انا بموقف محرج جدا وماعندي خبره بمثل هذه المواقف

السلام عليكم ورحمة الله وبركاته 
ببداء بالموضوع بدون مقدمات
اخو زوجي من زمااان يدورن له وهو كبير بالعمر تعدا 33 
لهم 3 سنوات وهم يدورن له
مره كنت جالسه مع امي واختي
اقترحو علي بما ان اخو زوجي يدور ليش ماارشح بنت خالتي 
تدرس اخر سنه بالجامعه
رحت كلمت زوجي قال اوكي اكلمهم بس مو تخطبين البنت وانتي ماتدرين عن اهلها يمكن يوافقون ويمكن يرفضون عاد اذا رفضو تكوني تقل بزر عند اهلي لازم تتأكدين ان بنت خالتك واهلها موافقين على اخوي ثم عاد نفتح الموضوع مع اخوي 
قلت طيب اكلم امي واردلك 
كلمت امي وقلت قال الرجال كذا وكذا 
بس يايمه ترى للحين ماكلمنا اخوه بموضوع بنت خالتي يمكن نكلمه ويرفض او يقول صغيره علي فعشان كذا دقي على خالتي أسأليها لو خطب بنتك واحد عمره كذا ويشتغل كذا توافقون بدون ماتخبريها التفاصيل ولا تخبريها انه اخو زوجي ولاتعطيها تفاصيل لانه لسى اخو زوجي مافتحنا معه الموضوع استني الحد ما اخو زوجي يتحمس اذا قالت حياهم خل يدقون كلم زوجي اخوه 
قالت امي ابشري بسألها وردلك 
دقت امي على اختها والله يهديها حمستها كأنه خلاص الموضوع تم وهو لسى زوجي ماكلم اخوه بكرى بيكلمه عنها 
قالت امي الاختها انه اخو زوج بنتي وانه يبي يخطب بنتكم بس متردد ترفضون لانها اخر سنه بالجامعه وانتم بديره وهو بالرياض وقالت كلام الله يهديها ماقلته وزودت من عندها 
رجعت امي علمتني وش قالت قلتلها يايمه ليش تقولين انه اخو زوجي وليش تقولين انه خلاص بيدقون ويبون رقمكم حمستيهم ويمكن مايتم شي فرضا الولد قال صغيره او قال مابي او يمكن رد اخوه يطلع موقفنا بايخ عند اختك 
المطلوب من امي انها تقول لو خطب بنتك واحد بالثلاثين توافقون ولالا بدون ماتعلمينهم من هو واذا قالت ليش قولي بعديم تعرفين 
قالت مافهمتك يابنتي والله صار اللي صار وانتي عليك تكلمين زوجك يضغط على اخوه مو تفشليني عند اختي
طبعا هذا اللي صار ومن يومها وانا متوتره وخايفه مايحصل شي ويرفض الولد واتفشل عند خالتي 
انا غلطانه سمعت كلام زوجي وخبرت امي ولا المفروض اسد فمي لما بكرا يكلم اخوه بس خفت يكلم اخوه واخوه يوافق ويطلبون الرقم وتكرشهم خالتي وتقول لا كبير او ماتفكر تزوجها او شي فأتفشل عند زوجي واخوه عشان كذا اضطريت اسأل خالتي بس ماكنت ابي امي تحسسها انه خلاص تم الموضوع وماكنت ابي امي تعلمها انه اخو زوجي
حسيت امي وخالتي حولو المسأله الجديه وهو ماصار شي 
الحين اللي صار صار يااخواتي 
ابي منكم حل تكفون لو مثلا اخو زوجي رفض او قال لا او ماعجبته فكرة انها مو نفس الديره وش ارد الخالتي وش نقولها بدون مانجرحها تكفووون والله اني متوتره وخايفه رغم انه زوجي للحين ماخبر اخوه بكرا بيخبره 
بس خايفه مايصير شي واتفشل عند خالتي 
فرضا طيب ماحصل شي اخو زوجي ماعجبته الخطبه او رفض الاي سبب وش نقول للضعيفه اللي تحمست وش العذر المناسب مررره متوتره وخايفه..