أم هنوو هلا بك يا الغلا

ترى أجزاء القصة محظرة عندي بس والله ماحبيت أحطها دفعة وحدة كتبت كل جزء على قدر إستطاعتي في وقت سابق وحبيت أنزلها

لكن ماحبيت أجيب الأجزاء سوى خفت أن القصة ماتهمكن وأحس أن قصتي مالها داعي وتراني نزلتها في ملفين غير هالملف والله واحد مرت عليها الردود وماكأنها موجودة :( عرفتي ليش مانزلتها عشان والله ما أتحطم

وعلى شان عيونك وعيون هذاك أول الله يجبر بخاطركن بنزل باقيها في هالملف

الجـــــــــــــــــــــزء الثــــــــــــــــــــــاني ’’’’ أرجو أنك صاحية يا أم هنووو

اكمل لكم احداث قصتي

بعد مارجعت من المستشفى كنت احس بنار في جوفي لاْني ما قدرت اْشوف وليدي

يوم دخلت البيت ولاهذي امي تلاقيني ووجهها مره شين عرفت السالفة قبل ما ارجع دق عليها اخوي اللي سبقنا

للمستشفى وساْلها عني وقلت له اْني في الطريق للمستشفى وساْلته عن ولدي فحب يدرج الخبر عليها لاكن هي حست

اْنه مات فقالت له هاه مات فقال لها ايه بس ماراح اقول لاْمه اذا جت

المهم امي حضنتني وقعدت تواسيني وتقول الله يشفيه وتقول لي رددي دعاء اللهم اْجرني في مصيبتي واخلفني خيرا

منها وصرت اردد الدعاء واذكر الله وحسيت براحة وكنت خايفة على ولدي لايموت او ينشل المهم امي ذاك اليوم كانت

صايمة الاْثنين وصارت تدعي لي وقت الفطور وتدعي لولدي وفي نفس الوقت تقول واضح ان حالت ولدك خطرة مره

لاْنهم مانعين الزيارة طبعا هي تقول كذا عشان اتوقع اْنه بيموت وتقول الله يستر لايعيش مشلول وتذكر لي الشفاعة

وفضلها وحسيت اْن ولدي لو مات راح افوز بشي عظيم اْجر الصبر والشفاعة

المهم وامي تطلب لي قلت لها اطلبي للي صادمه اكيد هو الحين حالته صعبه وممكن تكون اصعب مني ودعينا له كلنا

حتى هو مصيبته عظيمة

بعد الصلاة خذت المصحف اقرا فعلا من عرف الله هانت مصيبته وسبحان الله مع اْن ابوي ماكمل اسبوع متوفي لاكن

خلاص لهينا في ولدي

وكنت ادعي في الصلاة ان الله يختار لولدي بالصالح وصرت افكر في الاْخرة واقول يمكن موته يرفعني منازل في

الجنة ويفيدني اكثر من حياته

لاتنسوني من دعائكم يا الغاليات وبنزل الجزء الثالث إن شا الله

الجــــــــــــــــــزء الثالـــــــــــــــــــــــــث

وصلت الى اْني مابعد عرفت بموت ولدي طبعا كل اللي في البيت عارفين حتى الناس وصلهم العلم قبلي بس كلام امي

الله يجزاها خير عن الشفاعة وحاجتي لها في اليوم العظيم خلاني احس اْن حياته نعمة وموته نعمه والحمدلله مابطلت

دعاء واسترجاع

وابو الولد جا مع اخوانه وبرضوه ماكان يعرف بموت الولد اْلا يوم وصل للمستشفى وكانت صدمة ماتوقعها

والله يجزاه خير تنازل في الحال عن اللي صادم ولده وما اْخذ دية ولاشي واحتسب الاْجر من الله بعد ما انتهى الموضوع

حب يمر يشوفني انا والبنت بس قال له اخوي اْنها ماعرفت شي للحين ومن الاْحسن تاْجل الشوفه بعدين فمشى على

طول للرياض

بعد مارجع اخوي ساْلته اْمي عن زوجي واخوانه فقال مشوا للرياض استغربت روحته من غير مايسلم علينا

وساْلت اْخوي عن ولدي وقال لي حالته رديه قلت له ترى موته اْهون من يعيش مشلول

قال اْجل تراه مات كنت واقفة وجلست ابكي و استرجع واْقول له الله يبشرك بالخير بلقاه ان شا الله عند باب الجنة طبعا

كل اللي عندي ماتحملوا الموقف ودمعت عيونهم وصاروا يعزوني وانا الحمد لله من فضل ربي صبرت عند الصدمة الاْولى

طبعا هذي نعمة من ربي لو اضل اشكره عليها طول العمر ماوفيت بعدها ساْلت اخوي عسى ابو ولدي تنازل عن الرجال

قال ايه تنازل قلت الحمد لله

سبحان الله من ذيك الليله حسيت عندي كنز مايملكه اْي احد ولاينشرى بالملايين ولو يقولون تبغين ولدك يرجع قلت لا

الاْخرة خير واْبقى بس كنت حاطة في بالي انهم بيجيبون ولدي اشوفه واودعه الوداع الاْخير

ولاكن بقى عندي هم الا وهو ابو الولد ما ادري وش شعوره

والحمدلله نمت ليلتي وانا مرتاحة صحتني امي الصبح وهي تبشرن برؤيا شافها اخوي يقول شفت النبي ابراهيم شايل

ولدك ويقول بشر؛؛؛؛؛؛؛؛باْسمي بمنازل الصابرين في الجنة يقول اخوي وانا في الحلم صرت اقول كليم الله يبشرك

بكذا وكذا وكنت بقول خليل الله

طبعا ابراهيم عليه السلام هو اللي يكفل الاطفال بعد موتهم ما ابي اكثر من هذا يعني ان شا الله عيشة ولدي بتطلع

احسن من اول

وأنتظرن الجزء الرابع

الجـــــــــــــــــــــــزء الــــــــــــــــــــــرابع

قبل ما ابدى في اكمال القصة احب انوه عنه أختي بعد ماقرت القصة قالت اتذكر اْن اخوي يقول اْن

النبي ابراهيم في الرؤيا ماكان شايل ولدك كان النبي واقف وعنده اْطفال وباقي الرؤيا مثل مارويت لكم حبيت اوضح

لاْني شكيت في الاْمر وارجوكم دعواتي لاْختي مجد للكبار بالذرية الصالحة

بعد ماسمعت الرؤيا من امي شعرت بسعادة ماتوصف وساْلتهم متى بيجيبون ولدي عشان اودعه وداع الدنيا وفي الجنة ا

للقاء ان شا الله وكانوا كلهم يقولون مو احسن تشوفينه وانا اصريت وقلت لهم شوفتي لاْبوي الاْخيرة نفعتني ماضرتني

لاكن قالوا هذا غير ولدك وتوه صغير ويمكن مايبغوني اشوف تاْثير الحادث عليه وكلمني خالي واقنعني بعدم شوفته

لاكن الى الاْن وانا اتمنى اني شايفته ولاكن جعل في الاْمر صالح وخيرة

جاني اخوي اللي شاف الرؤيا وجلس يقصها لي مرة ثانيه وهو يبكي ويقول ماشا الله تنغبطين على هالشي

بعد صلاة الظهر كلمت زوجي اعزيه وانا خايفة من ردت فعله في البداية كان يبكي وبعد ماسمع كلامي ارتاح كنت اقول

له الكل منا يتمنى كفالة نبينا ابراهيم عليه السلام وش نبي لولدنا اكثر من هذا غير اْن الجنة مضمونة له ان شا الله وقلت

له يمكن نفعه لنا بعد موته اكثر من حياته

والحمدلله ارتاح ابوه كثير لاْنه كان متضايق علشاني كان يتذكر وشكثر حزنت على ابوي فتوقع مني اكثر من هذا

عشان ولدي حتى اخوانه لاحظوا عليه التغير بعد المكالمة وهذي نعمة كبيرة منّ الله بها علي انا وزوجي

اخواتي اتصلو يعزوني من الرياض وكانت الحسرة تملاهم فبعد ماسمعوا كلامي ارتاحوا وصاروا يكلموني دايم يقولون

اذا كلمناك ارتحنا

صلوا على ولدي صلاة العصر وقبل ست ايام صلوا على ابوي صلاة العصر فالحمد لله على كل حال

بعد الصلاة جتنا زوجت اللي مسوي الحادث مع ولدي وكان واضح عليها التوتر كنت انا وامي وثنتين من اخواتي فجت

وسلمت رحبنا بها كاْعز ضيفة فساْلت وين ام الولد قلت انا وبكت حضنتها وقلت الحمد لله انا مرتاحة وقلت لها عن الرؤيا

وماقويت اكمل لاْني بكيت وطلبت من اختي تكمل والحمد لله الحرمه طلعت من عندنا مرتاحة

وصار كل من اتصل يعزي مايتوقع اْني ام الولد واللي جاونا للبيت يستغربون الراحة اللي انا فيها

وصرت احمد ربي واقول هذي نعمة من الله ما هي مصيبة

ما اخفيكم اْني اشتاق له واتمنى احضنه طبعا ولدي كان بيدرس مع بداية السنه وكان دايم يردد متى ادرس واقول خلاص

مابقي الا شوي ولاكن مات قبل مايشوف المدرسة ومع بداية الدراسة صرت اتذكره وابكي ولاكن مع اني اشتاق له لاكن

ما ابغاه يرجع املي به في الجنة ان شا الله

والحمدلله الموقف هذا الى الاْن يسعدني كل ماضاقت بي الدنيا وذكرته ارتحت وحمدت ربي عليه وصار له اثر في حياتي

وابشركم بعد مرور 11شهر من موت ولدي رزقني الله بمولود سميته عليه

ورجعنا كما كنا في السابق الحمد لله لوكان المتوفي ابوه مستحيل ترجع حياتي زي اول

والحمد لله على كل حال

على فكرة انا منيب شاعرة ولاكن قلت في ولدي شعر معبر عن اللي في خاطري بس ماهو لذيك الدرجه

ان شا الله بكتبه قريبا في موضوع لحاله

ومعليش طولت عليكم

ختاما شكر خاص لكل من رد على قصتي واحاطنا بالدعاء

وشكر عام لجميع من قرا القصة وارجوكم الدعاء الدعاء

اختي العزيزة اصايل

الله يثبتك ويعوضك خير ويفرحك بجمعك مع ولدك في جنات النعيم


:26: :26: :26: