالع اي احد حولنا ...نشوف
ايش لابس ..
ليش فسرتي نظراتهم انها غيرة ..؟؟؟؟!!!هذا الشيطان ياقلبي يوسوس لك بكذا ..
ياقلبو أحنا وصلنا للألفية الثالثه ..يعني مافيه شيء أسمه يغارون من كشختي ..!
كل مين في هذا الزمن عارف يلبس وقادر يلبس بذوقه ..ويشتري غالي ..مايمنعه الا ذوقه ..صح !!
شغلة الشكليات اثرت على نظرتك وعلاقتك باهل زوجك كثير ..وهذا الشيء مومن صالحك ابدآ ..
وزايد على كذا أمك لما أثارت عندك نقطة أنك بنت عائلة لها اسمها ..غلط هذا التفكير وأكبر غلط ..لو أهل زوجك فكروا بهذي الطريقة ماخطوبك لولدهم أبدآ ..
أبليس أستغل هذي النقطة ليثيرها في داخلك ..علشان يعطيك مبرر لتصرفاتهم ..,ويشغلك عن الألتفات لعيوبك ..وأصلاحها ..
حتى ام زوجك قالتها لك بالوجة أنتِ شايفه نفسك ..؟؟؟
مستحيل تطلع هالكلمة من فراغ ..ماأحد يقول شيء الا شايفه ..وملاحظة ..
عيدي حساباتك ووازني بينها وبين تصرفاتك ..ام زوجك صريحة واعطتك اياها بالوجة ..يمكن أنها لمحت لك سابقآ بس ماأنتبهتِ والآن جات المشكلة وفجرتها بينكم ..
الأمر الثاني ..مسألة الماركات وكلام اهل زوجك عنها ..والهرم ..والكلام الكثير ..اللي دار بينكم ..
طبعآ من الخطا أن نخلي هذي الأمور تأثر على علاقتنا بأهل أزواجنا ..لعدة نقاط ..
أول شيء أهل زوجك لو مالاحظوا مبالغتك بالكشخه ..واهتمامك بالماركة ..ماكان انتبهوا لهذا الموضوع ..
لو ماأنتِ أعطيتي أيحاء لأهل زوجك أن الماركة والتكت يهمك ماكان لاحظوا ولاصاروا يتكلمون بهذا الموضوع ..وهذا غلطتك انتِ ..
ممكن انتِ من النوع اللي يحب الملابس والمكياج والأشياء هذي ..طبعآ هذا موغلط ..وكلنا مثلك
لكن الغلط أنه يصير اكبر أهتماماتي في نظر المجتمع .وخصوصآ أهل زوجي ..
.لأن المجتمع بينظر لي أني أنسانة سطحية ..ونظرتي للحياة ماديه ..لأن أهتمامي بالشيء هذا بلغ مبلغه ..وصار عنواني ..
صديقيني ياغلاتي ألبسي واكشخي بصمت .وبدون مبالغة .وسبحان الله اللبس المرتب معروفه قيمته لو ماتكلمنا عن جودته أو سعره ..
ويبقى الذوق هو الحكم الفاصل ..فماله داعي يصير الأمر كأنه تحدي على الهرم والا صحاري ..!!؟؟
ام زوجك بحسب كلامك موظفه وبراتب ضخم ومع ذالك انتِ شايفه أسلوبها مع بناتها في اللبس ونقدها لك ..بدليل انها أنتقدتك على أنك رايحة تشترين لبس لزواج واحد من قرايبهم ..؟؟!!وهو مايعنيك في شيء ..!!؟؟
صدقيني الموظفات أكثر ناس يقدرون قيمة الماده ..عارفة ليش ..لأنهم تعبو وشقوا علشان حصلوا عليها ..لأنهم عارفين قيمة الريال ..
أنه مايجي بالساهل ..علشان كذا هي تنقدك ..
ثالث أمر كلام أم زوجك وأهله وانك موعاقلة ..
على الرغم انك ماذكرتي ايش الكلام اللي دار بينكم بالتلفون وايش سبب الاتصال ..لكن بقولك نصيحة ..
شوفي ياقلبو وهالكلام اعتبرية نصيحة أم وأخت تحب لك الخير من قلبها ..
كل ام بالدنيا تتمنى تزوج ولدها انسانه عاقلة ..متزنه ..توقف جنبة وتساعده وتسانده ..وتبني معاها حياه سعيدة ..
كل ام تتمنى تكون زوجة ابنا ربة بيت مدبرة ..حكيمة ..تعرف تصرف امورها ..بأتزان ..وبعقل ..وتساعد زوجها انه يكون نفسه ..ويستقل ماديا ..ويرتاح ..ويأسس حياتة ويبني مستقبل اولاده ..
كل أم تنتظر ان زوجه ولدها يكون آخر أهتمامها الشكليات والماديات ..وأنه الأخلاق والتعامل هو الأساس عندها ..
لكن اعتقد أنتِ أنرسمت لك صور على العكس تمامآ من هذي ..يمكن ماتقصدين ولاتتمنين هالشيء ..لكن هذا الحاصل للأسف..
فكري أم زوجك أشلون تنظر لك ..؟؟؟
اشلون تنظر لمستقبل ولدها معاك ..؟؟؟
تشوف أنثى أهم شيء عندها الكشخه واللبس والمواجيب والزيارات ..!؟
وهذا اللي يخلي أهل زوجك الآن رافضينك ..
زايد على أنك في نظرهم مبذرة ..ترى ماقالو لك اشتري من الهرم ..من باب عيارة أو تقليل أو أحتقار لك ..لكن يبغون يلفتون انتباهك للي هم شايفنيه ..!!
صدقيني مابيفرحون أنك تكوني مبهذله أو بهيئة رثه ..او تجينهم بخلاقين ..ولو كنتِ من أهل هذا المظهر ماخطبوك لولدهم أبدآ ..بس فيه حدود للبس والأهتمام ..
حلو يكون مظهرك نعوم ..تي شيرت ..وتنوره جينز ..لبس سبور عمومآ مع قلوس وكحل وماسكرا ..يمكن يعطيك شيك مرتب ..مريح للقلوب ..
زايد على ان أهل زوجك ملاحظين اهتمامك المبالغ بالكشخه ..فصاروا مايحبذون حضورك ..يعني زواجات قرايبهم معاهم حق ..ماله داعي تفصلين وتشترين ..
هذول ناس مايعرفونك لو حضرتي بأي فستان عندك بيكون الأمر عادي ..
فيه ناس تعتبر هالحركات طفاقة وخفةازود من اللازم ..وأنتِ بغنى ان الناس تاخذ عنك هذي الفكرة ..!!
يعني الكشخه المبهرجة مالها داعي ..زائد على انها تملل الناس منك ..وتنفرهم ..
مو أنتِ تبغين تصيرين زي خواتهم ..ماتبغين الرسمية معاهم ..طيب اشلون تكسرين هالحاجز..!!
وانتِ علقتي على حكاية سكوتهم معاك ..
بصراحه ياقمر انا اعرف اهل ازواج كثير يتعمدون هذا السلوك مع زوجات ابنائهم لعدة اسباب
السبب الأول :كل انسان بالدنيا له طباع وميول وفيه ناس لهم ميول للصمت اكثر من الكلام وممكن يكون هذا الشيء يفضلونه ..
السبب الثاني :فيه ناس ابتلوا بزوجات ابناء مثل وكالات الانباء كل اللي ينقال قدامها واللي تشوفه تنقله لأهلها وصحباتها والمجتمع حولها
والسبب الثالث :أسلوب الزوجات فيه زوجات الله ياكافي ماعندها أسلوب أسلوبها دفش ..وهرجتها كلها تحقيق ....أذا تكلمت اخبارها كلها شؤم ونكد ..وان مزحت جابت العيد في العالم وجرحت الناس ..يقالها تمزح ..فعلشان كذا السكوت عنها غنيمة ..
أهل زوجك مايتكلمون قدامك ..راجعي حسابتك ..
وفيه نقطه أبغى الفت أنتباهك لها
أهل زوجك يشوفنك تتكلمي عن نفسك وزوجك ..ومشترواتك ..وهداياك له ..ويمكن سامعين عن سواليفك كثير وصايرة حياتك زي الكتاب المفتوح قدام الناس ....وعارفين أسلوبك ..وبنظرهم واللي ماحفظت سرها وسرزوجها ماهي حافظة سر الناس ..فعلشان كذات يلزمون الصمت معك ..
الأمر الرابع ..موملاحظة أنك مقيدة نفسك باهل زوجك أزود من الازم ..وهذا الشيء يخنقهم ..
لاتقولي لي عادات اهل نجد ..اقولك كل بيت له أسلوبه وطريقته ..
يمكن اهل زوجك مايحبذون أرتباطك بقرايبهم ..وبعزايمهم ..وخرجاتهم ..وهذا الشيء من حقهم ..زي ماأنتِ لك جمعاتك الخاصه وصحباتك ولقاءاتك ..هم بعد من حقهم يرتبطون بدوريات خاصه فيهم ..
أنها أشوف ان هذا سلوك موطيب منك ..المفروض ماتروحين لأي شيء يخصهم الا أذا طلبت منك ام زوجك ..
موملاحظة أنهم مايخبرونك عن مناسباتهم الا قبل المناسبة بوقت قليل ..؟؟؟
هذا دليل أنهم مايبغونك تحضرين ..لكن للأسف أنتِ مصرة تحضرين معاهم ..
ياغاليه لك كرامه أعز واغلى من انك تهينها علشن دورية والا زواج ..
هذي الشغلات لافيها بر ولاصلة ..ولاعمرها تزود غلاتك عندهم أبدآ ..علشان تلزمين نفسك فيها ..
لو كان قصدك البر والصلة أنك تهتمين لأهل زوجك فقط ..أما خالاتهم وقرايبهم ..لأ ..
الأمر الخامس ..
الزيارة ..
أنتِ ذكرتي سابقآ أن أم زوجك موظفه .وأنتِ عارفة أن وضع الموظفات نظامهم صعب ..وموكلهم يحبون الزيارات .,.
شوفي كم مرة انت تزورينهم ..يمكن زياراتك كثيرة ..فصاروا يتمللون ..زايد على انهم عندهم أشغال ..
