انا وجارتي العزيزه والمرض الخبيث {اجارنا الله} شوروا علي

السلام عليكم جميعا
بعد تفكير طويل قررت اكتب لكم مشكلتي
القصه وما فيها ان لي جاره بيتها جنب بيتي الجدار يالجدار
وعلاقتنا جيده جدا علاقه احترام متبادل ومعزه واخوه
وفي اخر الايام تقوت علاقتنا اكثر من ناحيه انا نشكي لبعض ونفضفض
احيانا ونسأل عن بعض على الاكثر مره في الاسبوع
المشكله انها العام في الصيف اكتشف الاطباء ان عندها ورم خبيث في الفم
واحنا كنا كل وحده عند اهلها في الرياض ( احنا ساكنين خارج الرياض)
المهم انها سوت عمليه وادخلت المستشفى وطلعت وانا ما ادري لانا ما كنا نتصل في بعض
وبعد انتهاء االعطله رجعنا لبيوتنا واخبرتني باللي صار عليها وان الله من عليها بالشفاء
اللي صار ان المرض كان لها بالمرصاد وعاد لها في رمضان الماضي وفي اول ايام رمضان ما انسى ذاك اليوم كنت مسويه ام علي وحبيت اذوقها اتصلت عليها عشان ارسل لها الحلى وصعقت من الخبر قالت لي ان المرض رجع لها وانها لازم تروح للرياض عشان تبدا العلاج
نسيت اقول لكم انها كانت حامل في شهرها الخامس سألتها والبيبي قلت انهم يمكن ينزلونه
.......... يا بنات ما تتصورون وشلون نزل علي خبر مرضها بكيت كثير وصرت بس افكر في عيالها
وحزنت عليهم وحسيت ان قلبي يتقطع عليها و الله يعلم كيف مرت علي هاذيك الايام والله ان كل ما افتح ستاير بيتي واشوف بيتها اتأثر كثير
بس ما كان في يدي الا اني ادعي لها له قبل ما ادعي لنفسي وعيالي اللحين بتقولون وين المشكله المشكله يا بنات ان هاذيك المكالمه كانت اخر اتصال بينا من عشر شهور ما قدرت اكلمها في البدايه كنت احول اتصل عليها بس كان جوالها مقفل لانها في المستشفى او كانت ما ترد وبعدين يوم زادت حالتها وبدات تتعلاج كيماوي ما اقدرت اتصل لاني عارفه نفسي مافيني الشجاعه اني اواسيها او اصبرها لاني من النوع اللي يبكي على طول وقلبي رهيف ما اقدر اسمع صوتها وهي تعبانه كنت على اتصال دائم بصديقتها المقربه لها والله يعلم اني كل ما كلمت صديقتها ما اقدر امنع نفسي من البكا يمكن لاني لازلت متأثره بوفاة امي بنفس هذا المرض ما ادري وش صار لي كنت كل ما شلت السماعه ابي اكلمها ما اقدر ما ادري ليه يجيني زي الخوف وحاله من الحزن الرهيب وافكر وش راح اقولها وكيف اتكلم معها حتى الرسايل ما ارسلت ولا رساله لا تقولوا ليش ما ادري بالرغم من ان هذا ماهو طبعي انا من النوع الواصل واللي يقوم بالواجب المهم مرت الايام والحمد لله ولدت (قرروا الاطباء يؤجلون العلاج حتى تولد) وجابت ولد وكلمت صديقتها تبشرني الله يبشرها بالخير حمدت الله ودعيت لها كنا كلنا متأثرين اخذت رقم امها عشان اكلمها وابارك لها لكن نفس الشي ما قدرت ما ادري ليه
تخيلو يا بنات دايم احلم فيها كنها تحضني وكنها تسلم علي والله اني احبها مره بس ما ادري ايش صار لي المهم هي بدت رحله العلاج الكيماوي وانا ما زالت اسال صديقتها عنها وارسلها سلامي معها اهههههههههههه يا بنات احس بالتقصير ............احس اني خذلتها وخذلت نفسي الله يعلم اني ما بخلت عليها بالدعاء وانها كانت معي وفي فكري بشكل يومي لكن شجاعتي خذلتني ونفسيتي وفقداني لأمي ظهر على السطح وصرت خايفه افقدها وعيالها يفقدونها
مرت الايام وانا كل يوم اقول بكره اكلم بكره ارسل رساله مع اني ما احب اتواصل بالرسائل ولكن لا حياة لمن تنادي
اللي صار انه جتنا سفره لبريطانيا قلت في نفسي ابرسلها رساله اودعها وسلم عليها واقولها اني مسافره وفعلا كتبت الرساله كلها دعا واعتذار وارسلتها وانا يالمطار ولما وصلت اكتشفت ان الرساله ما انرسلت لان تلفوني كان جديد وما يرسل وجلست على هالحال شهر وراحت الايام الان لي هنا خمس شهور راحت الايام وان اقول لازم اكلمها لازم ارسل رساله بس وش اكتب لها وعلى هالحال
امس ارسلت لي صديقه مشتركه بينا تقول ابشرك فلانه منَ الله عليها بالشفاء وانها بترجع لبيتها وختمت رسالتها بالدعاء لي ان ربي يرجعني لبيتي سالمه
والله يا بنات من الفرحه بكيت الحمد لله ان ربي خلاها لعيلها ورجعها لبيتها سالمه لكن في قراره نفسي احس بمراره فضيعه وتقصير صحيح انه غصب عني لكني مره متضايقه ولله اني من ااخر مره سمعت صوتها وانا كل ليله افكر فيها قبل ما انوم وادعي لها وانها في احلامي وفي تفكيري دايم حتى زوجي ملاحض علي ويقول اني مكبره الموضوع يقولي خذي الامور ببساطه ارفعي السماعه وكلميها عادي
اللي افكر فيه انها اكيد ماخذه في خاطرها علي وشرهانه علي اكيد تقول اني ما وقفت معها في محنتها ...............والله انا مانيب كذا بس هالمره مدري وش صار لي
معليش انا كثرت كلام بس يمكن ارتاح شوي اللي ابيه اللحين يا بنات قولو لي وش اسوي و كيف اصلح اللي سويته ووشلون اتشجع اكلمها مع اي عارفه اني ما راح اقدر وشلون اكلمها اللحين وشوعقبه والله ما ادري وش اسوي انا افكر اكتب لها رساله بكل اللي حسيت فيه واكون صريحه بس ما ادري اقدر او لا بليز يا بنات ساعوني وفهموني