انا واختي مدري ليش تعاملني هاالمعامله

بنات انا مشكلتي هاذي ميب جديده وماابي حل لها كثر ماابي افضفض من داخلي انا إخواني كلنا سبعه مات اثنين الله يرحمهم بقي خمسه اربع بنات وولد أمي جابت ثلاث بنات وبعدها ولد وبعدها جابتني طبعا غير اللي ماتو ولد البكر وبنت بعدي أبوي الله يرحمه توفا وانا صغيره يمكن سادس ابتدائي وكانو أخواتي الثلاث كلهم متزوجات اخر وحده يوم يتوفا أبوي وهي لها سنه متزوجه وحامل بشهورها الاولى بعدها تزوج اخوي وطلق وتزوجت انا ورجع اخوي تزوج في الفتره الي بين وفاة أبوي وزواجي كانت جحيم بالنسبه لي لانه عندي اخت لاتطاق اي هي اختي الثانيه وبيني وبينها عشر سنين وهي ساكنه في الشرقيه اما اختي الكبيره واختي الثانيه فهم عسل على قلبي الأخص الكبيره كانها أم لي وأخوي الحمد الله محترم تزوجت وعمره مارفع صوته او مسني بكلمه والحمد الله بيننا احترام بس الحين ابي أتكلم عن اختي الجحيم طبعا كلهم عندهم عيال بس هي إنسانه مزاجيه وشكاكه كانت تسوي حركه حتى أمي ماتتجرء تسويها كنت اكرهه العطل بسببها فجاءه تدخل علي في غرفتي تراقبني وتسأل مته بتجيك الدوره تقرقر على راس أمي وكل شي وشوله وتذب علي كلام زي الحصاء واحيانا اكون قاعده اسوي البزران اوراق يلونونها تدخل علينا فجاءه وكأني باذيهم الحمد الله والشكر انا خالتهم بعد هالجحيم تزوجت والحمد الله قلت افتكيت منها ورحت مع زوجي للمنطقه الي يشتغل فيها ولاكن استغرب منها كانت تدق تسال وتسلم وحده ثانيه اذا تقابلنا في العطله شي لايطاق وتعبي أمي علي وفيها نوع من الغيره لان زوجي اعلى من زوجها وكلهم عسكر بس زوجي ضابط وهي زوجها فرد بس وش دخل انا ماعمري فكرت بالفرق لان حتى اخوي فرد بس وش دخل ماقد بينت شي وتموت لو أجيب طاري زوجي اي شي يسويه لي زوجي لو سفرني او وداني مكان وجيت أتكلم عنه يجن جنونها حتى يابنات تخيلو زوجها ولد خالتي وماتبيني حتى ارد عليه السلام اصلا مااتجرء وانا أشوفها كذا بهالاخلاق اعرف انها بتزعل وأي شي اشتريه او البسه مو حلو وتبدي برأيها حتى لو انا ماطلبته ا وتسوي اي حركه عشان أمي تهاوشني وكل عيد لازم اتنكد منها وماتبيني أتكلم او ابدي رأيي بشي او اقترحت على أمي شي وتحس ان أمي تحبني اكثر منها هي الحين عيالها ماشاءتبارك الله اكبار المفروض تكون اكبر وأركز من كذا انا أختها والله مااكرها لكن اكره تصرفاتها الغريبه ومعاملتها معي فيه فرق والله بين معاملت اختي الكبيره وقلبها علي ودايم تفكر فيني وليش ماحملت رغم ان اختي الكبيره مطلقه وبين معاملة اختي هاذي عمرها ماسالتني عالجتي ولا لا فيها نوع من الانانيه حتى على اقرب الناس لها اه بس يابنات الا مته والله اختي ماثمر فيها معروفي الي سويته يوم طلبت مني سلف رحت اركض اعطيها وقولها مته ماتبين رجعيه وانا يوم جو اهلي ينزلوني يوم سكنت شقتي الي في الرياض امي قالت الجلسه مني انا وأخواتك ويوم قالولها قالت لا ماابي انا ماقلت اني معكم وامي مسكينه قالت كل اخواتك من باب الميانه حتى يوم رحت لها نزلتها وقاتلنا هاذي نزالتك والدين مته مابغيتي سدديه اه والله اني مقهوره انا الحمد الله في نعمه ومانيب بحاجة الفلوس الي تسلفتها مني بس ليش هالمعامله مع اني ماقد ضريتها وقدام الناس تعاملني احسن معامله وتسولف معي وتضحك معي الي يشوفها يحسبها تحبني بس العكس حتى لو اجيب لامي اي شي حتى لو علبة حلاو او حتى قماش وتقول امي انه مني تنجن ويتغير وجهها ويقلب ألوان وفيه اشياء كثيره تسويها معي تقهرني فيها بس اسكت وش اسوي ماابي انكد او اضيق صدر امي مالي الا زوجي ياما رحت لبيت اهلي وهي فيه ورجعت متنكده ودموعي على خدي منها وش رايكم في هالكلام الي قلته موب يقهر ويستفز لو انتم مكاني ماراح تنقهرون مثلي