قللي زياراتك لهم ..مومن باب كره ونية شينه ..وقطاعه ..لا من باب تقدير لأشغالهم ..وصديقيني بتلاقين كل ترحاب وقبول وقت زياراتك ..وبتلاقينهم هم اللي يتمسكون فيك ..ويعزمونك بعد ..
بالنسبة لزيارتك الأخيرة للأسف ياقلبو أنتِ رحتي وابليس لازال مصيطر عليك ..ماصفتي قلبك ناحيتهم ..ماخليتها لله ..علشان كذا مااستفدتي شيء أنمحقت بركة الزيارة ..
ماكان لله يبقى ..وينفع ..
أنتِ رحت وطول ماأنتِ جالسة أبليس يذكرك بالماضي..قبل كم شهر سووا ..ويوم مات ابوي قالوا ..وجالسه تستجلبين الحزن ..!!
بالله ايش استفدتي من خرجتك ..غير الهم والغم والنكد ..ورجعتي بمشكلة جديدة..!!
حتى زوجك لاحظ أسلوبك معاهم ..
زوجك مايبيك تروحين ديكور بس ..يبغى لك وجود وحس وصوت ..كان جاملتي لو علشانه ..فقط ..
أسمك رحتي لبيتهم خلاص ..يعني سكوتك ماراح يعجبه ..
كان جاملتيه ..الآن للأسف ماكسبتيه ..بالعكس أنقلب ضدك ..
الأمر الأخير تفكرين الآن بالطلاق ..
شوفي ياقمر لو ظامنه ان فيه عريس لؤؤؤؤؤطه واقف ينتظرك عالباب بس تخلصين من العده وهو يتزوجك ..بقولك عادي تطلقي ..!!
كونك تقولين زوجي مايوقف معاي ضد اهله ..
خلينا نكون منصفين ..وحطي نفسك مكان زوجك ..
هل عندك أستعداد تخسرين أمك ورضاها علشان زوجك ..؟؟؟؟؟
هل عندك أستعداد تغضبين أمك علشان زوجك ..؟؟
أنا بقولك ولاوحده فينا مستعده تخسر أهلها علشان زوجها ..لو لاسمح الله كان فيه خلاف بين أهلك وزوجك ..مستحييييييييل تخسرين أهلك وتوقفين بصفه ..ولاوحده بعالم حواء عندها أستعداد تخسر رضا امها وأبوها لأجل زوجها ..
أغلبنا بمثل هذي المواقف يكون سلبي ..للآخر ..يعني نوقف بالوسط لامع أهلي ولامع زوجي ..
وهذا الآن تصرف زوجك ..لو كان الخلاف مع خواته ومتزوجات ممكن اقولك يتكلم ..لكن مع امه ..عمره ماراح يتكلم ولو تكلم أعرفي ان مافيه ذرة خير ..
وأنه مومصدر امان لك مستقبلآ ..
علشان كذا طلعي زوجك من مشاكلك مع أهله ..وأنتبهي على حياتك ..
وصلحي عيوبك ..وعيشي حياتك بأستقلالية ..وترفعي عن توافه الأمور ..والله تمشي علاقتك مع اهل زوجك على الصراط المستقيم ..
والله أني اتكلم من تجربة مع أشد الناس صعوبة ....ومع ذلك ولله الحمد والمنه ..ماأحتجت أشتكي لأحد يوم ما ..لأني عارفة أنا ايش أبغى ..وهم أيش يبغون منـــــي ..
اللي عليك الآن ..لاتقاطعينهم ..,لكن أعرفي نفسك أولآ ..أعرفي الناس ليش تكرهك ..وبعدها ..راح ترتاحين ..
وخلي هالمثل حلقه فأذنك أمشي عدل يحتار عدوك فيك ..
والله ماأحد يمسك عليك زلة ..
والعذر والسموحة ياغلاتي لو كلامي زعلك ..لكني والله لك ناصحة من قلب مخلص ..
ياقمر ام زوجك قالت لك انتِ موعاقلة ..أنا بقولك ليش قالت لك هالكلمة ..
ولاتزعلين ولاتشيلين...
ياغلاتي يعلم الله عزوجل اني ماقصدت أ زعلك ..أو اجرحك..
كل ماقصدته هو افادتك ..
غاليتي ملفاتنا الشخصية مثل الكتب المفتوحة ..كل مين حب يقرأ ..يقدر يعرف شخصياتنا واساليبنا في الحياة ..
غاليتي تحليل الشخصيات علم واسع ..فينا نستشف أفكار الناس وردات فعلهم من ردودهم ..ومواضيعهم ..وطريقتهم في التعبير عن انفسهم ..
سهل جدآ أننا نتوقع شخصيتك ..
غلاتي انا كتبت رأيي بناء على ماقرأته في ملفك الشخصي ..
حتى انتِ هنا لم تنفي الكبر عن نفسك ..
ولك رد سابق توصفين نفسك به
أذا أنتِ ياغلاتي تقولين هالشيء عن نفسك ومعترفة أن مظهرك يوحي بالكبر أجل ليش تزعلين من حكمنا عليك ومن رأي ام زوجك فيك وكلمتها لما قالت شايفه نفسك ..؟؟؟
عرفتي ياغلاتي وين غلطتك ..!!
طالما أنك عارفة نفسك ..المفروض تحرصين تعطين أنطباع على العكس تمامآ من مظهرك ..
