انا محتارة و محتاجة مساعدتكم

يا بنات انا بجد محتارة و مش عارفه اسال مين اكيد كل الناس اللى هاعرفهم هيقولو لى انى باخد قرار غلط بس انا هافهمكو وجهة نظرى
اولا انا اتجوزت مع حماتى من 5 سنين
قعدت معاها سنتين بعدين علشان مرتحناش مع بعض اخدنا شقة قانون جديد و اخدنا فرشنا و رجعنا لها فرشها من مخزن كنا خزناه فيه وقت لما اتجوزنا

بعدين بالعشرة سنتين كمان قلت الخلافات و بقي الموضوع عادى مبقتش فيه كل الحساسيات اللى كانت موجودة

ومن سنة و نص جوزى عمل مشروع و للأسف خسر كل فلوسنا فيه و كمان استلف من امه و اخته اكتر من سبعين الف جنيه

واتطريت انى انزل الشغل علشان اساعده على قضاء الدين

كانت بنتى الصغيرة عمرها 10 شهور و التانيه سنتين و نص

و وقتها ربنا رزقنا بدادة تقعد مع البنات بس كان افضل حل اننا نرجع نعيش عند حماتى تانى علشان تكون موجودة مع البنات وانا فى الشغل لأن الدادت غير مامونين و كمان انا جوزى بيجي قبلى من الشغل ب 3 ساعات

الوضع ده مستمر من سنة
معلش انا طولت عليكو بس المساله ابتدت دلوقتى فرش حماتى ابتدى يتهلك اكتر و البنات شقاى و احتياجاتنا بقت مش نافعه مع الفرش اللى موجود و طبعا مافيش فرصه اننا نشترى حاجات جديدة
ففكرت انا وجوزى انناننقل الحاجات اللى احنا محتاجينها من شقتنا لبيت حماتى
البوتجاز لأن بوتجاز حماتى دايما فيه مشاكل
انتريه علشان الانتريه بتاعها خلاص خلصت مدة صلاحيته
المكتب
ودولاب البنات

يابنات انا مش عارفه اذا كان قرارى دا صح والا غلط
انا اوقات ببقي تعبانه من الشغل و طالع عينى و نفسي ارجع اقعد فى البيت تانى بس الجمعيات اللى دخلناها مستمرة 20 شهر ماعداش منهم 6 شهور و كمان لما يخلصو لسه هاندور على غيرهم لأن المبالغ كبيرة
و لو نفذنا خطوة النقل دى مش هينفع نرجع فيها يعنى لو قررنا نرجع بيتنا لازم نشترى حاجات جديدة مش ناخد حاجتنا
تفتكرو استحمل الوضع اللى احنا فيه و اخلينى محتفظة بحاجاتى والا انفذ قرارى و اريح نفسي و نفسيتى اللى باظت من البهدلة اللى انا عايشه فيها
يا بنات انا مش عارفه اعيش هدومى مرميه فى كرتونة تليفزيون و هدوم البنات فى مكتبه السرير و هدوم جوزى نصها فى رف الشفونيرة و نصها على سرير مامته
وكمان اخت جوزى جايه من امريكا الشهر اللى جاى و هتعيش معانا لمدة شهر طيب جوزى هينام فين ففكرنا فى نقل الانتريه علشان ممكن ينام على الكنبه
انا حتى مش عارفه احكى الكلام دا لأمى لأنها اولا هتزعل على حالى
و ثانيا هترفض لأن هاخسر حاجاتى وهى دايما عندها امل انى هارجع بيتى واترحم من البهدلة بس انا فقدت الامل ده حتى انا هاقدم لبنتي فى مدرسة قريبة من بيت حماتى

انا طلع عينى لغاية لما لقيت شغل وجوزى رغم انى بحبه بس مبقتش قادرة اعتمد عليه
فمش هاقدر اسيب شغلى
يا بنات يارب تبقو فهمتو المشكلة وتقدرو تدلونى