انا خلاص وصلت حدي

السلام عليكم ورحمة الله وبركاته
بفضفض لكم يابنات وقولو لي لو كنتم في موقفي كيف تتعاملوا مع هالانسانه
الله يشهد عليه اني بنت حلال حالي من حال نفسي تربيت ع طاعة الله ومخافته واحس في الناس واراعي مشاعرهم
اهلي ربوني ع الصدق والتسامح والرحمه ومراعات الاخرين
لكن ابتليت باهل زوجي اشر ابتلاء
ناس اخلاقهم صفر للاسف الشديد
اولهم الي هي ام زوجي
يابنات ايش اقولكم يابنات انا عجزت فيها
عاملتها بالحسنى مانفع
اهديتها مانفع
توددت لها مانفع
حسبي الله عليها ونعم الوكيل
يمكن اغلبكم عارف قصتي
انا اعاني من سنه ونص من مشكلة الانجاب
وهي قايمه القيامه ع راسي كل ما تشوفني تقول فلانه تزوجت من بعدك وعندها عيال فلانه اصغر منك وعندها عيال
بنت فلان مثلك ماتنجب وزوجها تزوج وحصل عيال
في كل زمان ومكان الا سالفة العيال ع لسانها
وكل ماتشوفني مبسوطه تقول بزوج ابني ابغى له عيال وامها توافقها في الكلام
انا صبرت كثير ع اشياء ماتنقال
ولكن لكل شي حدود
كل ماتشوف زوجي تقوله تزوج وجيب لك عيال
روح شوف لك حرمه تجيب عيال
اخر موقف اليوم بطلع العصر البحر بشم هوا واغير جو وتكون ساعة استجابه ابغى ادعي وافضفض في مكان احس اني مرتاحه فيه
اتصلت تقول بتجي عندي لانها ضايقه قلت لزوجي خذها معانا البحر تشم هوا
ياليتني ماقلت طول الجلسه فلانه عندها عيال وخواتي ثنتين تزوجوا معي وماشاء الله حملو بنفس الشهر وولدو بنفس الشهر تعيرني فيهم عند زوجي
شوفي خواتك عندهم عيال
وهذا باقي لاصق فيك مثل الخروف ماراح يدور له حرمه تجيب عيال
طيب حرام انا ايش ذنبي 💔 ربي كاتب عليه اتاخر
وقالت بقولك شي ولو تزعلي بكيفك انا ابغى ازوج ابني بشوف عياله
فيه اصغر منه وعندهم عيال يصبر عليك لين متى
انا بكيت وزوجي عصب وقال انا مرتاح في حياتي خلوني فكوني من سالفة الزوجه الثانيه
انا انجرحت كثير لاني قبل يومين راجعت وكان اخر حل اطفال انابيب
قلت بستعين بالله وبسويها من غير احد يعرف
لكن نفسيتي تعبانه تعبانه تعبانه
وحاليا الوضع مايسمح من جميع الجهات
احتاج وقت علشان اصحى من الم قلبي انا موجوعه ومهمومه ومافي احد يعلم بلي في قلبي غير ربنا
حتى امي ماعلمتها علشان ماتقلق وتحزن وامي تعبانه وكفايه عليها كل يوم تتصل عليها ام زوجي تقولها شوفي حل مع بنتك ليش ماتحمل
امي تسالني اقولها باقي الله ماكتب
انا تعبت من حياتي معاهم
امه كل ماشافتني وشافت زوجي قالت سالفة الزوجه الثانيه
انا عارفه ان زوجي يحبني وهو قال لامه مستحيل يتخلى عني ويفكر في الزوجه الثانيه
لكن امه تزن عليه وكثر الطق يفك اللحام ياناس
يابنات قلت لزوجي بصراحه امك ضايقتني بكلامها وهو عارف انها تقصد تضايقني
قال بيكلمها في الموضوع منعته وحلفته بالله لانها لو عرفت راح تزيد العيار وانا قلبي مايتحمل خلاص
انا مو ضعيفة شخصيه ولكن قلبي ماعد يتحمل جروح
الموضوع حساس انا اشوف ان سالفة الاطفال والزوجه الثانيه موضوع مؤلم جدا وجرح كبير
حسبي الله ونعم الوكيل 💔