خصوصآ ان الكبر صفه شينه ولاأحد يتقبلها ..
يمكن انتِ اطيب مني قلب ..وأصفي مني ..وأحن ..لكن للأسف مظهرك يظلمك ..وأسلوبك ..
هذي مسؤليتك تغيرين نظرة الناس تجاهك ..
( هذا ما رأيته منهم بالفعل.. لست انا من يهتم بمسأله اللبس.. اهل زوجي هم من يهتمون بهذا .. والحمد لله انا كنت قبل زواجي لدي اهتمام باللملابس وبالزينه والجمال لكن ليس لدرجه ان يكون ديدني وشغلي الشاغل ( الملابس)!!
للأسف ان منذ زواجي كان لدى اهل زوجي واقاربهم دورية شهريه وكان همهم الكبير هو الاستعراض باللبس وكأننا في مسابقه للحصول على لقب ملكه جمال !!!!!!!
والله انا لم ابالغ
كرهت هذه الثقافه الغريبه لديهم... ومللت من الذهاب لذلك التجميع الشهري.. الذي اصبح استعراض للحلويات والطعام والملابس والجمال........ّّ!! أيّ تجمع هذا!!
لدرجة ان كل من يدخل تلك الاستراحه من صغير وكبير كانوا يعلقون على لبسه ان كان قد لبسه من قبل
ويعجبون ويمتدحون من تلبس في كل مره لبساً جديداً وجميلاً وان كانوا لايصرحون بذلك لكن كان ذلك يصلني!!
طيب ومين اللي جابرك تجارينهم في ثقافتهم ..؟؟
هذي غلطتك ..بحق نفسك ..موبحق أحد ثاني ..
مولازم تغيرين مبادئك علشان المجتمع ..
المشكلة أنك تنقدينهم وتجارينهم ..
وين مبادئك ووين قناعاتك ..وين أعتزازك بذاتك ..
ياغاليه والله ماأقول هذا الكلام الا لأجل مصلحتك ومصلحتك فقط ..
لو أنك ثابته على مبادئك ماهزتك أفكارهم وتغيراتهم كان أسترحتي من هذا الغثاء كله..!!
( لكن يا اختي الفاضله ليس من يده بالماء كمن يده بالنار
ضعي نفسك مكاني
وتخيلي بأن كل ماذهبتي لأهل زوجك وانتي تلبسين ثياب جميله( وان لم تكن جديده) اخذوا ينظرون اليك وفي عيونهم الشر والغيره.. واذا ذهبتي لهم بلبس قديم هان عليهم هذا واخذوا يضحكون معك..!! أو ليس هذا ظلم
( حرام عليكم وحلال علينا)
( يا البس خلاقين يا ماراح تحبوني)
طيب وأنتِ ايش رايك بنفسك ..؟؟؟
هنا فائدة الثقه بالنفس ..حبوني كان بها ماحبوني ..ماأقدر أجبرهم ..
لي موضوع كامل عن اهل الزوج ..والتعامل معاهم ..أنصحك تقرأينه ..
(انا لست ناقصه عقل ولست باللتي تنظر وتلتفت عندما تخلع عباءتها لترى من ينظر إليها)
أختي أنا ماجبت هذي الكلمة من فراغ أنتِ كتبتيها في رد سابق ..
عيونك منتبهه لنظراتهم ..هذا دليل على أهتمامك بالأمر ..
(الم اقل لك لا تحكمي على احد من كتاباته.. خاصه وانا لم اذكر كل شئ!!
(انا ماجبت خبر الناس)
ولأنه صار موقف وتكرر اكثر من مره.. اهل زوجي يحبون اللي تحضر عزايم اقاربهم
ويزعلون لو ما احضر.. بالذات اني اكون مدعوه .. تكرر المشهد كم مره
اذا حضرنا عزيمة لأحد اقاربهم واذا اخوات زوجي كانوا لابسات لبس جديد( مايزعلون علي) لكن اذا لبسوا لبس سبق ان لبسوه ( موجديد) وانا لبست لبس جديد ( تخيلي انهم مر ماسلموا علي) علشان كذا انا عرفت كيف تفكيرهم....
شفتي كيف أن أرتباطك الزائد بأهل زوجك هو السبب ..
مشاكلك كلها حول العزايم واللي يدور فيها ..
أستقلي ..ياغاليه استقلي بذاتك ..وراح تشعرين بالراحه ..
( من قالك اني اهتم من احد (( هذي مشكل اللي تحكم على الناس على طول) حبيبتي انتي ماعرفتيني.. وانا ماحكمت على اهل زوجي بين يوم وليله انا حكمت عليهم بعد عشرة دامت 6 سنوات ( وهذه كفيله ومده كافيه للحكم على اي شخص) صح ولا انا غلطانه !!
ياقلبو انا ماحكمت أنا أعطيتك وجهة نظري في اللي قرأته ..
موشرط تكون وجهة نظرك فيهم صح ..أحنا بشر ياغلاتي ..وكلنا فينا نصيبنا من الشر والخير ..
أنا وأنتِ وكل عضوة في المنتدى ..مافيه انسان مايغلط ..
الشيطان يجري من أبن آدام مجرى الدم ..
( لا حبيبتي غيره وستين غيره) تعالي ليوم لأهل زوجي وانتي كاشخه وتعرفين كيف!!
