انا : متخوفة من الحمل و مسؤولية الاطفال ، زوجي متحمس !!

السلام عليكم

انا لي سنة و شهرين تقريبا متزوجة

كنت استخدم حبوب منع الحمل و من شهرين بديت استخدم العد

يا بنات انا مرا متخوفة من الحمل و الولادة و الاطفال .. يعني شي مو سهل و مسؤولية كبيرة و شي يصير مربوط فيكي و بمصيرك طول العمر .. ماهي يوم يومين او حتى شهر .. يعني مثلا مو اذا طفشت منهم اوديهم عند امهم .. مافي .. انا امهم.. و العمر كله معاي .. مابي و لا احب يكونون الاطفال محور حياتي و شغلي الشاغل .. ماني مستعدة اتخلى عن حياتي و عن وقت فراغي و حريتي و سعادتي .. كيف يعدين اهتم بنفسي و بزوجي و ببيتي .. كيف اقدر اروح اتمشى و اسافر و اجي على كيفي مع زوجي ما نفكر باحد كل ما رنت ببالنا نسافر و لا نتمشى طلعنا..

و بعدين انا مو صاحبة بال طويل .. يعني مثلا ماتحمل الازعاج و احب الهدوء و ماحب الصوت العالي و الدفاشه .. اتنرفز على طول .. اتوقع لو اجيب اطفال بيجيني ضغط و سكر و قولون عصبي ..

الحين انا مابي اجيب حيوان و انتوا بكرامه بالبيت عشان ماهتم فيه و اشيل همه فمابالكم بطفل ؟

و اصلا انا مو من الناس اللي تهف قلوبهم ع الاطفال .، انا من بعيد لبعيد اوزع ابتسامات و بالكثير قرصت خدودهم و مشيت

و زوجي !! .. يالله يا زوجي .. يعور قلبي لا شفته يلاعب اطفال الناس و كيف يحن عليهم و نظراته لهم .. احس قلبه بيتقطع عشان يصير عنده بيبي .. بس والله مرا خايفه

ساعدوني يا ناس اقنعوني .. بس الله يخليكم كونوا صريحين معاي لا تضحكون علي .. لو كان شي متعب قولوا لي متعب لا تهونون الموضوع


مشكورين حبايبي يسعدكم ربي

قال رسول الله صلى الله عليه و سلم : "أثقل شيء في ميزان المؤمن خلق حسن ، إن الله يبغض الفاحش البذي "