انا وزوجي والجفاااااااا ثالثناااااا

السلام عليكم خواتي
والله من زمان وانا ابي اكتب مشكلتي بس كنت اتردد
اليوم عزمت اكتبلكم لان خلاص وصلت حدي من الضغط النفسي وماعاد اتحمل
تكفون ياخواتي تحملوني لاني معرف اختصر فلو طولت لاتتضايقون:22:
المهم انا متزوجه من 12سنه وانا الزوجه الثانيه وعندي اطفال ولله الحمد
زوجي من يوم اخذته وهذا طبعه بصباص ويسافر كثير ويحب يتمحرش بالبنات وهو برا..
بس يحلف يمين غموس انه ماعاشرهن بالحرام ابدا .. بس يعجبه يمسكهن ويتمحرش فيهن:eek:
يقول اذا سوا كذا تهدا غريزته ولاعاد يفكر بالجنس وله مكالمات مع بنات ولما اواجهه يقول اتسلى بس.. اقوله تتسلى ببنات الناس خاف الله عندك بنات ومن دق باب الناس دقو بابه لو في جداره يقول انا مادورت عليهم ولاغصبتهم على شي هم اللي يدقو عليه ويلاحقوني حد تجيه النعمه ويرفضها:06: ولما اقول هذي موب من شيم الرجال الاخيار شوف ابويه من يوم الله خلقه مايعرف غير امي ولاعمره مشى فالخرابيط يقول ابوك مسكين على قد حاله موب فحل انا فحل :30:..تخيلو وربي يقهر وهو ترا رجال كبير على مشارف الخمسين (مراهق فالخمسين)يعني لما خذته تقريبا ب39 عمره ..واللي فيه طبع مايغيره الا الكفن..
المشكله يجي يعلمني يقول عشان تتاكدي ان مافبالي شي بطال وقال ايش انه لما يعلمني مايعتبر خانني:024:
انا طبعا فالبدايه كنت اخذ الموضوع بروح رياضيه لانه كان يشتكي من حرمته وانه نفسه في زوجه تكون صديقه له في نفس الوقت وجيت انا الصديقه قلك مالت على قرادتي وغبائي بس والله كنت صغيره وغشيمه وابي اكسبه باي طريقه
المشكله المصيبه ان من كثر مايشوف من بنات صرت انا مااعجبه ويطلع فيني العذاريب مع ان الكل الحمد لله يشهد بجمالي واناقتي..بس انا مقتنعه ان اللي عينه فارغه لو معه ملكه جمال العالم ماترضيه ولاتعجبه :angry2:
وكنت اتحمل واسكت ابي المستره مابي يخرب بيتي ويتشتت اولادي وتعرفو المطلقه عندنا كيف ولايهون عليه اولادي افارقهم اموت لاجلهم..
الحين تصرفاته وكلامه المجغ عن الحريم خلى عندي عقده وصده منه صرت مابيه يقربلي مااكرهه بس اذا قربلي احس كل ذره من جسمي تنفر منه واتقزز واقرف واحس حركاته شاذه مع انه مايسوي شي خارج عن المالوف ..
وصرت عشان اطفشه مني ولايقربلي مااهتم بشكلي اقعد طول اليوم بقميصي ماالبس ولااتشيك زي اول وشعري اربط بربطه طول الوقت ولااتمكيج حتى كحل مااحط:bkh: وانا قاصده ذا الشي طبعا نظافتي الشخصيه مهتمه فيها عشان ماتفهمو اني مروحه مره وحده عاد :p خصوصا اني الحين حامل ولاطايقته ابد ودايم اقله عندك حرمه ثانيه خلني بحالي روح تزوج مسيار والله كني اقول الزق فيني ادري ان الممنوع مرغوب
بس خلاص ماعاد اتحمل مضايقاته لي مع اني اقوله لاعاد تعلمني بشي ولاعاد تقارني باي وحده ماعاد اقدر اسمع ذا الكلام ..يقول انت اللي عودتيني احكيلك كل شي .. صدق جزات المعروف سبع كفوف :icon29:.. الحين صرنا زي الاخوان ومو مزعلني ذا الموضوع بس دايم احس بتانيب الضمير من ناحيته مدري ليه
والله مااكرهه لاكن اكره تصرفاته وامقتها ..مع انه طيب مره على اللي اسوي فيه يتحملني وامي دايم تقول احمدي ربك والله مافي رجال يتحمل معامله زي كذا (طبعا امي ماتدري عن التفاصيل )عشان كذا تستغربه معاملتي معه واتعذر بالحمل وهو اخلاق مع الناس كلها والكل يحبه ويحترمه لانه مع الكل رزين وثابت ومحترم بس عيبه الوحيد النسوان يموت فيهم وعينه الطويله
شورو عليه وش السواه معه كيف اصرف تفكيره عنهن ؟؟
ملاحظه: يقول كل الرجال ××× كذا يموتو فالنسوان لما نكون مجتمعين ماعندنا هرجه الا مغامرات كل واحد
وفعلا يابنات لما اجلس مع الحريم كلهم يقولو رجالنا كذا وعادي تعودنا الله لايرد الغلا بيحوم واخرته بيرجعلي :09:
سامحوني على الاطاله