الله يهديك و يشرح قلبك للصلاة

يا اختي احل شي في موضوعج انج متأثرة وحاسه بتأنيب الضمير وهذه هي البداية

اختي العزيزة لا تجبرين عمرج على كل الصلوات مرة وحده ابدي بصلاة وحده بس باليوم باي وقت تحسين عمرج مرتاحه فيه نفسيا فلنقول مثلا صلاة العصر وداومي فقط على صلاتها سبع ايام متواصلة بدون اي فاصل بينهم اذا حدث لا سمح الله وقطعتي التواصل ردي مرة ثانية واحسبي لعمرج 7 ايام من اول ويديد

بعد السبع ايام اضيفي صلاة اخرى مثلا المغرب وواصلي عليها مع صلاة العصر بدون انقطاع وهكذا

كل سبع ايام اضيفي صلاة لصلواتج لحد ما توصلين لخمس صلوات يوميا

هذا يسمى برمجة العقل وهو اسلوب ناجح لابتداع اي سلوك ناجح نتمنى اضافته لنا

واذا عندج اي استفسار زياده سأكون اكثر من سعيدة للتواصل معاج على الخاص

عزيزتي ارجع واقول احلى شي بموضوعج هو شعورج بالتقصير...معناه انه الله يحبج عزيزتي و يبيج تشدين على نفسج شوي وتصلين

واتمنى لج كل خير حبيبتي

اختج
منارة

أنا أعرف ناس شخصيا كانوا من سن الإبتدائي إلى المتوسط وهم بس يبون يصلون والبنت يجيها فترة تتوب هذا وهي حتى مابعد بلغت تتوب وتتروش وتتشهد وتصلي ركعتين "مامن عبد يفعل معصيه..... بعدين تصلي تقعد فترة وترجع بعدين تتوب مره ثانيه ...وهكذا كان إلتزامها ودخولها في الإسلام من جديد في مرة على وقت صيام تطوعي هي صامته والله أعانها ربي هذا شيء إذا رأيتي أنك تتركين وترجعين لا تيأسين أستمري بالتوبة والشهادة وأول ما تصلين بعد التوبة أدعي أدعي الله يثبتك على الصلاة..وحاولي تصومين ذاك اليوم وبس أدعي خاصة عند الفطور ترى يجوز تصومين أي يوم بس عدا الجمعه لا تفردينه بالصوم طيب وشغلة ثانية هيئي لك مكان في الغرفة للصلاة وأسمعي أشرطة عن الصلاة..والله يردك ويجعلك من المصليات القانتات يارب ما تنقبض روحك إلا وربي راضي عنك ..وعلى فكرة الليي تكلمت عنهم فوق هالحين هم حريم والله يصلح لهم ذريتهم وماشاء الله محافظين على الصلوات بوقتها..الله يثبتهم ويزيدهم ولا يحرمنا فضله

الله يهديك واتمنى ان الاخوات يفيدونك

أنا كنت أعرف وحدة مثلج
أعرفها عز المعرفة
والله إنها طيبة... وتخاف الله وتنصح
وتبتعد عن الحرام اللي بعض البنات ما يقدرن يستعنن عنه
من أغاني وحف وحاجات ما لها معنى،
ما كانت لاهية بالدنيا، وتخاف ربها... وتعمل حساب لكل شي تعمله
أو تبغي تسويه!!!! بس ما أعرف شو أقول
سبحان الله
كانت لما تقوم تبغي تصلي كأنه أحد يمسكها من كتفها ويقول مب لازم
ولما أمها تقول قومي صلي... تدخل الغرفة وتسكر على نفسها الباب 5 دقايق
وتطلع على أساس إنها مصلية
تستغر وتسبح وتذكر ربها... وتنصح أخواتها
بس للأسف كانت تاركة الصلاة... لا حول ولا قوة إلا بالله

بس هي أحينة ما شاء الله
تصلي وكل شي ولله الحمد وتحاول تواضب في الصلوات
تدرين كيف

كانت تشجع نفسها
وتحبط الشيطان أو الإبليس!!!!!

