انا وسلفتي ويالليل ماطولك(قديم)

السلام عليكم ورحمه الله وبركاته

قبل كل شي اكيد بعضكم بيلاحظ التناقض في المواضيع لاننا قاطين:35: فيه ايه حنا 3 بمعرف واحد

السبب زوجي ظروفه حاليا صعبه ماقدر اشتري لاب توب ماقدر اشبك الا عند اهلي واهلي ماجيهم الا كل اسبوعين

بسبب المسافه المهم بقولكم قصتي الي تردد ت اكتبها

لي متزوجه 9 شهور :icon28:تزوجت واحد من جماعتنا نعرفهم ويعرفونا زين خطبوني وانا بثاني ثنوي وزوجي كان عمره


30 تاخر بزواج لأن مالقى وظيفه الا متاخر كان حارس امن راتبه الف وشوي وطبعا محد وافق عليه لما تحسن

وضعه ولقى وظيفه احسن براتب 4 الاف على طول صار يخطب والناس ترفض بسبب سنه ولا بسبب راتبه مو

عاجبهم كانو مستبعديني بسبب صغر سني بنسبه له وانا كنت اتمناه لي بسبب بره بأمه وابوه وحبه

وتقديره لخواته الي فيهم وحده تدرس معي حبيته من كثر ماسمع عنه وكنت ادعي يصير نصيبي وسبحان

الله خطبني وافقنا وكل شي تمام استني لين خلصت الثنويه سنه جمع فيها فلوس مهر ومصاريف زواج

وبسبب وضعه المادي السكن شقه صغيرونه فوق عند اهله غرفتين وصاله ومطبخ صغيرون وبلكونه اوكي

وانا كنت موافقه لاني اعرف امه وخواته زين وسلفتي مره اخوه اكبر منه بسنه سلفتي ذي ساكنه بشقه نفسي

جنبي يعني الدور الي فوق قاسمينه نصين لي ولها وله مدخل خاص برا البيت ولنا سطح فوق ننشر ملابسنا فيه

وحمولتي لهم حوش كبير المهم قبل ماتزوج زوجي كانت علاقتي فيها حلوووه وتنكت وطيوبه ودمها خفيف حتى كنت مرتاحه انها سلفتي

المهم من دخلت بيتهم والحرمه متغيره علي 180 درجه :huh:بدون سبب انا لما تزوجت رحت انا وزوجي الطايف

اسبوعين بعدين مكه 3 ايام بعدين رجعت الرياض وكانت هاذي اول مشكله وصلنا الساعه 3 الفجر دخلت شقتي

عادي وجاين من مكه يعني شوفو المسافه طبعا سياره على طول من دخلنا يالله خذينا دش بالعافيه ونمنا الساعه

7 طقت الباب على اساس مسويه لنا فطور ماسمعنا شي من التعب قمنا على الجوال عمتي تصحينا الساعه 12
الظهر صحينا صلينا نزلنا نتغدى الا هي زعلانه وماده البوز:hmh: انا استغربت لما سلمت ماردت علي

لما قعدت قالت عيب عليكم ابي افطركم تلطعوني عند الباب قامت عمتي وبناتها يضحكون قالت عمتي من جدك انتي جايتهم الساعه 7 الله يهديك بس هذا الي قالته بس

طلعنا فوق على طول بعد الغدا حوالي نص ساعه ولا حماي يتصل ليه زوجتك تتكلم على زوجتي اصلا مو كفو احد يجيب لكم شي وانا ماقلت شي والله هاذي اول سالفه وبدت كل كم يوم سالفه

طقت كبدي ودايم عمتي وبناتها اذا قامت قالو لاتخذين بخاطرك تراها طيبه هاذي غيره انا ماني زوجه زوجها تغار مني انا طبعا كملت دراستي وسجلت في الجامعه واقنعت زوجي يكمل دراسته هو مع متوسط وسجل ثنوي مسائي:3_3_103:

هاذي اول سنه لنا اول مانقبلت نزلت طيران لعمتي ابشرهم وهي موجوده وباركو لي كانت الدنيا ماهي سايعتني من الفرحه وزوجي عرف وفرح اليوم الثاني حماي ماسك زوجي يقولها ادب حرمتك لأقص لسانها

بصوت عالي واصل الصاله ا تقول لزوجتي انا بكمل جامعتي واخذ الشهاده ماني قاعده نفسك في البيت بس احمل واجيب واشحد من زوجي وجودي زي عدمه >>>>>هي درست سنه في الجامعه وتركتها برغبتها

انا مدري انهرت وقعدت ابكي بكا :icon33:عند عمتي والبنات ندمانه الحين اني بينت ضعفي لأحد على طول راحت عمتي
تهزاء ولدها وقالت كذابه كلنا موجودين وكل كلامها كذب وانا خلاص حرمه فيني ضغط وسكر وتعبانه مافيني على

المشاكل راتبك زين وعندك فلوس اخذ حرمتك واطلع سكت عنها واعطيتها فرصه بس مافي فايده واذا ماتبي

تطلع خلاص لاتنزل عندي خلها في شقتها مابي اشوفها وازعلو فتره ثم تراضو وهدت الامور وقلت خلصنا وصرت معها جدا رسميه :dry:والتهيت بدراستي الحين انا وسلفتي حوامل انا في الخامس وهي بسابع هي عندها 3 بنات ومن شهرين صارت

تتقرب مني وترسل لي اكل بس بعد انا رسميه معها خايفه من المشاكل لكن استحي لما ترسل صحونها مارجعها فاضيه اسوي اي طبخه وارسل لها في يوم جتني بنتها عمرها 5 سنين كانت تبي غرض

وكنت مسويه محشي واعرف ان هي وزوجها وبناتهاا يحبونه فقلت للبنت لحظه بحط لكم من غدانا قالت لا بأكل هنا
قلت خلاص واحط لها وتاكل بسرعه قلت شوي شوي انا بحط واكلي براحتك هناك اذا خايفه تتاخرين على ماما

قالت لا لأن الأكل الي تجيبينها لنا دايم امي على طول تكبه في الزباله :29:ماتخلينا ناكله انقهرررررت وشلتها بقلبي ولا علمت احد مابي تكبر المشاكل

وبعده جات بنتها تبي غرض واعطيتها كانت طالعه بتلفزيون حلا ترك وقعدت البنيه تتفرج لما خلصت اغنيتها قامت

عشان تروح ارجعت حطت اذنها على الجدار حقي تتسمع لشقتهم قلت شفيك قالت امي دايم تحط لنا طيور الجنه وتسكر غرفتنا علينا وتجي تسمع من الجدار عليكم صالتها جدارها على غرفتي :icon810:

تعبت نفسيا منها اكرها ودي اذبحها نغصت على حياتي اطلع احط ملابسي على الحبل تطيح منها على الارض
شفتها بعيني وانطميت وبلعتها:42: وصار لها اسبوووعين تحاول تعرف ايش في بطني وانا اقول ماسئلنا الدكتور ه

امس قالت الدكتور ه ولد علم زوجي امه وخواته قالو الله يعينكم الحين بتعلن الحرب رسمي لأن قالو لها المستشفى فيها بنت

ضاق صدري معقوله حتى بهاذي بتسبب لي مشكله هاذي كتبه الله
بنات انا مخنوقه من هلأنسانه المريضه اعاملها بما يرضي الله واشوف واسمع منها واطنش عشان زوجي احبه

وهو حاطني فوق راسه ومابي اغثه دوامه 10 ساعات في اليوم يرجع البيت منتهي وام زوجي وابوه واخوانه كلهم

ينحطون على الجرح يبرا ويعاملونا احنا 2 زي بعض والله مايفرقون بينا هم معها بعد عشره عمر من سبع سنين
وهي عندهم


ايش الحل فكرت اروح لها او اعزمها لحالنا واقولها انا اعدك اخت واحبك واحترمك وافهم منها ونفتح صفحه جديده

بس اخاف تقلب كلامي ولاتسبب مشاكل جديده