انا و زوجي قربنا نتطلق بسبب موضوع الحمل

السلام عليكم اخواتي
اللي مايعرفني انا عندي بنت عمرها 4 وشوية وقفت العزل من شهر 6 هجري وحملت بشهر 8 ولكن اجهضت في شوال بدون تنظيف والحمدلله على كل حال
بعد اجهاضي مارحت كشفت ولامرة استخدمت حبوب هرمون الحليب لانه صدري كان يوجعني طبعا اعرف الجرعة لاني اخدتها قبل سنة و الحمدلله خف الم صدري ودورتي ماشالله منتظمة وباتابع التبويض عن طريق قياس درجة الحرارة مع جهاز الاباضة والحمدلله بيصير تبويض كل شهر والشهر الماضي عملت البروجستيرون بعد 7 ايام من الاباضة وكانت النسبة 31 ماشالله ورغم دا ماحملت
طبعا التحليل بدون كشف بس رحت المختبر وطلبت التحليل
الحالة نفسية صفر بالدات بعد الاجهاض فصار موضوع الحمل شغلي الشاغل وزوجي عكسي تمامااا غير مهتم ابدا يقول كل شي بارادة الله و هده الحقيقة بس نفسي انه يهتم ويقول انه مايبغى اطفال وماتفرق معاه بس انا ابغى اموت فيهم
من الشهر الماضي طلبت اسوي حجامة ورفض قالي روحي سوي متابعة تبويض فرحت بس للاسف حصل التبويض بدري وقلت يلا يمكن احمل بدون متابعة وخيرة اني مارحت بس ماحصل حمل ودحين فتحت معاه الموضوع من بدري اني اتابع دا الشهر وياريت لو يجي يحلل بس مرة وحدة عشان نتطمن اننا سليمين ****لله ونرتاح لكنه انفجر فيا ورفض انه يحلل الا بعد سنة من الاجهاض وانه طفش من كلامي في دا الموضوع عالرغم اني مابافتح معاه الموضوع غير مرة او2 بالشهر وكلام كتيييير وقالي خلاص كل واحد يروح في طريق منجد كسرني وخرج من البيت وتركني لدموعي
هو يكره المستشفيات حتى لما انا امرض او بنته يقلب البيت نكد ويزيدني هم غير هم مرضي وكنت فعلا شايلة هم انه اوصل لدي المرحلة ويتاخر حملي وادل نفسي له عشان انا اكشف او هو يكشف بس الحمدلله ويقول انه كل شي بارادة الله وخلاص مانسوي شي لحد ربي يرزقنا وانا عكسه اعمل بالاسباب وادعي الله اولا واخيرا فهو الرزاق خصوصا انه عمري مو صغير واللي بعمري اقل شي عندها 2 او 3 وانا كان نفسي احمل من زمان بس عشانه صبرت لاني عارفة لو حملت بدون رضاه راح يعملي مشاكل مالها اول من اخر
سامحوني على طول الموضوع بس مالي احد اشكيه وايش الحل برايكم خصوصا انه وصلت معنا للطلاق واتمنى ماتجرحوني النفسية ماعاد تتحمل ومايحس بالنار الا واطيها