السلام عليكم ورحمه الله وبركاته
اش اخباركم بنات استراليا انققطعت عنكم كثيييير والحين راجعه لكم من جديد انا كنت الشهر الماضي في استراليا رحت القولد كوست وملبورن وماونت بولر النت هناك كان انجليزي وما كنت اقدر اتكلم معاكم من هناك ...


عطوني اخباركم مين ولدت ومين حامل ومين رجعت لبلد...

اما بالنسبه لسؤال اختي شكشوكه في قولد كوست ما انصح تقعدين اكثر من اسبوع ونص او اسبوع واحد فقط يكفيك ويزيد لاني انا جلست فيها شهر وملييييت بس ملبورن قعدت فيها اسبوع وما كفاني لانها اكثر جمالا من قولد كوست فهي في مبانيها تشبه لندن كثيرا اما قولد كوست فهي بلد عادي ما فيها مباني فخمه كثير يعني يمكن الي انا شفتهم فخمه بس اثنين وقولد كوست للسياحه حلوه بس انصحك تخلينها للالعاب فقط اما التسوق خليه في ملبورن لانها عاصمة الازياء والاناقه...


لان الالعاب فيها رووعه عندك في قولد كوست انصحك تروحين العاب

دريم ورلد وما راح يكفيك فيها يوم احجزي ليومين فيها راح تنبسطو كثير
والموفي ورلد يكفيها يوم
اما السي ورلد يكفيها يوم
ما انصحك تروحين الويت ورلد لانه الجو بارد وما راح تستمتعين فيها


عندك الاسواق في شارع السيرفس بارادايس في القولد كوست يوجد فيه اسواق كثيره حلوه
عندك الباسيفيك فير حلو جيد يعني
اما مجمع استراليا فير حلوو كثيييير ومممتع وفخم صراحه كل المجمعات اللي عندهم اسعارها نار بالنسبه لنا وهذا بسبب فرق العمله...كذا اقول لك خوذي احتياطاتك ترى البلد هناك ناااار غالي

ومثال على الاشياء الغاليه موية الصحه الصغيره اللي ناخذها في السعوديه بريال ناخذها هناك بتسعه ريال وارخص شي في موية الصحه اللي هيه كوول ريدج سعرها بدولارين يعني سته ريال سعودي...


عندك طبعا المنتجات الغذائيه راح تلقين كولز حلو وفيه كل شي تبغينه واذا بغيتي لحم حلال عندك عاصم حلال في القولد كوست يوصل اللحم لحد الفندق..
وانصحك انك تطبخين في البيت لانك ما راح تلقين مطاعم حلال الا نادرا وراح تكون غاليه ومكلفه وعندك مطعم في السيرفس بارادايس يبيع ساندويشات كباب يبيع فيه واحد عراقي مسيحي وواحد من الشام مسلم ..لذيذه ساندويشاته

عندك للثلوج ماونت بولر تبعد عن ملبورن 3ساعات ...روووووعه

اذا توهقتي في موضوع الاكل خذي من المطاعم العاديه بس فيجيتبيل يعني اكل نباتي في برجر نباتي لذيذ وفيه اشياء كثيره نباتيه لذيذه..
خصوصا في مدن الالعاب راح تلقين اماكن مخصصه للصلاه بس ما راح تلقين مطاعم حلال
كذا اذا طلبتينهم اكل نباتي راح يكون موجود عندهم...

اتمنى اني اعطيتك المعلومات الكافيه..

مع تحياتي ام لمى

اهليين اختي moon2006الحمدللة على سلامة الوصول..
الصراحة عجبني وصفك للأماكن اللي رحتي لها مشالله عندك معلومات وافية..بس مدري انتي كنتي تتكلمين عن قولد كوست ولا عن ملبورن أنا جاية للملبورن ياريت تتكلمين عنها بالتفصيل مثل اللي قلتيه..ومشكووورة كثير

عزيزتي عندك ملبورن روووووعه احلى من قولد كوست بكثير

الاسواق روووعه وعندك شارع كله عرب اسمه سدني روود

عندك الارياف تجنن حاولي تزورين عوائل استراليه عايشه في الارياف بتنبسطين كثيير

والشي المهم اللي لو ما زرتيه بيفوتك ...اللي هو ماونت بولر هاذي منطقه كلها ثلوج كانك في الاسكيمو....

وانصحك تتعرفين على عوائل عربيه وتزورونهم في بيوتهم راح تتمتعون كثيير...

وعندك في شارع سدني روود لحام عربي يذبح لحم حلال ولذيذ...ومطاعم كثييير عربيه للبيزا والشاورما بس مشكلتها البلد غاليه ناااار يعني المويه اللي تشترينها في السعوديه بريال تشترينها هناك بتسعه ريال وارخص شي في المويه بسته ريال اسمها كوول ريدج...

عندك اذا بتروحين ماونت بولر اجلسي فيها يومين لانها رووعه بكل معنى الكلمه خياليه....