( ياربي وين عايشه انتي) من جد الحين عرفت انك مانتي متفتحه كثير ماشفتي نفس اشكال اللي عندي ولا عاملتي ناس تغار ..
أسألي بنات حواء عن الغيره وما ادراك مالغيره وشرط ان يكون نسبه الغيره بين الناس 99% ان لم تكن النسبه100%
يالغلا ماأحب تكون أسير حياتي وفق مباديء المجتمع والا بصير أمعة ..
مومعقول ياغلاتي يااصير أستنساخ من المجتمع اللي أعيش فيه ..والا ماأصير متفتحة ..؟؟!!
تبغين ترتاحين أحذفي كلمة الغيرة من قاموسك وترتاحين ..أحذفيها علشانك انتِ ..علشان تنسين المجتمع حولك ..
قلتها لك ياقمر من قبل الآن كل مين عارف يلبس ويشتري ..بس بذووووقة ..
وأنتِ أشتري راحتك ياغلاتي ..
وسبق وقلت لك يالغلا عايشت ناس أصعب من اهل زوجك بمرار وتكرار ..وماأبي اخوض في التفاصيل .. أعطيتك الزبدة منها فقط ..
( صح بس لازم تعرفي حبيبتي ان فيه اسمه حسد( تمني زوال نعمة الغير)
يعني تكون اخت الزوج ممكن لبسها افضل من لبس زوجة اخوها.. لكن لو تلبس زوجة اخوها ( مره وحده لبس حلو) تلاقين الغيره شااااااااااابه والعياذ بالله
تبي بس هي اللي تكون كشخه والناس لا... وفيه كثير يعانون من هالشئ)
ياقلبو ..وايش يعني غارت والا أنفقلت ..خليها تبلط البحر ..
ولاتشيلي هم ..وكل مين ينام عالجنب اللي يريحه ..
لاتنزلين لمستواهم علشان لاتتعبين ..
أحذفي سالفة اللبس من خاطرك ..
( والله الشكليات تعلمتها من ثقافتهم الغريبه.. بأنك اذا كنتي( لبيسه) تحصلين على اكبر قدر من اعجاب اقاربهم ... واذا كنت ( حيا الله) (مثل وحده من قريباتهم) تلاقين عيون السخريه تلاحقك (ومافيه احد يرضى يكون بالموقف هذا)
طيب أنتِ وين شخصيتك وأستقلاليتك ..؟؟
لاتصير الوحده امعه أن احسن الناس أحسنا وأن أساؤوا أسئنا ..
عرفتي ليش الآن انا أنصحك ..لأنه هذا لمصلحتك أنتِ ..
الى متى بتسايرينهم بمادئهم ..!!!
والله هالشيء يتعبك أنتِ ..
البسي زي ماكنتِ قبل ..وسيري على نفس أفكارك ..وصدقيني ماراح تحصلين الا كل خير ..
عيب ياحبيبتي تقولين عني هالكلام( عمر النصيحه ماصارت كذا بإطلاق احكام زائفه ليست مبنيه الا على كلمات قليله)
انتي ياعزيزتي ماعرفتيني( تحكمين على وحده ماعرفتيها
( وبعدين مادري ليش حسيت انك واقفه بصفهم)!!!
تعم (كلمتها طالعه من فراغ وفراغ كبير بعد)
وماراح اتعب نفسي و اتكلم عن نفسي وادافع عن نفسي!!
لأن الله سبحانه فوق سبع سماوات مطلع على كل شئ
والله ياقلبي أنا ماأعرفك ولاأعرفهم ..
ماأنا أخت لك في الله ..تقرأ مابين السطور ..وتريد لك الخير ..
ولاتتوقعي أني ابغى شيء غير الخير لك ..والا ماعنيت نفسي كتابة هذه السطور ..
وعلشان ماتزعلين مني شوفي أنتِ شو كاتبه عن نفسك ..أنتِ معترفه بقرارة نفسك أن مظهرك يوحي بالكبر ..
كونك ماقدرتي تغيرين هالصورة عنك امام أهل زوجك أكيد راح تظل ثابته وراسخه عندهم ..
مسؤليتك تعطين الناس ايحاء جيد عنك ..عن الروح الطيبه اللي تحملينها ...
هذي مسؤلية كل وحده فينا أنا وأنتِ وكل مين يقرأ كلامي ..
قلبك طيب .حنونه ..رحوم ..متواضعه ...بس هالأشياء كلها بقلبك ..لازم أفعالك ومظهرك تترجم هالأحساس ..
مظاهرنا احيانآ كثيرة تظلمنا يالغلا ..وفيه مواضيع كثيرة يالغلا موجوده في القسم تعلمنا أشلون نترك أنطباع جيد عن أنفسنا ..
أتمنى تكوني فهمتي علي ..
0(لاغلطت ولا هم يحزنون)
يعني هم زعلانين علشاني دايما اعتني بشعري وبشرتي ولبسي والميك اب
وماشاء الله تبارك الله ( صايره اصغر من سني بكثير علشان الاهتمام وهالشي ذابحهم )
أمممم طيب أشلون هم عرفوا هالأشياء عنك ..موهذي أشياء خاصه ..؟؟؟
موممكن يكون لك دور في توصيل هالشيء لهم ..!!
