++ انا مدمنة عطور وفاقده حاسة الشم من 3 شهور!! ++

"اللهم لك الحمد كما ينبغي لجلال وجهك و عظيم سلطانك "

بنات الموضوع باين من عنوانه .. انا اموت ف شي اسمه عطور.. خاطري اتسبح بالعطور.. مدمنه على العطور بشكل مب طبيعي !

والحين من 3 شهور ما اشم.. واذا شميت العطر اتكون ريحته كريييييييهه.. !

لا ايروح بالكم بعيد مب حامل او اتوحم.. !!

اللي صار اني قبل هالشهور الثلاثه ياني زكام عادي.. حاله حال اي زكام .. التهاب بالحلق و الخشم يتسكر و صداع.. شفيت منه بعد اسبوع.. الا خمشي.. دوم مسكر.. لدرجه احس اني بختنق فلليل و ما اقدر انام.. بس مع ذلك ما رحت اعالج.. استخدمت قطرات الانف بشكل كبييييير لمدة اسبوعين..

المهم بعد الاسبوعين رد خشمي عادي.. ما عادا اني ما صرت اشم شي مووول..
و استمرت معاي الحاله.. انا عبالي عادي فتره و بيروح.. بعدها رحت عند اختصاصي انف و اذن و حنجره.. وكانت الصدمه...!!!

قالي كل شي فيج سليم.. بس انتي اصبتي بفايروس ضرب العصب عندج.. وقال في ناس صارلهم مثلج و تموا بالسنوات فاقدين حاسة الشم.. ومالج اي علاج.. الفايروس بروحه بيروح.. يمكن عقب يومين .. يمكن كم شهر.. و في ناس بالسنوات.. قاللي في واحد اعرفه بعد 5 سنوات استعاد حاسة الشم فجأه..!

طبعاً اصبت بإحباط.. تخيلي تنحرمين من هالنعمه.. و لفتره غير معلومه.. بس املي ف الله كبير.. :(

بعد كم اسبوع رجعت للدكتور.. و شرحت التطور ف حالتي و هو اني اشم كل شي ريحته خايسه.. نفس الريحه ما تتغير.. العطور الدخون كله نفس الريحه الخايسه..

و فسرلي انه العصب عندي ايلخبط بالاشارات.. بس هذا معناته انه في امل ارد اشم.. الحين كملت 3 شهور و بعدني على نفس الحال.. بس صرت اشم بشكل بسيط.. يعني العطر اشم جزء من ريحته على الريحه الكريهه اللي اشمها قبل..


نصيحه يابنات اللي تنزكم و خاصه اذا تسكر عليج خشمج روحي المستشفى على طووووووول و لا اتسوون مثلي..

الله يبعد عنكم الامراض.. والله اني اتعذب كل ما شفت العطوووووور,, بس الحمدلله على كل حال.. :(