انا رجعت

السلام عليكم يا بنات المنتدى

والله وحشتوني واشتقت للمنتدى ...!

انا رجعت بعد اجازه الولاده وخليت البنوته في البيت وقلبي ياكلني عليها ...

عاد ابا احكيلكم عن ولادتي المستشفى طبعا عطوني موعد الولاده 21/12/2004 وانا ما ولدت في هاليوم وعطوني موعد للطلق الصناعي وزوجي رفض ..!! ونفسيتي تعبت من الانتظار وفي يوم وفي ليله ما فيها ضو قمر على قولة المصريين حسيت بالم خفيف اللي هو شبه الم الدوره مغص في بطني وكان الفجر واحس وكاني ابا اروح الحمام وقمت من النوم الساعه 4 ونص الفجر في ليله بارده موت واول ما وقفت على ريولي والا الاقي الماي كله نزل واختي كانت نايمه معاي لاني كنت في بيت اهلي ..!! وصحيتها من النوم وقلتلها نادي امي ..!! امي مسكينه انخطف لونها وابوي يوم شافني بعد انخطف لونه خافوا على مع اني ما كان فيني اي شي بس الماي نزل ودخلت الحمام وتسبحت وغيرت ملابس وقعدت مع امي وابوي واختي وما كان فيني وجع ابدا !! وقعدت ا مشي وامشي وامشي وبدا شوي شوي الوجع بس خفيف مش وايد وامشي وامشي وامشي وشربت فنجان قرفه و5 حبات تمر بس وامشي وامشي وشوي شوي زاد الوجع وصار بين الوجع والثاني وبين الطلقه والثانيه 5 دقايق واحيانا اقل فرحت المستشفى الساعه 11 الصبح وكشفت على الممرضه وقالتلي الرحم فاتح 5 سم شدي حيلج عشان تخلصين وبحمد من الله والتيسير من الله ولدت على اذان العصر ويبت بنوته حلوه حلووووووووووووووووووووووووووه وسميتها فاطمه ...!! واي قلبي يعورني لاني خليتها ورجعت الدوام عنها ..!! والصراحه الولاده وايد حلوه