انا عايشه ولا لي وجوود ..😓😓

السلام عليكم
انا متزوجه صار لي سنواات .. غير موظفه حياتي جداً ممله .. عندي اولاد طبعاً زوجي يومه كله تقريباً بره البيت طول يومه مشغووول وانا في البيت بين ازعاج اولادي وضغوطاتي .. انتظره بس يجي وياكل ويطلع وهكذا طوول اليوم .. واليوم الي بطلع فيه يقولي مثلا الساعه ٤ يجي ياخذني ولا يجي الا يمكن ١٠بالليل الاتقريباً المحلات خلاص بتسكر وفوق هذا الاحساس اني طول الوقت احسب وقتي على مايجي وبعدين يجي متأخر مرره .. هو رجل اعمال وعارفه عنده شغل لكن مو مخصص لي شي ابداً .. وحتى الي نفسي فيه يتأجل حتى البيت بكيفه صممه ولا اهتم برائي مع اني انا الي طول اليوم جالسه فيه .. هو يفضلني جالسه بالبيت .. للعلم ان اهلنا في منطقه بعييده ..ولا عندي صديقاتي كثير .. زوجي اي شي ابيه لابد يفرض راييه ويكرهني فيه انا من النوع الي اذا صار هذره في شي نفسي فيه اكرهه لكني اتضايق اني انحرمت من الشي الي نفسي فيه ..مثلا كان نفسي في صالون نسائي يبني في جزأ من البيت عشان نوفر الايجار ماسوا وبالعكس سوا البيت بمزاجه .. كان نفسي اتعلم اسوق صار يحبطني ويقهرني يقولي شنو تبين بالسواقه وانا غير موظفه ؟ طيب نفسي مرره اتعلم من قبل لا يطلع القرار وانا نفسي اسوق .. نفسي على الاقل اذا بغيت اطلع اسوق مانتظره بالساعات لين يجي والا خلاص ماحد فاتح مابي اكون مقيده ومادري الشعور جميل اني اسوي شي .. كل مره اتكلم معاه يقولي الحريم يتعلمون عشانهم موظفات انتي ليه تتعلمين ؟ واقوله شنو بداخلي مع ان يحبطني مرره لانه هو السبب اني ماصرت موظفه وصارت حياتي البيت والتربيه والطبخ وبس ولما حاول يعلمني صار يصارخ في السياره ويقولي انتي بتسوين حادث يصاارخ يعني شي يقهر ليه طيب انا توني اتعلم حتى مو عاطيني فرصه استوعب الي بالسياره على طول يبيني اسوق وباحتراف ..طفشت كرهني بكل شي .. حتى لما نطلع وهذا ناادرا ويصادف امسك جوالي بصور يعلق ويقولي لا تصورين ماله داعي تركي الجوال .. لما يكون موجود وامسك جوالي وهو اصلا مشغول يشاهد شي ماحبه ..نفس الشي يقولي تركي الجوال ..قبل النوم احب اقرأ وهو الوقت الوحيد الي احس بالهدوء لان اوولادي نايمين نفس الشي مايبي انشغل بشي يبي اسوي له مساج وبس .. يعني انا ولااا شي انا فقط لراحته للطبخ للتربيه للمساج .. معقوول الحياه الزوجيه الطبيعيه كذا ؟ حتى لما يشوفني انشغل بالجوال او قراءه يقولي، قوومي شوفي مطبخك اهتمي بالبيت !! طيب انا قاايمه بكل شي على اكمل وجه مو من حقي ارتاح ؟ امارس هوايه ؟ انا ماضل شي اصلا لي كل شي يسكره بوجهي زوجي مسبب لي احبااط كبييير لدرجة صرت ماعندي ثقه بنفسي .. ماطلع ماشوف احد الا ناادراً ماعندي شي احبه الا يكرهني فيه وكل شي ممنوع .. باختصار انا ميته وانا حيه ..مالي وجود مع انه كل انجازاته بفضل صبري وتحملي عليه طول هالسنين .. انا ماأنجزت شي سوا اني اطبخ واربي ..ولما يكون موجود اذا اولادي ( صغار ) يسوون ازعاج يعصب علي انا يقولي سكتيهم وانا متعمده اني اسكت عنهم ابي ارتاح وهو يقوم بشوي لو بسيط من الي انا قايمه فيه .. واذا عصبت عليهم يعصب يقولي انا موجود لا ترفعين صوتك .. ودايم يستصغر دوري بعد لما اقوله تعبت من ضغوطاتي مع اولادي وازعاجهم وطلباتهم يقولي انتي قاعده مرتاحه ماعندك شي .. تعبببت والله خلااص لمتى بضل كذا مقيده فيه كل شي ممنوع .. كل شي اتحاسب عليه .. لاا طلعات ولا سفر ولا هوايه امارسها ولااا شي ويقولي انتي مرتاحه !!