انا وأم زوجي مين فينا الظالمة ومين المظلومة احكموا بينا

بنات بكتب لكم مشكلتي كامله واعتذر على الاطاله وانتوا حكموا
زوجي عاش معاناة كبيرة مرره مع أهله سببها زوجة اخوه هذه الزوجة قريبة لهم كانت يتيمة وربتها ام زوجي وزوجتها ولدها هي تعتبر كل اخوان زوجها اخوانها فتكشف وتآكل معهم على سفرة وحدة
تكره زوجي بشكل غير طبيعي بس تدعي انها تحبه
هي الامره والناهية في البيت اي شي تطلبه يتحقق
معاملة اهل زوجي له غريبة مرره يعني تفرقه غير طبيعية في التعامل بشكل يحير
مثلا ابو زوجي كل أولاده ساعدهم في الزواج ودفع لهم المهر وارقى وأحسن الصالات بس وقت قرر زوجي يتزوج رفض يساعده بريال واحد قال خلاص ساعدت اخوانك مالك عندي شي
أولاده الثلاثة بنى لهم شقق واثثها لهم اما زوجي قال له لك غرفه بدون حمام وانتوا بكرامه والغربة تطل على الشارع
والاثاث قال بشتري لامك غرفة نوم جديدة وانت أخذ القديمة حقتنا
جات لزوجي وظيفه محترمة زمان اول وتدخلت زوجة اخوه وحرضت أمه وابوه عليه ان هالمدينة الفلانية خطرة وحوادث مع ان ولد اخوها يشتغل فيها وهي الي سعت له بالوظيفة بواسطات ومحسوبيات
وقت خطبني وصارت الملكة عملت ضجة ماصارت وتدخلت علشان أتطلق وتحريض غير طبيعي
ايام الملكة والله العظيم من ابشع أيام حياتي
قالت له عيالك بيكونوا مثل العبيد السود لان امهم سمره طلقها وتزوج اختي قريبتي بيضه وحلوة
علشان يرضونها قالوا لزوجي طلق ماعاد نبي زوجتك لو تسوي عرس ماراح نحضره والمهر الي باقي ماراح نعطيها إياه الي صار فعلا المهر اغلبه ماخذته العرس انا الي سويته مختصر على الحريم
حسبي الله ونعم الوكيل قسم بالله قلبي يوجعني من القهر كلما اتذكر كيف خربوا فرحتي وفرحه أمي وانا اكبر بناتها
بتقولون وين اهلك عن السالفة ماقلت لهم ابدا الي يصير ليومكم مايعرفون شي
قلت المهر راح استلمه بعدين والزواج زوجي مايبغى
تزوجت وصارت لزوجي مشكلة مادية كان بيروح السجن بسببها طلب من ابوه مساعده وتدخلت زوجة اخوه وعملت شوشرة ومشاكل الى ان أرسلت له أمه رساله على الواتس اب ريال واحد ماراح نساعدك فيه تبي تنسجن انسجن
السجن يمكن يخليك تكون رجال
طلبت من ابوي وماقصر دفع كل المبلغ
طلعت لي بعثة واستجنت زوجة اخوه وقت عرفت كيف تروح انت ماخاف الله تترك أمك وانت عاق وجاحد وكل مرة يروح لهم تبدء نفس هالكلام بس الحمد لله تسهلت البعثة
طبعا ماتركوني في حالي كل شوي يرسلون رساله ان تزوج عليها راح ندفع لك كل التكاليف ونسوي لك عرس كل الاهل يتكلمون عنه وبنبني لك شقة
الي خلاني اكتب هالموضوع ان زوجي شبه مقاطع أهله مايدق مايروح لهم مايقبل ابدا ان اطلب منهم يزورهم
يقول غصبن عني ان رحت لهم رجعت مهموم وتعبنا نفسيا وراح يصير مثل ذيك المرة
كان راح لهم وصارت مشادات بينه وبين زوجة اخوه واهله كلهم معها بس لان تغدى في بيتنا مع اهلي وصل الشقة وحالته مزرية طول الليل مختنق مب يعرف يتنفس ويشتكي ان صدره يعوره
أمه كل شي تقوله لزوجه ولدها حتى ادق خصوصيات زوجي كل مره يتصل عليهم او يتصلون عليه تصير مشكلة بسبب زوجة اخوه اي شي تعرفه تقلبه ضدي وتعب وهو يقول لاامه ماتقول بس مافيه فايده
خذوا هالموقف
كانت مكالمة عادية بعدها طلبت منه أمه ان يصور لها نوع الرز الي استخدمه صور لها وبعدها بساعات ترسل لي ام زوجي رسايل سب وشتم اني بموت ولدها لان زوجه اخوه تقول هالنوع من الرز مسرطن
اهلي ماخذين فكره عني اني يمكن احرضه على أهله
أهله يعتبرونه مريض نفسيا
وانا ضايعة ياناس والله العظيم تعبت بقوة
هو مقفل جواله وأمه تدق وان طنشت عملت مشاكل وان قلت لزوجي أمك دقت عمل لي مشكلة انك تُحبين تمرضيني
معليش اعرف ان طولت في الكلام بس قلبي تعب مابي مشاكل اخاف اظلم احد الناس شكوكني اني يمكن اكون ظالمه
ماني عارفه كيف اتصرف