انا حائرة وأريد مساعدتكن

السلام عليكم ورحمة الله وبركاته
هذا أول موضوع لي في هذا المنتدى لعل وعسى أني ألقى الحل المناسب لمشكلتي. انا صارلي 7 سنوات متزوجة وعندي ولدين الاول عمره 5 والثاني عمره 3 سنوات أعيش في بيت أهل زوجي بسبب ظروفنا المادية. مشكلتي أن أهل زوجي ناس متشددين في كل شي بزيادة شكاكين بشكل فضيع وعصبيتهم على ابسط الامور واتفهها انا الوحيده اللي ساكنة في بيتهم واتحملهم اما الباقي كلهم مستأجرين شقق وبيوت وعايشين حياتهم وماقدروا يتحملون هذا كله منهم. أهل زوجي مايحبون عيالهم مثل حبهم لعيالي. فجأة الحب هذا تغير وصاروا يضربونهم ويسبونهم وينادونهم بأبشع الالفاظ وغير الضرب المبرح كلامهم عني بأني ماربيتهم ودلعتهم مع اني ما أشد وما ألين وياهم اعاملهم بوسطية لأنهم فالنهاية اطفال وهذا كله بسبب أنه عيالي فيهم فوضى وشقاوة. اذا ضربت واحد من عيالي تخبر علي ام زوجي وتقول لأبوهم اني اضربهم واعنفهم مع اني ولا مرة سويت هالشي الا في هالفترة هالشهر هذا من شفتهم يعنفونهم بسبب الفوضى اخذهم عندي واخليهم ينامون واحرمهم من اي شي يحبونه. والله نفسيتي تعبت وماقدرت اكلم زوجي في شي لأنه بعيد عني في دوامه ويمكن يطول ل3 شهور.صرت عصبية وايد وما اتحمل اي كلمة تنقال لواحد منهم خاصة الصغير اخذه واضربه وانيمه والله يختنق احيانا من الصياح بس مجبورة اسوي هالشي وقدام اهله ومايهمني شي تعبت والله بمجرد اني افكر انه طفل وماله اي ذنب وهذي طفولة وشقاوة ماقدر انا اتحكم فيه وفي كل تصرفاته ولا هو يفهمني انه هذا عيب وغلط كانو كل هالسنين يعاملونهم بحب وفجاة انقلبوا ضدهم وهم اطفال حتى ولدي البجر يقولي ماما ليش جدي مايخليني اقعد وياه واسولف وياه مثل قبل ويصيح في حضني وانا احبس دموعي واطالع فوق وادعي ربي بكل حرقة واقول ليش ياربي. انا مو مقصرة فيهم ابدا وقايمة بواجبي لكني مب خادمتهم 24 ساعه و زوجي ولدهم وطول الوقت غايب بحكم وظيفته. ماجاهم مني الا الخير ليش يعاملون عيالي بهالطريقة انا بتحمل معاملتهم لي لأني مهما سويت ببقى في نظرهم زوجة الولد يعني الغريبة اما عيالي انا ماقدر اتحمل اشوفهم بهالحال حاولت اكلم ام زوجي قالتلي انتي السبب ماتعرفين تربينهم مع اني الحمدلله ماقصرت في هالشي وعمري مابقصر قلت يمكن والله اعلم مايبونا نسكن معاهم بنفس البيت وفكرت اكلم زوجي في هالموضوع اول ما يرجع انه خلاص صرنا اسرة وعيالنا يكبرون ومحتاجين شقة أو بيت.
ساعدوني