ممكن أنتِ تتوقعين انهم يغارون لأن في نظرك مافيه لغيرتهم الا أهتمامك بنفسك ..
ما ممكن يكون فيه سبب آخر ...!!؟؟
( ماقد صار اول اهتماماتي ولا راح يكون
لكن اذا الله ابتلاك بأهل زوج واقارب زوج يحبون الكشخه وفي كل مره لبس جديد حتى اللي في المتوسط والثانوي ( فمابالك بي انا.. بأم وزوجه) .. انتي في هذي اللحظه .. مستحيل ترضين تكونين اقل منهم
واذا انتي ترضين انا نفسي ما ارضى ابدا
حتى ثقافه زوجي مثلهم ( يسألني عندك لبس للطلعه) !!!
ياقلبو أنتِ أول تنقدين ثقافتهم الغريبة ..والآن صرتي تقلدينهم ..
والآن لاأنتِ اللي راضيه عن نفسك ولاهم راضين عنك ..!!
الآن جارتيتيهم على امل تكسبين ودهم ..وللأسف لا أنتِ ارضيتي ذاتك ..ولاهم رضوا عنك ..
ياغاليه مبادئك طالما أنك تشوفينها صح أياك تتنازلين عنها ..لأن هذي بداية المعاناه ..
راح تكونين مضطرة تجارينهم ومع ذالك ماأرتحتي من نظراتهم ..مولو كنتِ على نفس حالك السابق ..ماكان افضل ..واريح لك ..؟؟
ياغلاتي أترك لك الحكم ..أنتِ صاحبة الشأن ..
( ذبحتوني انتي واللي قالوا لي لاتتكلمين عن لبسك
من اللي طلعت الاشاعه وقالت اني ثرثاره عن لبس وكشخه
انتي عارفه اني ما اتكلم عن هالاشياء؟؟
بس الكتاب واضح من عنوانه
ياحبيبتي اللبس الكشخه يبان من غير ماتتكلمين ...فهمتي!!
يعني يكفيك اصلا اذا اعجبتني تنوره او بلوزه على وحده من اخواته .. اسألها من وين ؟؟؟؟؟؟؟؟؟؟
تقول:: هي من زمان عندي في الدرج..... ماشاء الله كل مره نفس الإجابه
الظاهر شارين ملابس كبيره لهم من كانوا نونو :04:
طيب يالغلا مو ممكن سؤالك هذا يُفهم منه أهتمامك الزائد بهم ..؟؟
يعني حتى لو ايش ماكانوا لابسين لاتعطينه اهتمام ..
لأنهم مايحبون احد يسألهم ..وهذا واضح من اجابتهم عليك ..!
وسبق قلتي أنه دار بينكم كلام أنت وأخت زوجك وقلتي انا ماأشتري الا من صحاري ..!!
عرفتي أشلون الناس تستشف منك أسلوبك في الحياه ..مولازم تكون كلماتك واضحه وصريحه ..يكفي انك تعطين طرف الخيط لهم ..
فهمتي علي يالغلا .,أنا موضدك ,..أنا معك ..
( لا حبيبتي هنا وقفي)!!!
اول شي انا دايما تجيني دعوه لمناسبات اقاربهم.. ( انا ما اروح بدون دعوه)
ثاني شي..... كانت الفتره اللي صارت فيها سالفه الفستان ماعندي فساتين الا من سنتين ( يعني فساتين زواجي ) وصارت ضيقه علي هذا غير انهم شافوها وموضتها راحت !!!
وكل مناسبه لازم كل بنات عائلتهم يلبسون لبس جديد
يعني لاتفكرين بيكررون اللبس ابدا
وهذا ارهقني ماديا ومعنويا
لأن ما احب اروح السوق كثير
ومصروفي مايسمح كل مره لبس جديد
طيب وين المشكلة ..!!؟؟
أشتري ولاأحد يدري الا اذا شافوة عليك ..
ليش لازم يدرون أنك بتشترين فستان ..!!
استعينوا على قضاء حوائجكم بالكتمان ..
( ايوه!!!!!! يعني تشكخ بناتها واانا يالمتزوجه لاتلبسين ولا تكشخين
روحي الله يهديكٍ صرت احس ان بينك وبينهم قرابه) استغفر الله العظيم
نلاقيها من اين ولا من اين
على قولة المثل::
( ويحسدوني على موتي فوا أسفي ***حتى على الموت لا اخلوا من الحسد)
موقلنا ياقمر من البدايه لاللزعل ..؟؟!!
ياعمري والله العظيم لاأعرفك ولاأعرفهم ..
أنا هنا معك موضدك ..بس يمكن انتِ مافهمتي مقصدي ابدآ ..!!
انا اشرح لك أسلوب ام زوجك وطريقة نظرتها وتفكريها ..مومعناته أني موافقتها الرأي في اللي قالته ..
أنا افسر لك الأمر ..ليش فهمتي اني اقولك لاتلبسين ولاتكشخين ..!!
( ايوه... كملي....يبوني اصير انسانه اجمع فلوس زوجي والبس خلاقين ,,, وهو يروح يسلف امه 30 الف وغيره وغيره مع انها مو ناقصه فلوس.. بس تشاركني بفلوس زوجي)
(ابن آدم لايملأ فمه غير التراب)
وليه ياقلبو الدنيا مافيها الا ياأبيض ياأسود ..؟؟؟
يايعرفون كل مصاريفي ومن أشتري ..ومن فين البس ..وكل شيء عني ..
