انا واهل زوجي

السلام عليكم ورحمه الله وبركاته ،،
خواتي في الله حبيت استشيركم بموضوع له سنوات متعبني ، فاتمنى اجد عندكم الراي او الحل لمشكلتي.
انا متزوجه لدي اربع اطفال وامي متوفاه واخواتي متزوجات .. امر بظروف صحيه احيانا ولا استطيع العمل بالمنزل ،، زوجي حافظ درس الرجل السعودي بمعنى الكلمه يعني ماله علاقه لا بالبيت ولا حتى مسؤول عن اطفاله حتى بالسوق اضطر اخذهم كلهم والمستشفى وكل مكان ،، ايضاا مسؤوله عن تدريسهم ، قبل عندما كان عندي ٣ اطفال قدمت على شغاله حتى تعيني على بعض الاعمال ومنها كنت ادرس ، انا علاقتي مع اهل زوجي جدا ممتازة ولله الحمد لكن نقطه الاختلاف الشغاله ،، ينتقدون اللي تجيبها ولا يحبونها ، لكن سبحان الله يوم جبتها استحلت بعينهم ، فهمت شغالتي ان ام زوجي كامي ولاترفضين لها طلب ،، وانا ايضا اساعدها عندهم لكن مرات ياخذونها مني بالايام واحيانا شهر واكثر ،، مشكلتي انها كانت تتكلم عني الشغاله ومفهمتهم ان بنتي كابنتها الشغاله وتتصل علي بحجه انها اشتاقت لها وتسالني اذا اكلت بنتي والا لا قدااامهم !! وعلى اني مهمله اطفالي كنت اسمع واسكت ،، يعني مطنشتهم بس محترقه بداخلي ما ودي تخرب معهم ، الان وضعي حيل محتاجه للشغاله وامر بظروف صحيه مالقيت من وقف بجانبي بوقتها بالاخص مولود ويبيله اهتمام وابدا مافيه اللي يساعدني .. قسسم بالله قبل كنت اهتم بزوجي الان اقعد لفترة لا اقدر ابدل لبسي ولا اهتم فيه .. ولو جبتها راحه جسديه اما نفسيتي بتتعب كل ما رحت لهم زيارة ما ادري ترجع معاي شغالتي والا لا ؟ اكثر من مره المح لهم بس فاهمين ومطنشين ! قلت لهم انتم بحاجه شغاله يقولون ما حنا محتاجين ،، طيب انا وش ذنبي ، زوجي يدري لكن مقهور ما يقدر يتكلم من جهه امه ومن جهه انا.
ويشهد علي ربي اني خايفه ربي بام زوجي لكن سالفه ان الشغاله تنام عندهم ،، جدا اتعبتني ودي اقول للشغاله الجديده قولي عادي اشتغل بس ما انام الا ببيت معزبتي لكن اخاف اذا سالنها تقول انا مدرستها .. ارائكم. ممكن تكون حل لي .