انا مو حلوه شينه ودبه وسمراء

السلام عليكم بنات 




ليييه فيه مجموعة بنات متشائمات ويحطمون نفسهم ؟
ليه دايما نشوف عبارات ، انا شينه انا سمراء انا دبه انا وجهي فيه حبوب انا مو حلوه انا عاديه ، 




ليه تسمح الوحده لنفسها انه تقارن بينها وبين البنات المتزوجات ؟ 




انا اقصد اللي تأخر عليهم الزواج .. 




اول شيء حطو ببالكم مافيه بنت شينه بس فيه بنت مو واثقه بنفسها وتبين منكسره قدام الناس وفيه بنت ماتعرف تهتم بنفسها .. 




ترا كلنا نهتم لكن مو كلنا نعرف نهتم .. 




- سمينه !! انحفي حبيبتي سوي رجيم وامشي بالاسبوع 3 مرات نص ساعه .. 
- وجهك فيه حبوب !! روحي لدكتورة جلديه وتنصحك اما بكريم او بحبوب الروكتان وغيرها 
- شعرك خفيف وقصير !! اهتمي بزيوت شوفي الزيت اللي يناسبك او حناء او سدر مافيه احسن من هالشيئين 
- كملي دراستك ماعاد فيه شيء صعب انك تكملين 




- وااهم شيء ثقتك بنفسك ، ثقتكك ثقتكك 
حبي نفسك ودلعيها 
- روحك ، غذي روحك بالعبادات بالقرأن بالصلاه ، استرخي عشان روحك ترتاح 
وعقلك يرتاح 
-الحياه ماتوقف عند الزواج وعمر الزواج ماكان علاج لمشاكلنا او نهايتها ، بالعكس ممكن يكون بداية مشاكل وهم وقلق لاقدر الله 
ودايما نقراء عن مشاكلهم 
- ليه ماخذين ان تأخر الزواج بنظره سلبيه
خذيه بنظره ايجابيه ، وكل تأخيره فيها خيره 
بالدنيا او بالأخره ، اذا ماتزوجتي بالدنيا وصبرتي على فتن الدنيا وحافظتي على نفسك ربي بيعوضك بالأخره 
واصلا ايش هي حياتنا بالدنيا ؟ ماهي الا جسر نمر عليه لحياتنا بالأخره 
- جالسه عند اهلك ؟ حتى لو كلامهم مثل السم ، اطيعيهم وبريهم . شيليهم فوق راسك 
( رضا الله من رضا الوالدين ) 
وبالعكس قولي انا جالسه عند اهلي اكثر عشان ابرهم ، واعطيهم جزء من حقوقهم 
- لاتقارنين نفسك بالبنات المتزوجات وتشوفين حسناتهم وتكبرين عيوبك بعينك ، 
ترا حتى هم عندهم عيوب ، ومو كلهم حلوات 
مو كلهم مرتاحات ، مو كلهم سعيدات مثل ما انتي متصوره 
- غلطتي بالماضي لاتقولين بسبب غلطتي تأخر زواجي 
- خطك حلو ، ترسمين ، تخيطين تطزرين ، تصممين ، والخخخ من هالمواهب الحرفيه اللي صارو الناس يحبونها ، استثمريها وسوي لك مشروع ببيتك ، وانستقرام وهالمنتدى اعرضي اشغالك وبتجيك طلبات وكذا يصير مشروعك شيء تحبينه ويدخل لك مال 
كثير نشوف ، طباعه ع الاكواب ، تطريز اسماء ع الدفاتر والمخدات والمصاحف ، وغيرها اشياء كثير وجميله ، شوفي الناس ايش يحبون وانتي سويه واتجهي له ، 
- لاتفكرين بالزواج واذا حظرتي عرس لاتقولين متى اشوف نفسي عروس وانزف 
اذا شفتي العروس قولي ماشاء الله يارب اسعدها وسخر لها زوجها 
- كل يوم تفائلي انه يوم جميل وانه بيصير شيء حلو لك ، 
- اهتمي بلبسك وغيري اللوك ، والوان ملابسك وتسريحةة شعرك ، خلي وجهك بشوش عشان اللي يشوفم يحبك ومايقولون هذي مغروره ونفسيه 
- حبي نفسك الناس بيحبونك لو انك اشين وحده ع الارض ، 




( اعرف بنت جميله ماشاء الله ، بيضاء وجسمها حلو وتهتم بلبسها وكل من شافها قال واوووو تهبل ) 
تزوجت وعمرها 18 ، والحين عمرها 24 
عندها عيوب ماتتخيلونها ، تغار من اللي احلى منها ، ماتبي زوجها يشوف بنات ابدا 
تكبر المواضيع ، شكاكه ، ماعندها ثقه بنفسها ، وتبي بس تسافر ماتعرف تفكر بعقل واعي 
كانها طفله 
تدرون مو مرتاحه بحياتها ، والله كل شهرين زوجها يوديها بيت اهلها ، وتقعد عندهم 3 او 4 شهور مايدق ولا يرد ولا يسأل عليها 
مع ان زوجها محترم من النوع اللي تفكيره واعي 
يفكر انه يأمن مستقبله من ناحية بيت ورصيد بالبنك ومشروع صغير ، بداية زواجهم كان مدلعها ولما تحكي لي عن مشاكلهم اغلبها سببها هي وتفكيرها ، 
تخيلو مره قالها لازم نخفف مصاريف عشان بنبني بيت ، قالت لا مو لازم نبني !! 
مابي بهالحي ، خلنا عايشين هنا بهالشقه ( شقه للأجار) !!! 
فيه حرمه بعقلها بتقول لا خلنا نعيش كل حياتنا ونص راتبنا يروح ع الاجارات ؟؟؟ 
اطفالها 2 من كثر الطيحات واهمالها صار عندهم حول 
مقصدي انه مو كل بنت جميله تنفع للزواج وللمسؤوليه . مو كل جميله زوجها يحبها 




يمكن انتي ياللي تشوفين نفسك شينه تتزوجين واحد جميل ويحطك بعيونه ويعشق ترابكك 




( جددي توبتك مع الله يومياً ، اعصمي نفسك عن الحرام ، حافظي على الصلوات بوقتها لاتتهاونين فيها ، تثقفي دينيااً ، تفسير القران وسيرة الرسول عليه الصلاة والسلام وقصص الصحابه ، الاذكار والورد اليومي ، النوافل ، )
اعبدي الله عشان عبادته والرغبه بمغفرته والجنه ، لاتقولين بصلي وبقراء قرأن عشان اتزوج وبس ، لا قولي عشان ربي يغفر ذنوبي ثم عشان الزواج عددي النيه لكن ارغبي بالمغفره والرحمه والجنه اكثر من رغبتك بالزواج 




والله ادري يابنات كلنا نبي كلمه حلوه 
واهتمام واطفال ، ونبي زوج يحبنا ، 
لكن هو النصيب والرزق من الله 




وف الاخير ياحبيبتي اذا دعيتي لنفسك بالزواج ادعي لكل بنت بسن الزواج ، تعرفينها او ماتعرفينها 
 
وادعوا لي ان الله يشفيني ويوفقني بدراستي 
ويغفر لي ذنوبي ويرزقني زوجاً صالحاً