ياأبخل على نفسي ..ولالبس ولااشتري شيء ؟؟؟
لاياقمر ماقلت هذا الكلام ..
ولاني من اصحاب هذا المبادي ابدآ ..
بس فيه شيء أسمه داري على شمعتك تقيد ..
يعني آخذ من زوجي اللي أبغاه ,وأصرف والبس على كيف كيفي ..بس من تحت لتحت ..مدارة للمشاكل وتجنبآ لغثاء الكلام اللي أنا في غنى عنه ..
ياقلبو لاتفهميني غلط ..مدري ليش أحس كل كلامي انفهم غلط ..
والله العظيم خليتيني اندم على الكلام اللي كتبته لك..
مالي مقصد والله الا أنفعك ..
( والله بعد اللي سوت فيني وانا ماعمري قصرت فيها
مايهمني وشلون تنظر لي ..........اهم شي زوجي وبس))
أمممم ماأدري ياغلاتي كيف ممكن يكون تأثير ام زوجك عليه ..!!
سهل نخسر الناس ..عادي أذا مايفرق معك اخسريها
لكن تأكدي أن كثير من الأزواج كلمت أمه عنده مثل السيف .,.
ورأي امه يهمه ..بالمقام الأول ..
وانتِ حره يالغلا ..
( يبوني اصير خلاقين علشان يحبوني........ طز......مابي الحب اللي كذا)
مافيه سبب ثاني الا الخلاقين ..؟؟
أم زوجك تكلمت معك بالتلفون بأشياء ثانيه ..أتوقع هي سبب مشاكلكم وكرههم لك ..
فكري فيها زين ..وخلي الخلاقين على جنب ..
( مشكلتك حكمك علي خطأ........ اي مبذره يابنت الحلال
تخليني اتكلم ونا ما ابي..
انا مصروفي انا وطفلين 1000 ريال
مو عشرة الاف
ركزي ألف ريال فقط لاغير
يعني شامل ايضا فاتورة الجوال والفستان( لو كان فيه مناسبه)
أي تبذير تتكلمين عنه
بس الله بإسمه مبارك لي فيه....... ولا خليها على الله بس
ياقمر أنا ماقلت أنتِ مبذرة ..؟؟
أنا قلت في نظرهم مبذرة ..يعني نظر اهل زوجك ..وهذا الشيء واضح من أسلوبهم معك والكلام اللي كتبتيه عنهم ..
..
( انا البس كذا........ ويزعلون......... يعني كنتٍ تتوقعين البس ايش؟؟؟؟
ياقمر الكشخه مصطلح واسع كلن يكيفها على كيفه ..
( وش قاعده تقولين انتي.. انا رسميه.... لا اله الا الله
مشكلتك ماعرفتيني!!!!!!!!!!!
ياقمر أنا ماقلت رسمية ..انا قلت مظهرك رسمي بناء على وصفك لذاتك ..
عرفتي أني أنا مااحكم من فراغ ياقلبي ..
( قلت لك ما اتكلم عن حياتي) ( اصلا الله يخلف على الرومانسيه .. اي هدايا تتكلمين عنها)
( اذا زوجك يهديك .......اصابيعك ماهي سوا))))
ياقمر مو أنتِ قاليلة لخالة زوجك عن سالفة قميص الرقص ..هذا مويعتبر شيء خاص في حياتك ؟؟؟؟
أنا مااحبيت أذكرك فيها من أول قلت يمكن تنتبهين لها ..
وأم زوجك تكلمت بالتلفون عن الهدايا وقالت أنك تقولين للناس ..ياغلاتي انا قرأت اللي كتبتيه في موضوعك الأول وعلقت عليه ..مااقول هو يهديك والأنتِ تهدينه ..أنا اعلق عالمكتوب في الموضوع ..
طبيعي في نظرهم ان هذي أسرار زوجية ماتنحكى لأحد ..
( من قالك مايطلعون طلعات خاصه لخالاتهم وقرايبهم) ( لكن خصصوا للباقي استراحه شهريه فقط) وانا اول زواجي عقدت زوجي ماكنت اروح اجتماعاتهم
لدرجة كان فيه بيني وبينه مشاكل كثيره ........ليش؟؟؟
علشاني ما احضر دورياتهم واجتماعاتهم ( اللي اكون مدعوه لها)
ولما صرت احضر صار يفرح كثيرررررررررررر..
ولا انا ماتقيدت فيهم ( حمد لله عندي مجتمعي من اهلي وصديقاتي وقريباتي)
بس هو لازم احضر كل ارتباطاتهم .......ولا يزعل ويطربق الدنيا زعل اذا ماحضرت!!!
أمممممم طيب ماانتِ ملزومه تروحين طالما انك مومقتنعه فيها ..
شوفي في النهايه أيش حصل من ورى الجمعات هذي ..خربت عليك حياتك ..ونغصتك عليك هدوءك ..
