انتي زوجة اب تعاالي اهديك قصتي

السلام عليكم ورحمة الله وبركاته
اخباركم كيفكم بنات حواء
انا عضوه جديده وهذا اول موضوع لي
انا قريت قبل ساعه تقريبا موضوع للاخت حنونه عنوانه انا وزوجي وبنته

وحبيت اقولكم قصتي لعل احد يستفيد منها ويتعظ

انا تزوجت مطلق وعنده بنتين فترة الخطوبه ماقالي انه بيجيب بناته قالي لاصارو صف ثالث
المهم تزوجت وع طول حملت لما وصلت شهري التاسع
جاني يقول ان طليقته ملكت وخلاص بتتزوج وانه بيجيب البنات
انا بالبدايه عارضت وقلت صغار وامهن مسؤله بنربيتهن وانا توي عروس ليش انحرم ماخذ راحتي لابلبس ولابطلعات لحالنا ولا ولا ولا

المهم حاول يقنعني رفضت بعدين سكت بس حيل تضايق ورحمته ووافقت

بعدين جابهن وانا بالتاسع وحيل كنت تعبانه الصغيره عمرها ٣ سنوات والكبيره سته تعبت مع الصغيره حيل كل شوي حمام ماتعرف تروح لحالها وتعرفون اللي حامل وبشهرها ثقيله حيل من اخلص شغلي اتمدد كل شوي تجي تقول حمام الله يكرمكم عاد هي ماشاء الله اكوله حيل وتشرب كثير كل عشر دقايق تجي احيان ورى بعض ولاجاء وقت النوم غير ننومهن مايروحن لحالهن وتخاف الصغيره معوديهن ينامون معهن ومايعرفن يلبسن لحالهن خاصه الكبيره

المهم تعبت تعبت واختها الكبيره وش اقولكن جنيه لايمكن الجنيه اعقل منها 😄

كانت حيل تصرخ لاجت بتناديني بقوه ولاترد علي وبس تضرب اختها الصغيره والصغيره لابكت ماتسكت تطول تصيح
وكانت تحوس حيل وتخرب الاشياء اي زينه تقطعها
جربت كل اسلوب معها جبت لها تلفزيون وكمبيوتر والاعبها وانا جالسه معها العب واضحك الكبيره قالت اذ صحى بابا اقوله انك ضربتيني
يعني قصدها تكذب علي انا انجنيت بس عرفت ع طول ان احد موصيها لو تلعب معكن قولن تضربنل قلت لها عادي قولي له اصلا يدري انك تكذبين بعدين يضربك انتي
ولافاد شي معها مارتاح ولاقدر انام بس تبكي اختها وانا بس اهاوش ولاينفع ويديني صارن يوجعني منها حيل لاني اعصب منها وامهن بنفس المنطقه ولاطالبت ببناتها ولاشي
المهم ولدت ولما ولدت بنفاسي مارتحت صارن معاي عند امي وتعبت امي معهن زياده ماعندها شغاله انهرت نفسيا صرت ابكي من الكبيره جننتني لكن الصغيره كانت مطيعه وهاديه وبفترة نفاسي عند اهلي علمت الصغيره كيف تروح الحمام لحالها وعلمتهن كيف ينامن لحالهن بدون ماروح معهن انومهن والصغيره انفجرت عليها بيوم لان اي شي يبيكها لو احد قالها بعدي بكت وحيل صراخ وانا انفجر عليها هاوشتها حيييل بس بدون ضرب بس كلام قلت تسوين كذا والله ماتروحين معاي لاي مكان تجلسين بالبيت عندابوك وتكلمت عليها كلام لاني ادري تفهم مو تقولون ٣ سنوات مايفهم الا يفهمون بس الاهل دايم يحطمون
بعد المحاضره الطويله العريضه ماقولكم صارت ماتبكي الا تبكي بس تسكت بسرعه تذكر كلامي ومانرفع صوتها بعدين صارت تدريجياً ماتبكي نهائي الحمدلله

بعد نفاسي ماكملته كله رجعت البيت وجلست اشتغل وانظف لهن وانا نفاس وببيتي تعبت نفسياً
من طلعت نفاسي بديت اعلمهن واربيهن صح للن خلاص طول العمر عندي مو معقوله نبقى كذا دايم
قلت لكم الصغيره علمتها الحمام بتشجيع قدام ابوها اقول شفت فلانه صارت كبيره تروح الحمام وهو عاد يشجع معاي زياده واقول صارت كبيره ماهي دادا تخاف تنام لحالها وتستانس حيل وصارت اذ قلنا صغيره تزعل

اما الكبيره مسكتها بيوم لان الطيب مانفع معها والاسلوب الزين مانفع عاقله قدام ابوها ولاطلع طلعت براسي نخل وتضرب اختها
بيوم من طلع راحت ضربت اختها وانا اقوم اصورها مقطع فديو 😁😁😁😁 واروح يمها معصبه بقوه وامسكها بيدها قلت اسمعي انتي عندي لازم تطيعيني وتعقلين ان قربتي لاختك ولاصرختي ولاخربتي شي ولا سويتي اي شي اعلم ابوك واوريه يوم تضربين اختك وانصدمت لما شافت المقطع وانقلبت من العنيدع اللي تطلبني ياخاله اخر مره امسحيه اقعد مؤدبه
قلت لامامسحه لين تادبين
وطبعا انصدمت اول مره اصرخ عليها كذا واهاوش حيييل بقوه حسيت ببكي لاني انفجرت لي شهرين اجاريها مانفع
ومن بعدها بدت شوي شوي تتأدب وشوي شوي تتعلم وان اخطت ع اختها اخلي الصغيره عندي تلعب مع اختها اللي هي بنتي والكبيره اخليها تجلس بغرفتها لحالها عقاب
واحيان يجي ابوها يسال ليش لحالها واقوله انها تعاند وماترد ويهاوشها وخافت وبدت تتغير