أول ما تصحى الفجر، إذا غلبها النوم أو حاول يغلبها
تقول... يا الشيطان... تبغي تبول في إذني!!!!!!!
تيغي توسخني بقذارتك... لا والله... أنا بقوم وبتوضى وبغسل أذني زييييييييين

بعد ما تخلص تصلي الفجر
تجلس مع نفسها وتقول
الحمد لله إني صليت الفجر
لو كنت ما مصلية... كان بألقى في القبر من يشق راسي
وأنا أتألم بلا نهاية... الحمد لله يا رب

ولما تجي على صلاة الظهر تتكاسل
بس كأنها تتحاور مع الإبليس
أنا الحمد لله صليت الفجر وإن شاء الله ربي تقبل
تبغي انت تضيع علي صلاة الظهر
ليش!!!!!!!!!!
على بالك راح أسمع لك كلامك
وأعصي أرحم الراحمين
كفاية إنك أصلا تتبرى من كل أفعالي السيئة يوم القيامة
يعني ما راح تفيدني
وعنادا فيك أنا قايمة أصلي الظهر
وتصلي الظهر

بعد ما تخلص تصلي الظهر تقول الحمد لله
أنا صليت الفجر وما ضيعت على نفسي وصليت الظهر
وإن شاء الله ربي يتقبلني
وتوجه كلامها لرب العالمين
يا الله... ثبتني... ثبتني على الصراط المستقيم يا رب

ولما يجي على صلاة العصر تقول
أحينة وصل نص اليوم
لأني يكون بين 4 صلوات
2 صلتهن وباقي 2
وإن شاء الله إذا صليت العصر

راح أرتاح نفسيا... وراح أنتظر المغرب بفارغ الصبر
لأن المغرب لحظة حلوة... لحظة حلوة للصلاة والتأمل بعد الصلاة وللإستغفار
يكون في سكون نفسي ووجداني ... سبحان الله

وعاد على صلاة العشاء كانت تتشجع
تقول أنا صليت كل الصلوات اليوم ولله الحمد
وإن شاء الله ربي يتقبل مني
وتقول... بصلي العشاء
عشان لما أحط راسي على المخدة... بنام مطمئنة
مب خايفة ربي يآخذ أمانته - وأموت - وأنا ما مصلية

بعد صلاة العشاء
كانت تحاسب نفسها
وتلقى إنها طول اليوم كانت مرتاحة
ما صار مشكلة ولا صار شي
نفسيتها هاااااادية وتحس بالسكينة
وتحاسب نفسها قبل لا تنام

تدرين شو كان السر

أنا بقول لج
الحوار... أو التحدث إلى
الحوار:- كانت تحس إنها تتحاور ويا الإبليس <<< على أساس إنه عدوها
انتي لما تتحاورين مع شخص ما مقتنعة فيه، تعرفين إنه يسوي شي غلط
ما تحاولين بقدر الإمكان تجيبي أدلة وبراهين لتثبتي وجهة نظرج
نفس الأسلوب استخدمته ويا الإبليس
حطت في بالها إنه غلط
وإن الدين والشرع والأحكام هي الصح
فعاندت الإبليس كلما يحاول يغريها ويلهيها
تصد عنه وتقول انت أصلا خطأ... انت أصلا عدوي
عدوي انت... كيف بتبغى الخير لي

التحدث إلى:- كانت تحس نفسها إنها تكلم ربها
كانت تحس نفسها - وما زالت تعيش هالإحساس - إنها لما تصلي
ربها يكون معها... معها هي وبس
يسمع لها دعائها.. يسمع لها ندائها
يفرح بسجودها.. يفتخر بأعمالها الصالحة
كانت تجلس بينها وبين نفسها وتقول
أحيانا أحس إن مافي أحد في الكون غيري
وإن الله يراقبني أنا بس

مثال أختي
لو كنتي بالدوام
ومديرج على راسج
بتقدري تلعبي من غير ما تخلصين شغلج
بتقدري تفتحين النت تتصفحين فيه!!!!!!!!!!
أكيد لأ

مثال آخر
لو كنت بالإختبار
والمدرسة واقفة على راسج
بتقدري تلفين يمين وشمال تبغي تغشين
بتقدري تطلعي ورقة أو برشومة تغشين منها
أكيد لأ

فما بالج باللي خلقج
باللي ما فوق راسج وبس!!!!! فوق الكون كله على عرشه جل وعلا
حاولي لما تتكاسلين في الصلاة تفكرين فيه
إنه يشوفج... يراقبج... ويشوف إنج ماتصلين
بس من غير عذر... شو عذرج... ليش ما تصلي؟؟ شو بتسوي بدل الصلاة
شو الشي اللي بتضيعين دقايق الصلاة فيه!!!!!!!!!

أختي
حاولي تتبعي الخطة اللي خبرتج عنها
وإن شاء الله ربي راح يثبتج
دايما حطي في بالج إن الله فوق
ويراقب كل شي تسوينه... ورحمته وسعت الدنيا... بس غضبه كبير، عسانا ما ننال غضب رب العالمين


أنا قلت لج عن تجربة عشتها شخصيا مع البنت
والله على ما أقول شهيد