انا في حيرة من امري

السلام عليكم ورحمة الله وبركاته
انا مشكلتي مع زوجي صار لي من تزوجته خمس سنين وخمس شهور والله ما كتب لنا الى الان اطفال
حياتنا مثل اي حياة يوم حلو يوم مر
ونحاول اننا نعيش حياتنا بسعادة لكن للاسف السنتين الاخيرات لاحظت بعد كبير بيننا بدرجة تعبتني كثير
تقريبا كل واحد عايش بروحه واحنا في بيت واحد
حاولت اقرب منه وكل ما قربت كل ما بعد هو مني لحد ما جاء اليوم اللي صرت انا نفسي ما اقدر اقررب ولا اتقبله بس مع ذلك ما ارضى عليه وابي حياتنا تستقر
الف مره فكرت بالطلاق بس خايفه من هذا القرار
الايام الاخيرة لاحظت انه على علاقة مع بنت من جنسية خليجيه غير جنسيتنا
وكل يوم يكلمها اما بالتلفون رغم مصاريف المكالمات الدوليه او بالماسنجر
والاحظ ان علاقتهم تقوى يوم عن يوم
انا اكتشفت بالصدفه
وهو ما عنده خبر اني عرفت بالسالفه
وانا مابيه يدري لاني مابي ردة فعلي تكون عاديه
يعني انا ماشيه على سياسة .. من الذكاء ان تكون غبيا بعض الوقت ...
والاحظ انه صار قد ما يقدر يبي يرضيني علشان يغطي على اللي صاير بس انا نفسيتي صارت زي الزفت ما صرت اتقبله ولا ابيه يلاحظ اني فاهمه شي على الاقل مؤقتا لحد ما اعرف اتصرف
كلمت اختي قالت انتي ما عندك عيال علشان نقول تصبرين علشانهم والمسألة مو مسألة غيره المسألة صارت مسألة كرامة ولا تسكتين على وضعك حتى لو تطلقتي
وانا الحيرة ذابحتني حتى دراستي ما صار لي خلق عليها لان وضعي مو مستقر مع انها اخر سنة بالكليه والمفروض اشد حيلي واحاول انجح واتخرج تحسبا للظروف
اتمنى اي وحده منكم تساعدني بنصيحه او مشورة او رأي
على الاقل ساعدوني على التفكير السليم علشان ما اخسر حياتي
وفي النهاية ابي اللي في مصلحتي هل استمر والا انسحب بهدوء؟
ولكم مني جزيل الشكر لاني محتاجه دعمكم المعنوي لي