انا وزوجي سليمين و13 سنه وابحث عن السبب وبهذا السبب حملت ..

ربي لاتذرني فردا وانت خير الوارثين
.
.
تمر علي لحظات اقول خلاص دعيت الله وما اجابني فمراح يجيبني ولكن اتعوذ من الشيطان وارجع ادعي كأني اول مره ادعي مع ثقتي بالله انه مايخيبني ..
كنت سليمه وزوجي سليم ورحنا لاكثر من استشاري وكل مره نعيد كل التحاليل الُمكلفه وتطلع نفس النتيجه ! انتم سليمين وعقم غير مفسر! (سويت اشعة صبغه اربع مرات كنت شاكه عندي انسداد وقالوا مافي ومرات يقولوا انسداد في جهه وانفتح وسويت تلقيح وفشل ..
ماخليت تمريخ ولاخلطة ولا اعشاب ولاطريقة ولا وضعية للحمل الا وجربتها ماخليت شي والملاحظات بجوالي كلها طرق للحمل ومن ضمنها (اشرب عنزروت-خزامى-عشبة المدينة_قشعة _تلبينه_خلطة ام لجين_مردود _عسل _مكسرات_حبوب فيتامينات وحمض الفوليك _تفاحه وسطها لبان ذكر_قرفه _ خلطة الرويس _نامي على بطنك ساعتين _وضعية السجود _ حطي مخده ولاتغسلين بسرعه_حطي تحميلة اللقاح _تشطفي بـ بيكربونات الصودا_مراخات شعبيات _مراخه فلبينيه_قهوه قبل النوم_كلوميد_اناناس _تمارين تساعد الحمل )
كان كل مره تنزل عندي الدوره يتجدد عندي الامل بالله ،كـــل مره اكون اقوى من اللي قبلها لان محسنة الظن بالله والله ياخواتي طوال 13 سنه اترقب الحمل في كل دورة شهرية ماغاب عني الموضوع ..
وجا قبل فتره صديقتي اللي متاخره ست سنين سوت منظار بطن وحملت ماشاءالله قمت انا وحجزت موعد اسوي منظار ،باقي منظار ماسويته !
وعطوني غرفة تنويم وكانت عميلتي الساعه 8
استخرت ونمت بعد الاستخاره ورأيت بالمنام اني اسوي عملية انابيب وحملت وكأني أولد وجبت توأم !
قلت لزوجي ماني مرتاحه للمنظار وابكي وقال خلاص لاتسوينها وانحشت كأن جبل وانزاح....
رحت عند اهلي بالرياض متضايقه مافيني حيله ،طرا على بالي الحلم اني اسوي الانابيب كلمت زوجي ورفض لانه تعب مني ومن ركضي ورا الحمل تزاعلنا وطلبت الطلاق وجاء قالي خلاص سوي الانابيب وانا بسافر للخارج صح اني زعلت لانه بيتركي في عز ضيقتي بس خلاص شسوي حلم الامومه اعظم من حب الزوج ..
والله وسويت الانابيب ،وزوجي كان ينتظر الترجيع عشان يعطيهم العينه ويسافر
والله عطاهم وسافر بعدها وخلاني عند امي حبيبتي كان قلبي خايف ما تنجح العمليه وقالولي ارتاحي اسبوعين وبعد اسبوعين حللي
في هالاسبوعين دعيت وصليت وبكيت وركعت لله وسجدت واستغثت بالله رددت دعاء ربي لاتذرني فردا وانت خير الوارثين نحبت بكل صوتي ياااارب انا عارفه انك ماراح تخليني ادعيك كل هالوقت يارب اكيد بترحمني
كنت كل يوم اقرا البقره والاذكار واقوم الليل وادعي واستغفر كنت ماقدر اتحرك بس للحمام فقط ع العكاز والصلاه وانا بفراشي وكان اكلي صحي وكله مواد اوليه (بيض بلدي-خبز اسمر_حليب_مكسرات_سمك_فواكه _خضار)
وبعد كل الانتظار والتعب
.
.
نزل علي دم اسود وفشلت العملية،الحمدلله على كل حال،دعيت الله بالعوض مابكيت كلها دمعتين لما كلمت ابوي لانه يكره يشوفني ابكي وكان خاطري ابشره بالخبر بس للاسف ،ولما كلمت زوجي قالي انا عندي الحل لموضوع الحمل بس خليني ارجع من السفر!!!!!!!!
وكنت اتذكر الرؤيا اللي شفتهاواقول غريبه ماتحققت رؤيتي ولما كان زوجي مسافر كان اخوي يجيب طلباتي وانا انتظر نتيجة الانابيب وقالي رايت رؤيا اني اقرا ورقتين فيها بشارة حمل ..
زاد اصراري اني اسوي شي جديد وكان موعد رجوع زوجي من السفر قرب قلت لازم اسوي شي بهالدوره ( باقي ماتبت عن سوالفي ) قلت دام يصير عندي تلقيح اكيد بطانة الرحم فيها شي!!
وقلت بس مافيه الا هالدكتوووور الجمييييييل
بندر عبدالكريم .. اللي مكتشف التحفيز لبطانة الرحم عام 1434 وكنت اسمع اخبار عن التجارب الناجحه عنده بس كانت قليله وشفت مقابله معاه على احدى القنوات..
اخذت موعد ورحت عنده وكان زحمه مررره وقلتله قصتي وشاف تحاليلي قال وضعك سليم ويحتاجلك تجربة جديده اسمها (تحفيز بطانة الرحم) ونسويها بعد الدوره مع برنامج الانابيب قلتله انا اليوم تاسع الدوره من بعد فشل الانابيب قال ممتاز جيتي بالوقت المناسب والله وسويت التحفيز الاول وقالي لازم تحفيز ثاني قبل الدوره القادمه عشان تتجهزي للانابيب ،،بس انا ماكنت ناويه اسوي انابيب لان مو مستقره بالرياض !!
والتحفيز يا اخواتي مثل تنظيف الرحم بس بآله جديده وتزيل الطبقه العلوية من البطانه بقياسات محدده وطبقه رقيقه وكان هذا السبب بعد الله..
والله وجاء زوجي من السفر يوم 14 من الدورة بوقت التبويض وقال بعوضك بسفره داخليه وتزوري مكه والمدينة وهذا هو الحل ،ومنها يعوضني عن الالم النفسي اللي صارلي بغيابه ووداني مكه والمدينة وربوع بلادي
وانبسطت كثير بالسفره خاصتا اني محتاجه لمكه ومحتاجه نفسيتي تتحسن واشتكي لربي ع اللي صارلي وانا قريبه منه في بيته،،
وانا قاعده بيني وبين نفسي افكر واقول لنفسي بعد كل الفشل اللي مريت فيه وكل التجارب الفاشله ماعندي شي اسويه كل حيلي خلصت ماعاد فيه اي مجال او اي منفذ ، اعترفت لنفسي خلاص ماعاد عندي شي اسويه لان كل دوره احطلها برنامج لعل وعسى يضبط
وبعد مارجعت من رحلة الدعاء والاستغفاااار وكانت رحلتنا بالسياره اذكر اني استغفرت طول الطريق بحدود 15 الف مره بدون رياء و رجعت بيتي هلكااااااانه الدوره متاخره لها اسبوع وقال زوجي يلا نروح نحلل ولاول مره زوجي يوديني احلل بكل ثقه واصرار منه وكنت مو متحمسه وعارفه انها زي كل مره بحلل وبعدها تنزل الدوره هههه
والله وحللت واخذ النتيجه وسلم علي وقال مبروك انتي حاااااااامل ماصدقت نهائيا وعصبت عليه وقلت لاتكذب علي انا عارفه اني مو حامل لاني مو حاسه بشي ولاتلعب بمشاعري وقعدت ابكي ..
الحمــدلله حملت بدون تصديق مني ،تخيلوا ولاشي من الاعراض اللي اترقبها طول13 سنه جاتني وعرفت اني حامل منها،ولاشي ولاشي ولاشي بس اللي تذكرته الافراز البني اللي استمر عشرة ايام وكان ينزل علي في مكه وكنت اقول لزوجي شكلها بتنزل الدوره في العمره وتخرب علي عمرتي..
يا اخواتي راقبت اعراضي طول 13 سنه عشان لو حملت اعرف اني قبل التحليل اني حامل ( بول متكرر،نغزات وليونه وقساوة الصدر،تغير لون البول،صداع،حبوب الوجه،حراره، نغزات في المبيض، مغص الدورة،) ولاشي جاني من هذا كله واللي اقراه بالمنتديات..
ودايم احس انه يحصل معاي تلقيح لان قبل الدوره باسبوعين (بعد ايام التبويض) احس بمغص مفاجئ وينزل مني دم بني وحرارتي ترتفع بس تتاخر الدوره يومين بالكثير وتنزل 😓
على قولتهم كنت بلقط الحمل..
المهم نرجع لموضوع اني ماصدقت اني حامل ومن كثر ما افكر ،هل انا حامل ؟؟؟؟؟ نمت يومها وانا ابكي مو مصدقه ولا عرفت احمد واشكر ربي ..
ونزل علي دم وانا ناااايمه الى فخوذي قلت بس هذي الدوره لاحمل ولا يحزنون وزوجي اخذني وانا تعبانه ويغمى علي ويعطوني ابر تثبيت للحمل والدم يوقف يومين ويرجع اسبوع وعلى هذي الحال ...الى ان دخلت الشهر الثالث ونزفت كثيررر واروح عند الدكتوره واقولها شوفي فيه جنين ولا هذي الدوره جاتني(مومصدقه اني حامل) وتسويلي سونار قالت بشوف قصة الدم وشافت بالسوناااااااااار
وقالت حااااااامل بتوأم ماشاء الله ولا اله الا الله ولاحول ولاقوة الابالله .. واللي تحمل بتوام بالاغلب ينزل عليها نزيف
.
.
اذكروا الله يا اخواتي هذا فضل من ربي يأتيه من يشاء ..
وكبر بطني والحمدلله بدأت شوي شوي اصدق ولبست ملابس الحمل اللي شريتها من اول زواجي وكنت دايم اتخيل اني البسها..
والحلم اصبح حقيقه وكانت رحلة الحمل جمييييله ومتعبه ومؤلمه..
والحمدلله الله اللذي لا اله ولا رب ولا معبود سواه ..
اكتبلكم قصتي وانا اطفالي بجانبي اتموا الشهر الثالث
واسالكم الدعاء لهم بأن يكونوا صالحين ومصلحين وحافظين لكتاب الله ومجاهدين في سبيله..
هذه كانت قصتي وقبل ان انتهي من كلماتي ..
عندي طلب خاص ارجووكم ان تأمنوا على دعائي ()
اللهم ان اسالك ان ترفع عني وعن والدي واخواني وذريتي ما اصابنا من كرب وبلاء وتعفوا عنا انك انت القادر على كل شي ..
امين امين امين ولكل من قال امين تقول لك الملائكه ولك بالمثل ..