انتقلت الى رحمة الله امي الغالية بعد اول جرعه للكيماوي بعشرة ايام

تبدا قصة امي مع المرض دا قبل شهرين وسته ايام

يوم الجمعه ماما قامت تتروش لصلاة الظهر تلاقي حبه في صدرها اصحتني وقالتلي نروح المستشفى ولا بعد زواجك قولتلها نروح اكيد
وروحنا في العصر وهي من يوم مالقيت الحبه ماتحركت من مكانها
روحنا اول يوم مستشفى الجدعاني ودخلنا عند دكتورة سعودية ماافتكر ايش اسمها
فحصتها وقالت نسوي اشعه احتياط وسوينا ورجعنالها
قال في شك انو في شي بس من دي المرحلة نحولها لمستشفى اكبر تسوي فيها الخزعه
واليوم الثاني من الساعة ثمنية ونحن في مستشفى بخش روحنا وسوت الخزعه مع دكتور سوداني اسمو عباس ابراهيم سويناها واعطانا اسبوع لين ماتطلع النتيجه
طلعت الربوع وقالنا حميد وفرحنا مره وامي الله يرحمها كيف فرحت لما رجعنا نامت من الظهر لين المغرب لانها طول فترة الانتظار مانامت
بس قال لازم عملية مع الفرح ولافكرنا في العملية
روحنا عشان يحدد وقت العملية
ماما قالت للدكتور في خطورة لو اخرتها بعد زواج بنتي قام قال يااختي انا لازم اقولك انتي فيكي كتله خبيثة والافضل ماناخر ولا يوم
انا عصبت كيف قبل يومين كنا عندك وقولت حميد بدا يعلي صوتو وقال يعني من اول يوم تبغيني اقول لاامك لازم امهد لاامك الخبر طلعنا والقلب محروق بس الحمدالله
روحنا بعد بيوم مع بابا عشان تجهيز الاوراق امي كانت في الانتظار تستنى قالت مابغى ادخل قالنا 95بالمية

سرطان
لانها امي ماحطيت الكلام في راسي ابدا
قال لازم توقع ماما على ورقة استئصال صدرها لو دعت الحاجة
دخلت امي ووقعت الورقة


ححدلنا يوم الثلوت العملية
انا كنت طول الليل اصلي
قيام الليل وادعي واقول يارب بشرنا بالخير
اول مانمت حلمت انو مطر يدخل غرفة امي لما صحيت قولت لماما بكيت ومسكت صدرها وقالت يارب مو سرطان يارب ماياخدو صدري

روحنا قبل مايدخلوها قالت ابغاك تسامحوني كلكم حضنها وطمنها بس اخويا الكبير راح وكان يبكي
دخلت امي غرفة العملية وانا واختي الوسط نبكي جمب الباب وبابا المسكين معانا الله يحفظو
دخلت الساعة 9 وطلعت الساعة وحدة ونص وهو قالنا االعملية تاخد ساعة بدانا نتوتر طلعت امي الحدالله وقعدنا في المستشفى خمسة ايام قرب زواجي كان باقي عليها عشرة ايام جات خالتي من الرياض وبدات تطلعها من الحالة النفسية للمعلومية امي اصغر وحدة في اخواتها امي رحمة الله عليها عمرها 45 سنة

اتزوجت وثاني يوم في الفرح قالتلي انا خلاص اطمنت عليكي
بعد الزواج راحت عند دكتور محمود شاهين في مستشفى بخش عشان تبدا جلسات الكيماوي
حددلها ستة جلسات مع اشعاعي ومناعي وهروموني وهيرسبتن
قال كلو دا تقريبا حيكلف نص مليون
امي مرره اتحطمت وقال انتي فيكي اقوى نوع سرطان مرره اتحطمت بس ماكانت تبكي بس تدعي وتقول الحمدالله احسن من غيري امي ماحبت الدكتور ابدا لانو ثقيل مرره مايطمنك في كلمة
عشان التكلفه غالية روحنا مستشفى الجامعه عند دكتور عامر رضوي الله يرزقو الجنة


روحت معاها بعد زواجي باسبوع يمكن طمنها وقالها بعد كل جلسة كيماوي اشوف حالتك يمكن ماتحتاجي دا كلو
وسالتو امي فيها اقوى نوع قال مين قال قولتلو دكتور محمود شاهين قالي لا
كان يطمن امي الله يطمنو ارتاحتلو مره وعجبها المستشفى اكثر من بخش
حددلنا سبعة تقريبا ثمنية الاف في الجامعه اما في بخش حددو 17 الف للجرعه الوحده
سوت الكيماوي بعد زواجي 15 يوم كانت قبل الكيماوي معنوياتها مرتفعه تروح عند المرضى وتتونس امي مره اجتماعية الله يرحمها
اعطوها اول يوم ادوية عشان الجسم يتفاعل مع الكيماوي
اليوم الثاني سوت الكيماوي وطلعنا كانت تقول امي الله يرحمها احسو حار يحرق جسمي زي الطلق ظهري يعورني
طلعنا في نفس اليوم ماكان فيها ولا شي بس مررره معصبة قال الدكتور طبيعي عشان السكر مع الكيماوي حيرتفع اول اسبوع