( الحمد لله كرامتي عاليه وعزتي فوق ولا تهزني امور زي هذي
بالعكس انتي فاهمه الدنيا عكس وللأسف ( ويمكن ماعندك خبرة زيي بالحياه)
معليش لاتزعلين بس اقوللك الشي اللي يفيدك...
الحين اذا حضرتِ عزووومة احد راح يقول لك مشكوره على حضورك
وتزيد مكانتك عنده وعند زوجك ( وهذا المهم عندي)
وبالنسبه انهم مايخبروني قبل العزيمه الا بأيام مو لأنهم مايبوني احضر
افهمي ياحلوه
( لأنهم مايبون يكون عندي وقت اتهندم فيها وافصل لي حاجه حلوه وعلشان البس من القديم اللي عندي) فهمتي ولا لا...؟
للأسف وهذا الغلط بعينه ..
أول نقطة المجتمع اللي قاعدة تحاولين تكسبينه وتكونين علاقات قوية معاه ..مجتمع انتش موراضيه عنه ..
تنتقدينه ..وتذمينه ..كله مجتمع غيبه وحش ..ومفاخرة باللبس ..أيش المميز فيه اللي يخليك حريصه على تقوية علاقتك فيهم ..؟؟؟؟
النقطه الثانيه ياغلاتي أنتِ تسايرين زوجك حتى باللي موراضية عنه ..وباللي مومرتاحه له ..
وهذا الشيء الآن قاعدة تدفعين ثمنه غالي .,.
وقت ماصارت المشكلة .زوجك .مانفعك ولافكر يوقف بصفك .زي ماكنتِ متوقعه !!.
بالعكس خطأك وصحح لأهله ..
مشكلتنا نساير أزواجنا ولو على حساب مشاعرنا ونفسياتنا ..وفي النهايه نجني المشاكل وهو أول من يتخلى عنا ..
موأنتِ ناقدة لجمعة أهل زوجك ..وتقولين عنها كلها حش وغيبه ..ومفاخرة باللبس ..!!!
ومع ذالك ملزمة نفسك فيها ومتقيدة معاهم ..بكذا ماتشعرين بالأستقلال أبدآ ..وين شخصيتك ..؟؟؟
زوجي على عيني وراسي ..وهو جنتي وناري ..لكن باللي يخص حياتنا الزوجيه ..واللي يتعلق فيه كزوج ..,وبحقوقه الزوجية ..وله منــــي حسن التبعل ..
أرضيـــــه ثم أرضيــــــــة ..ثم أرضيـــــة ..لكن بحدود..
أما أني أكون علاقات مع فلانه وعلانه علشان يكون راضي عني ..هذا أمر مايعني لحياتي شيء ..ولايعني له هو شيء ..
له حق عليه أصل أهله ..اللي هم أهل عيالي ..أبر وأمه وابوه ..
علاقاتك يالغلا شيء خاص لنفسك ..تسوينها بالطريقه اللي تعجبك ..
يالغلا أنا اعطيتك خلاصة تجربتي في الحياة ..ماذكرت لك كم سنه علشان لاتنصدمين بالرقم ..
( الجواب فوق....... هم يزعلون مره لما ما احضر... سواء اهله او اقاربه او زوجي..
وبعدين بيقولوا هذي ماتبينا اكيد... او ماتحبنا
والحمد لله كل اقاربهم يحبوني.... ولما مارحت مره لدوريتهم.. سألوا كل الموجودات عني.. وانا احضر لأن اهلي يكون عندهم مناسبات ( وااذا ماحضرت مناسباتهم مايحضرون مناسباتنا ومتكون علاقتي فيهم قويه)
كان الله في عونك ..
للأسف مافيه احد يقدم شيء لله ..
( انا ماراوح الا اربعاء ورى اربعاء.......... ما ادري اذا تفكيرك ان هذا كثير فهذي غريبه.......... وام زوجي ماعندي اطفال كلهم كبار وهي تطلع بدري يعني فاضيه..عموما انا ما احب اروح لهم ابدا الا اذا حضر عندهم ضيوووف
( لكن زوجي يزعل لما ما اروح)
مومهم أنا ايش أشوفه كثير أو قليل ..
المهم اهل زوجك أيش يشوفونه كثير أو قليل ..!!
وردة فعلهم تجاهك هي اللي تحدد ..وأنتِ أحكمي ..
ياغلاتي أنا ماعلي رحتي والا مارحتي ..كل يوم والا كل اسبوع ..والله ماتفرق معي .
على فكره
الحمد لله
الآن اعاملهم برسميه
وكا انا مرتاحه
واحس انهم شغوووفين علي لما رحت في زياره ثانيه لهم( طبعا كان فيه ضيوف وماطولت)
وتعالي شوفي كيف التقدير والإحترام
(((( ابعد تنحب)))
وشكرا لك
العفو يالغلا ..
يعلم الله عزوجل ان ماسطرت حرف واحد الا لأجلك ..
يمكن اللي يقرأ كلامي يظن اني ضدة ..ومع خصمة ..
وانا والله لا الى هؤلاء ..ولا الى هؤلاء ..
أعطيك رأيي بحسب ماأقرا ..وأترك لك حرية التصرف ..
ان أعجبك رايي خذي به ..وان ماأعجبك ..أعتبري نفسك ماقرأتيه ..
والعذر والسموحة منك ...
والله يوفقك ويسخر لك ..