اما الصغيره حيل تعلقت بي وكلهن يقولن لي خاله
جتني بيوم من الايام قالت ابي اقولك ماما قلت خلاص قولي ماما وصارت تناديني خاله ماما😄 هه

وبيوم من الايام كنت انظف بالمطبخ ورحت المجلس مدري شكنت ابي اخذ سمعت الكبيره تحرش اختها تقول لاتقولين ماما هذي ماهي ماما قولي خاله والصغيره تقول الا ماما
وانا ادخل قلت مالك دخل فيها ع كيفها تقول ماتبين تقولين ماما كيفك بس مالك دخل فيها
وصارت قدام ابوها تسوي زي اختها تقول ماما ولاطلع قالت خاله
وسكت ماقلت لها شي قلت براحتها
وبعدين بدن المدارس وسجلت بصف اول الكبيره والصغيره سجلتها بروضه واروح معها وادرسها وماشاء الله حييل ذكيه وكانها كبيره عقلها
وبديت اعلمهن شلون يلبست لحالهن واسوي لهن مسابقه اسرع لبس الصغيره ماتعلمت البلوزه تلبس بس تلبس بنطلونها والباقي اساعدها فيه اما الكبيره تعلمت تعتمد ع نفسها وعلمتها شلون تلبس اختها لو اكون مستعجله ولامشغوله تساعدني وتعلمت
وارتحت عند الطلعات يلبسن لحالهن بس اربط لهن واسحب السحاب
وجبت لهن خزانه واثثت لهن غرفه حطينا فيها العاب وزحليقه وتلفزيون وجبت لهن سيفر وحطينا لهن بس قنوات اطفال وعلمتهن ع الريموت كيف يغيرن فيه وكيف يقصرن ويرفعن الصوت 😄 وصارن اغلب الوقت بغرفتهن وانا صرت ع تلفزيوني لحالي اول كانن معاي بنفس المجلس ولا اخذ راحتي مع زوجي بشي وازعجني صوت التلفزيون

وصرت مع زوجي لحالي وصارن هاديات ولافيه صراخ ولافيه هوش ولافيه عناد
واذ كنت اشتغل زوجي يقولهن ساعدن ماما ويجن يشتغلن معي انا اغسل الصحون هن يضبنهن باماكنهن حفظن كل شي مكانه ويتهاوشن كل وحده تبي هي تضب اكثر وكل وحده تقول انا اساعد ماما

والكبيره تعلقت بالشغل حيل مره قالت ماما ابي ارتب غرفتك قلت غرفتي لا ماتعرفين قالت الا اعرف واصرت قلت طيب
والله يابنات كنها وحده كبيره حيل احسن من ترتيبي التسريحه صارت مرتبه اول حوسه
وصارن يرتبن لي البيت انا بس اكنس واطبخ واغسل وهن يضبن ويرتبن طبعا باختيارهن ومستانسات نسولف وحنا نشتغل ونضحك

وصرت لما اطلع اتمشى مرتاحه مافي ازعاج اول كانن حيل يصرخن بالسياره ومقدر قدام زوجي اقول لاتصرخن بيقول ماتبينهن لما نجي نبي نروح مشوار اقول اللي تجلس هاديه بالسياره اجيب لها هديه وفعلا. خلاص تعودن بدون هدايا ساكتات ويتفرجن كل وحده ماسكه شباك 😁😁

وصرت لاقلت كلمه يسمعنها وسويت لهن دفتر يجمعن نجوم قلت الي تطيع كلامي نجمه واللي تخطي ماناخذ نجمه واللي تجمع نجمات كثار عي تاخذ هديه وفعلا مره اجيب لوحده بس ومره لىهن كلهن ولايزعلن

والحين يابنات حتى الغسيل احيان اكون تعبانه هن يدخلنه لي والله ومن جد شفت النفع منهن لاني طيبه معهن واحسن من امهن صرت
صارن يساعدني بكل شي ويحبني حيل حتى اذ دخلت الحمام وانتن بكرامه القاهن واقفات عند الباب ينتظرني
ويمسكن لي اختهن لاصرت مع زوجي بسولف ولا ليله رومنسيه☺️ ماتزعجبني النونو


وانا ماجبرتهن يقولن ماما قالن من حالهن لانهن حسن اني ام
وبقولكن شي يحزن يابنات
الصغيره الحين صار لها ٤ سنوات قالت لي قبل شهر سالفه عن امها واستغربت ماقالت ماما قالت زوجة فلان قلت ليش ماتقولين ماما قالت شلون هنا امي وهناك امي خلص في ام بس

قصدها ان مافي الا ام وحده مايصلح ٢ والله ماصدقت ان هالكلام منها قلت طيب حتى هي امك حرام قولي ماما قالت لا

عموماً انا اختصرت كثير ورسالتي لزوجات الاب لاتضربن عيال ازواجكن مالهم ذنب حرام والله لايسامح اي وحده تضرب تحت مسمى التربيه
عمر التربيه ماكانت بالضرب
وانتن على خير عظيم وهذي من نعم الله علينا ان حط عندنا انفس بريئه نكسب الاجر فيها ويمكن يكونو سبب دخولنا الجنه بلا حساب ولاعذاب بأذنه