انا صح ولا غلط ساعدوني ... الله يرحم والدينكم

بسم الله الرحمن الرحيم ..

السلام عليكم ورحمة الله وبركاته ..

والله يا بنات حابه استشيركم او بالاصح حابه اعرف انا غلطانه ولا لا .. ادري انه فيكم متعلمات ومثقفات وعقول ماشاء الله يوزن بلد .. وهالشي اللي ابي استشيركم فيه .. قبل لا اتخذ القرار .. اتخذت اجراءات عديده .. و كلمت واستشرت الاكبر والاعلم مني .. بس ابي حد يمسك ايدي ويقول انتي صح علشان اوقف على ريلي واثبت في مكاني ..

انا يا بنات عندي ولد .. ماشاء الله عليه حركي .. من هو كان صغير حركي .. ومزعج لدرجه ساعات مب دايما لدرجه اني امسك نفسي ما اضربه .. وساعات ينضرب ينضرب .. عمره الحين 10 سنوات لما كان اصغر بالروضه كان حركاته وتصرفاته لا تطاق وكنت ما اطيقه ابدا واكثر الاوقات ينضرب .. ومع هذا كنت وايد احضنه باليوم الف مره .. وكنت يوم اكلمه يقتنع بكلامي واقوله قصص وكل شي .. بس اول ما يحط رجله برع البيت خلااااااااااااص ينسى كل الكلام وما يسمع اي شي بس ينطلق ويركض ويزعج ويخرب ويكسر ... الخ .. يعني مثل الطير عطيتيه حريته انطلق .. وبما ان ام زوجي واهل زوجي ساكنين حولي يعني جيراني فكنت علشان ما يشتكون عليه ما اخليه يطلع بره وايد .. ويا العب معاه او يشوف تلفزيون يعني بالبيت كان هادي اكثر من بره .. وبحكم انه كان بالمدرسه فكان ينام بدري .. لكن هو حركي يعني معروف بحركته .. فاذا طلعنا عند حد من البيت اقعد انبهه احنا بنطلع ترى انا براقبك واذا سمعت الكلام بشتريلك واذا ما سمعت بتتعاقب .. الخ .. ويقول اوكي ويكون قمه بالادب . بس افتح باب البيت خلاااااااااااااااااص ينسى كل الكلام ويضرب هذا وينقز على هذاك ويكسر هذا ويلعب بهذاك .. يعني اقول ياريتني ما طلعت ..

بس انا عن نفسي اشوفه طبيعي مثل كل الاولاد المشاغبين ..

المهم يت مره ام ريلي وتقول لي هذا ولدج لازم اتودينه الدكتور يعطيه مهديء .. يعطيه ادويه .. ما يعرف يتصرف وكله يتحرك وبالاخير لازم تضربونه عشان يسكت وبعد ما يسكت .. الخ ...

وكل فتره وفتره جارتي الثانيه نفس الكلام قالت لي بالحرف الواحد انا لو ها ولدي لازم اوديه الدكتور ويعطيه ادويه .. وقلت لها بذمتج لو ولدج بتعطينه دواء مهديء .. قالت لي ايه بعطيه .. وان شاء الله الله يبليها بواحد مثله وبشوف بتعطيه ولا لا ... لا حول ولا قوة الا بالله ..
طبعا يمكن البعض منكم يشوف هالشي عادي .. والادويه شي عادي .. وانا رحت سويت سيرج بالغوغل وشفت مقالات عن الادويه اللي يعطونه للحركيين ولقلة التركيز .. وشفت مقالات عن ان هالادويه اغلبها مضادات اكتئاب وانه يمكن يعالج شي ويخرب شي ثاني .. يعني ممكن يعالج قلة التركيز والحركه عنده ولكن ممكن يجيب له امراض مثل الكلى والكبد ...
وقررت استشير مدرساته .. وكل ما كلمت حد قالي ابنك مش لهالدرجه علشان تعطينه ادويه .. هو عادي ها طبيعته وتقبليه مثل ما هو ..

واخذته عند استشاري نفسي وكلمه وقعد معاه واختبره ونصحني نحن عليه ونحبه اكثر واهتم فيه وناخذه للنادي عشان يفرغ طاقته وهو مش محتاج ادويه حسب خبرته و حسب الاختبارات اللي اجراه عليه .. وقالي ابنك لما طلبت منه يقعد يرسم قعد .. بس فيه اولاد لما نطلب منهم يقعدون ما يقدرون يقعدون دقيقه ...

وعلى كده اتفقت انا وابوه انه مافي داعي للادويه وسجلناه بالنادي ومازال حركي بس حركته قلت عن اول بكثير .. لكن مازال اذا خرج انطلق يعني اذا رحنا لحد ينسى كل النصائح والادب والاحترام ويركض ويزعج اللي اصغر منه وما يسمع الكلاااااااااااام ابدا .. لكن اهدا واركز عن اول .. عن لما كان بعمر 7 و 8 سنوات

المهم انه ام ريلي رجعت وفتحت موضوع الادويه .. ومع انها تعرف اني كلمت استشاري الا انها مصره انه ما يفهم شي وانه محتاج ادويه .. هالمره انا بينت لها اني ما احب هالكلام واني كلمت استشاري وكلمت مدرسينه ومافي ولا واحد منهم نصحني بالادويه او حتى لمح انه محتاج لمهديء ..

المهم .. انا صح ولا غلط .. اشوف دكتور ثاني .. ولا ها عادي وعيالكم مثل ولدي هذا .. ولا صج هالولد مب طبيعي .. :44::icon33: