انا كشخه وانيقه لبسي كله ماركات

مساء الورد صبايا
فيه موضوع يقرقع في قلبي من زمان وهو الماركات صراحه هالشي زاد عن حده في مجتمعنا صارت اللي تلبس وتلبس عيالها ماركات هي الكشخه واللي تشتري من المحلات العاديه حتى لو لبسها انيق بتصير هيلقيه ومو كشخه !!!!
قبل فتره يسولفون يقولون فلانه كشخه لبسها كله ماركات ! عفوا حبيبتي ترا مو شرط ممكن اللبس هيلقي والالوان تفشل مو شرط ماركه يعني واااو خصوصا بعض الماركات تصاميمهم سيئه زي بربري قماش مطبع فيه خطوط وب الف والفين واللي تشتريه لبنتها وتغث اومنا بالسناب كل شوي مصوره هالفستان يعني شوفوني انا الكشخه الانيقه ترا مو كشخه والله فستان يفشل وكأن ماعند بنتها الا هو كل شوي مصوره هالبنيه وهي لابسته !!!! ترا ممكن جدا اكون انيقه وكشخه بملابس عاديه اهم شي الذوق
ولا اللي تشتري شنطه بخمسه وسته وهي ماعندها شي راتب زوجها على قدهم سلامات !!!!!!!
الحين بيجون المدرعمات يقولون يختي ربي منعم عليهم وش لك انتي ؟ انا كلامي وموضوعي عن اللي يشوفون الماركات كشخه حتى لو التصميم خايس خلاص اهم شي ماركه ماركه وعن اللي حالتهم الماديه متواضعه وتهلك عمرها بهالماركات وتدين وش اللي حادك يختي ! وكله كوم واللي تلبس تقليد كوم ثاني معليش يعني انتي اثبتي انه همك وغايتك تلبسين ماركه حتى لو تقليد !!! ولا الحين الهبه الجديده اساور كارتييه و فان كليف واسعارها فوق العشرين الف وتصميمها عادي ومافيها اي شي مميز سوى انها هاي براند !!!! والله اسواق الذهب عندهم تصاميم واشكال احلى بكثير من هالكارتييه والفان كليف ابو ورده
ارجع واقول مااعترض على اللي تشتري من حر مالها بدون ماتكلف على نفسها اعتراضي على مفهوم الاناقه في مجتمعاتنا واللي انحصر بالماركات فقط وعن اللي ترهق زوجها وابوها عشان بس تشتري شنطه قوتشي ولا ديور وعشان المجتمع يحبها والكل يصادقها لا تستغربون فعلا في الجامعه لما كنت ادرس كانو البنات نفسهم يتعرفون على فلانه ليش مو عشان اخلاقها ولا ثقافتها ولا روحها الحلوه يبون يتعرفون عليها عشان لبسها غالي ومااركات ههههههه والله جد
اتمنى تبدون رأيكم وتناقشون بدون سب حبيباتي ...........