ثاني يوم بدات الالام وجع في البطن طفح جلدي في الاصابيع والفم اسهال بس كان الم البطن يقتلها كل يوم
كنا كل يوم نروح المستشفى تاخد مسكنات وادوية بس كان يهدى كم ساعة ويرجع ثاني

كنت متفقه معاها تجي عندي اول يوم تعبت وماجات تاني يوم تعبت وماجات ثالت يوم قولتلها انا حجي اخدك قالت خلاص طيب نروح البحر اول شي نتمشى ونحن في الطريق ممره تعبت طول الطريق هي تقول يارب سخرلي من خلقك الطيبين
على حظ امي الدكتور مايداوم الا يوم الاحد كان يوم احد راحت ودخلت قالها الكيماوي مايعور البطن كدا طلع معاها دخلها الطورائ ورجعلها الفلوس الميتين حق الكشف ودق على واحد في الطورائ قالو ابغاك تخدمني حتجيك مريضة اسمها كدا كدا لاتاخد منهم الفلوس وسويلها اشعه
امي كانت طول الطريق تدعيلو
قالو مافي شي واعطاها مسكنات ورجعنا البيت كلمتها اليوم اللي بعدو تجيني ياامي قالت انا يمكن اموت وماادخلك بيتك بس اول ماكون بخير حجيكي دا كلو ولاجا في تفكيرنا انو امي فيها شي

ارتاحت الاثنين ومافي شي عورها الحمدالله الثلوت تعبت وبدات تسخن الربوع في الفجر مارضيت تاكل ولا شي قالت امي الله يرحمها حعالج نفسي بنفسي ماحست بالم ابدا بس في الليل قالت نفسي معصوب جابلها بابا واكلت الصحن كامل مع انها ماتاكلو


راحت مستشفى بخش دخلوها الطوارى ومسكنات زي كل مره
ضاقت الدنيا عليها في المستشفى وسحبت الابر اللي فيدها وطلعت وجات البيت من الباب وهي تصيح وتبكي من الام
امي طول فترة مرضها تقول ربي اني الضر وانت ارحم الرحمين ماعاد اليوم دا طول اليوم وهي تشهد وتقول يايتها النفس المطمئنة ارجعي الى ربكي راضية مرضية

اول ما اذن الظهر كانت رايحة الحمام مع التعب سوتها في نفسها اول مادخلت الحمام شغلت الموية على ابرد شي وقال يارب عزني لما طلعت من الحمام السكر مره ارتفع وكانت تقول مااشوفكم

راحت المستشفى دخلوها الملاحظة سوولها اشياء كثير للظغط لانو نزل مره ومو راضي يصير طبيعي
بعدين دخلوها العناية المركزة

امي بنفسها لبست الثياب حق المستشفى دخلت وهي صاحية قبل ماتدخل قالت لمرة اخويا سامحوني كلكم بدات تحس انو في شي

دخلنا في موعد الزيارة كلنا امل انو امي حتقوم ماجا في بالنا انها حتروح الدكتور محود شاهين قال الحالة جدا حرجه مافي اي استجابة لين الحين الكلية اتوقفت وركبنالها جهاز تنفسي امرها بيد الله وادعولها
دخلنا وشفنا امي الله يرحمها
بعد ماطلعت من المستشفى دقيت على الشيخ اللي امي تتعالج عندو قالي انا امس كلمتها ماكان فيها شي
قالي تروحي عندها وتقري عليها سورة الفاتحة سبعه مرات بهدوء
رجعت المستشفى ورضي يدخلني المناوب جزاها الله خير اول مابدات اقرى رجلها اليسار رفعتها وبدات تنفض وتطيح وبدات تتفاعل معايا كانت تحرك وجهها وترفع يدها اخر شي مسكت يدها وقولتلها استودعكي الله وبستها وحطيتها على السرير اول مااعطيتها ظهري رفعت يدها اللي مسكتها رجعت كلمتها وطلعوني وبعدها ماشوفت امي الا في المغسلة نفس يوم وفاة امي انا كملت شهر زواج

ماما الله يرحمها قعدت في العناية من العصر لين الساعة 3 الفجر مافي اي نتيجة انتقلت الى رحمة الله الساعت 3 وخمسة وعشرين دقيقة
فجر الخميس من يوم مااكتشفت امي الكتله شهرين وستة ايام نحسها كانها سنيين

دعواتكم لامي برحمة والمغفرة اللهم انقلها من الضيق اللحود ومراتع الدود الى جناتك جنات الخلود اللهم جازها بالحسنات احسانا وبالسيئات عفوا وغفرانا الله اجعل مرضها وهمها ونصبها كفارة لجميع دنوبها اللهم اجزها جزاء الصابرين

اللهم حرم دمها ولحمها عن النار اللهم ارزقها الجنة بغير عداب اللهم اجعل قبرها روضة من رياض الجنة اللهم اجعل القران ونيسها في قبرها اللهم انس وحدتها وانس غربتها وانس وحشتها