كيفكم ياحلوات .....
اليوم جبت لكم صورة صورتها من سنة تقريباً ..... وحابة اشرح لكم طريقة التصوير لعلي افيدكم بشي بسيط .....
للاسف الشديد ما صورت الورشة .... لكن بحاول اشرح لكم بالتفصيل الممل ....
اول شي استخدمت .... حوض سمك او اي شي شبيه .... حطيت تحته قطعة كرتونة تقريباً بمقاس ارضية الحوض وغلفتها بالقصدير ..... وحطيتهم على طاولة .... الخلفية اي شي اسود عندك ..... الاضاءة هنا استخدمت فلاش استديو .... لكن ممكن تستخدمي سوفت بوكس او لمبات بيضاء قوية عشان تعطيكي اضاءة كافية ..... حطي وحدة يمين الحوض ووحدة يساره .... بالاضافة لاضاءة الغرفة .... لان النوعية هذي من التصوير تحتاج كمية كبيرة من الاضاءة ....... بس في حالة استخدام سوفت بوكس حطي واحد يمين مرتفع شوية بزاوية 45 تقريباً والثاني يسار بزاوية افقية على مستوى الحوض ..... وممكن كمان تستخدمي الاضائة الطبيعية يعني تصوري في الحوش مثلاً .....
الحين نجي للكاميرا ...... نحطها على ترايبود اللي هو الحامل او على اي شي ثابت زي كرسي مثلاً او طاولة بحيث تكون موازية للحوض عشان ما تطلع معاكي صورة مهزوزة .....
انا هنا ما كان عندي احد يساعدني حطيتها على المؤقت ..... بس انتي ممكن تخلي احد يساعدك ويرمي لك البرتقالة وانتي تصوري .... واللي عندها ريموت ممكن تستخدمه ....
نحط وضعية الكاميرا على المانوال ... وكمان الفوكس نعمله عالمانوال .... نحط اي شي داخل الحوض عشان بس نضبط الفوكس .... بعدين نغير الاعدادات ... فتحة العدسة يفضل انها تكون 5 ومافوق .... وكل ما كان الرقم اكبر كان افضل لكن تحتاجي اضاءة اقوى عشان كده خليكي على 5 .... الايزو يفضل يكون اقل من 800 .... والسرعة يفضل يكون اسرع من 1/150 ثانية .... وكل ما كان اسرع كل ما اعطاكي تجميد افضل .....
نبدأ التصوير ..... نخلي احد يرمي لنا البرتقالة او اي شي ثاني وانتي صوري ..... طبعاً ما تطلع معاكي من اول مرة .... تحتاجي كذا محاولة وانتي وحظك ممكن تضبط بسرعة وممكن لا ..... اهم شي الصبر :42:
فيه حركة ممكن تساعد شوية اثناء التصوير .... وهي انك تختاري وضعية الصور المتعددة ... خليكي ضاغطة على زر التصوير خلال رمي البرتقالة وهي تاخذ لك كذا صورة وتختاري منها الافضل .... وبرضه ممكن ما تطلع معاكي من اول مرة ..... تحتاجي محاولات عديدة :)
والحين شوفوا النتيجة اللي وصلت لها .... واتمنى تعجبكم :biggrin2:
