انا في خوف وقلق مايعلمه الا الله

السلام عليكم ورحمة الله وبركاته
مسائكم خير يارب وتفريج للهموم والكروب
انا متابعه قديمه للمنتدى  واتردد دايم لها القسم
وسجلت اليوم لحاجتي لكم وللفضفصه 
ويعلم الله احس انكم خواتي في تجمعكم الجديد اقرا وابكي للي حملت وادعي الله يثبته واللي فشلت عمليتها ادعي ان الله يرزقها الصبر والرضا بالمكتوب


انا متزوجه من 13 سنه عمري 31
عندي موانع الحمل هرمون حليب ورحم ذو قرنين
زوجي عنده الحركه شوي ضعيفه 
كان رافض فكره الانجاب المساعد الين الله هداه ووافق
استخرنا الله وتوجهنا لمركز بنون بالرياض
الدكتور عبدالعزيز الشهراني
رحت له الشهر اللي فات شهر4 وجلسنا معاه جلسه مطوله نشرح له
 وضعنا وجبنا معنا بعض التحاليل القديمه واشعه الصبغه اللي سويتها
توصلنا للتلقيح المجهري
اعطاني حبوب حامض الفوليك
وسويت تحليل هرمون حليب واعطاني حبوب
ما اعطاني بيبي اسبرين اطلبه يعني والا كيف
 اللي فهمته انه مهم للتجلطات  وثبات الاجنه

وموعدنا ثاني يوم الدوره ومعي اشعة الصبغه سي دي
 لان اللي جبتها نتيجه مكتوبه وهو محتاج يشوفها فديو مدري صور
المستشفى  اللي سويت صبغه قالو النظام القديم انحذف بكل اللي فيه
فقلت مافيه مشكله  بعيد الصبغه عند بنون
رحت هالشهر 5 ثاني يوم الدوره 
سويت سونار وقالو ذو قرنين قال ما اتأكد الا بالصبغه
او عملية منظار رحمي
 توكلنا على الله وقررنا نسوي منظار
وقال بعد المنظار دايركت نبدا برنامجنا
وموعدي الخميس ان شا الله وانا خايفه بنج كامل وانا
مو من اهل الرياض ومن امس مو قادره انام 
ومدري اطلع وعادي اقدر اسافر ع طول للشرقيه او لازم راحه


بنفس الوقت عندي اسئله عن التلقيح يعني كم مدته
اقدر ابدا من بعد دورتي بشهر 6 ويتم الترجيع قبل دورتي بشهر 7
والا الموضوع يطول ويقعد له ثلاث شهور مواعيد وروحات وجيات 
وكم المده اللي المفروض اجلسها بالرياض من وقت السحب للترجيع


انا مالي الا الله ثم انتم محد يدري ابد من اهلنا او من الجيران والاصحاب
ولقيت فيكم الخوات اللي قلوبهم على بعض ويكفي اننا نتشارك نفس الهم وحاسين بمعاناة بعض
لجأت لكم بعد الله طالبة دعواتكم والرد على اسئلتي 
تكفووووون فرجو عني لو بدعوه