انا لله وانا اليه راجعون .. فجعتني فيك

السلام عليكم ورحمة الله وبركاته

باختصار الانسان اللي حبه قرب يوصل لحب امي وابوي
واللي كان أعطف وأحن علي منهم واللي ما كنت اشوفه بالسنه الا شهر واحد بس
راااح
رااح بعد ما ودعنا وهو يقول صدقوني بموت قريب ونحن نضحك على كلامه
ما كان يقدر ينام لا الليل ولا النهار
اجي له بالليل اشوفه قاعد يناظر السقف وزهقان صايبنه الارق
واروح له الصبح القاه قاعد بالليوان يتأمل السما ولما اجي يسولف معاي لين ما اروح عنه
كان يحس بالضيييق

سافر وجانا خبر وفاته بعد وصوله بساعات

والله ان في قلبي غصه كبيره ما أقدر اعبر عنها لكم

أحب الناس لقلبي واحنهم علي وأغلى من كل الغوالي
ببساطه راح عني للابد وهو بعده صغير

شال من الهموم والتعب اللي يكفيه .. ماحس بطعم السعاده طول عمره
الناس استغلته بدرجه كبيره وهو كرس حياته عشان غيره
اهمل علاجه علشان عياله وفقد بنته الوحيده قبل سنين وصارت الدنيا في عينه فرااغ

يا ربي هالانسان ما اقدر اوصف لكم اياه لكني ما ابالغ لو قلت لكم انه احن واطيب قلب في الدنيا
حتى طيبته وصلت لحد السذاااجه اي واحد يقدر يخدعه ويخليه يطلع كل الفلوس اللي عنده لمجرد انه يحس ان فيه احد يحتاجه

يالله مصيبتنا فيه كبيره
والله مب مصدقه والله مب عارفه شو اقول
والله اني جربت الوداع قبل وايد وطعمه مر مر مر لكن المره هاذي أمر وأمر وأمر
والله اني مشتاقه له من الحين ومب فاهمه كيف يعني رااااح ولا بيرجع

خالي حبيبي اخو امي الوحيد فديته والله اني مب قادره أتخيل حياتي من غيره
خذ رقمي الجديد قبل لا يسافر وقال بتصل فيج فديته من بيتصل الحين
قال لي ابي اشوف بيتج وانا تعايزت بسبب الجامعه وقلت في نفسي مب مشكله السنه الجايه لما بيزورنا باخذه لبيتي بس متى تجي هالسنه علشان اخذه لبيتي

هاذي هي اول مره ما اودعه فيها قبل ما يسافر لاني انشغلت عنه بحفلة ولد اخت زوجي وياليتني ما انشغلت

مستحيل انسى اخر كلامه لي لما دقيت عليه قبل موعد رحلته بدقايق

قال لي يا فلانه امس وانتي طالعه مع ولدج بالليل قعدت اناديج واصوت عليج ابي اودعج قبل ما اسافر بس انتي ما سمعتيني ولا صديتي صوبي

يا ربي والله ما سمعته والله ما حسيت فيه والله ان في قلبي غصه كيف ما ودعته الوداع الاخير وكيف مارحت له وحبيته على راسه وما قعدت اسولف معاه طول ذاك اليوم

كان قاعد بروحه مع امي ملان وزهقان ما عنده احد وانا مشغوله بالحفله عنه
فديتك يا خالي والله لو يرجع الزمن ما تركتك لحظه

من لحظة ما سافر وانا في قلبي غصه كله لاني ما وادعته وبعد ما توفى اليوم اللي بعده زادت الغصه اكثر واكثر
فديتك يا خالي رحت قبل لا اودعك والا احبك على راسك
كنت تحبني أكثر من حبك لعيالك وكنت تكره تشوفني ضايقه لو دقايق
وانا ما كنت اشوف غيرك بعد امي وابوي

مفجوعه فيه يا بنات والله للحين مب عارفه كيف هو مات ولا مصدقه
انا الحمدلله مؤمنه بقضاء الله وقدره لكني والله مب فاهمه كيف مات وخلانا
امي تعبانه وكل اخواني متأثرين .. كيف وهو قبل ساعات كان عندنا
فديتك يا خالي
والله مادري شو اكتب لكم بس ارجوكم ادعوا له في القبر
ادعوا له بالرحمه والمغفرة وادعوا له بالجنه

تكفون والله ان الدنيا ضايقه فيني واحساسي مزيج من التبلد والالم

الله يحفظ لكم كل غالي ولا يراويكم هاليوم امين