وعندك اسالي عن الاحياء الخاصه بالعرب وسوي لهم زيارات وخذي معاك تمر ومكسرات وقهوه راح ينبسطون كثير واسالي عن المدارس الاسلاميه وزوريها لانهم يستقبلون الزوار بكل صدر رحب والمدارس الاسلاميه اسالي عن مدرسه ما تسمح الا بمدرسين مسلمين لانه في مدارس تسمح بمدرسين مسيحيين يدرون مواد غير الدين ...

وما في الا مدرسه وحده فقط اللي مانعه توضيف مدرسين غير مسلمين وما كلها مدرسين ومدرسات مسلمين وفيها قسم للنساء وقسم للرجال والنساء فيهم محجبات ومنقبات كثيير حتى انه المنقبات اكثر من المحجبات ...اذا حطيتي في بالك انك تزوري المدرسه قولي ليه لاني اعرف وحده زميله ليه يوم رحنا عزمونا عندهم وانبسطنا كثيير وطلعنا نتمشى مع بعض فاذا قررتي تروحين عطيني خبر علشان توصلين لها سلامي...وعلشان تستقبلك عندها وتعرفك اكثر على البلد..


وعندك من ناحية الالعاب فيه يمكن مدينه او مدينتين العاب...بس حلوه ومشابهه كثير للي في القولد كوست...
بس انتي لما تروحي الثلوج راح تنسين موضوع الالعاب لانه راح تلقون العاب في الثلج روووعه..
.

ولا يفوتك حديقة الطيور هي يمكن من السيتي لين عندها ساعه ونصف بس تستحق العنوه لانها خياليه رهيبه ...رووعه

وبعد لا يفوتك الحديقه الملكيه..عاد هاذي فوق الخيال اذا نزلتي الى اسفلها وشفتي المناظر اللي فوق ما تصدقين انها طبيعيه والله اني حسبتها صوره لاشجار لكن لما شفت واحد يمشي فوق عرفت انها طبيعيه...يعني زي ما قلتلك فوق الخيال وانصحك من ناحية الجوالات انك تستخدمين بطاقة فودافون راح تلقينها منتشره بكثره وسعرها معقول ..

وانصحك لا تحولين الجوال الى دولي..لانه راح تلقين المكالمات باهضه الثمن لانه البطاقه حقت فودافون راح توفر عليك كثير...

عاد من ناحية الملابس انصحك باخذ ملابس شتويه ثقيله لانه البلد مره بارد توصل درجات الحراره الى ثلاثه وسته...لاني انا توهقت يوم وصلت هناك ما حسبت حساب انه راح يكون البلد بهاذي الدرجه من البروده.كذا شريت من هناك ملابس شتويه ...لعيالي...

وخذي الجزم البوت لانه بجد برد وحاولي انك تاخذين القفازات الثقيله والجاكيتات الثقيله من بلدك لانه هناك الاسعار نار وما فيه فرق بينها وبين بلدنا والله اني لقيت اسواره هناك ب30 ريال ولما رجعت السعوديه لقيت زيها ب5 ريال والله اني انقهرت..واغلب اللي شريته من هناك لقيته هنا ..وباسعار احسن ..

لكن اذا بتشتريين اشتري شي من ماركه غريبه وغاليه لانه الماركات الغاليه عندهم مستحيل تلقين مثلها ابدا ..وتبقى معاك لانهم ما عندهم الغش اللي عندنا في الماركات ما تشرين البلوزه الا ما يجي كم يوم الا ولونها اختفى وتوسعت...اما هناك الغالي بقلبه يعني كل شي بحقه الرخيص رخيص والغالي غالي...

واحلى مجمع شفته هناك اسمه تشاد ستون..كل الماركات فيه واحلى شي كي مارت وتارقيت..وغيرها بس احس انه مجمع شامل لكل الماركات الحلوه والفخمه راح تنبسطين فيه مره وانصحك تروحين له من اول ما يفتح لانه ضخم وفخم وما راح يكفيك فيه يوم..وعندك قسم المطاعم هناك فيه مطاعم حلال بس الساندويش الشاورما اللي تشترينه في السعوديه بثلاثه ريال تلقينه هناك بسبعه وعشرين ريال يعني غلا نار كذا انصحك تطبخين في البيت...


وعندك من ناحيه الاكل والبهارات اللي بتجيبينها من بلدك لاستراليا روحي محل مكسرات وخليه يغلفلك التمر والبن والاشياء هاذي ويحط عليها تاريخ انتاج وانتهاء ويكتب عليها اش هي

احنا يوم وصلنا هناك فتشو في المطار وكان في يد بنتي تفاحه اخذوها ورموها لانه ممنوع دخول اي مواد غذائيه للبلد بس احنا قام ابونا وقال له انه هاذي قهوه عربيه مثل الكافي عندكم بس الفرق انه هاذي لونها فاتح والتمر نفس الشي بس احنا ما قالو شي عن التمر لانه كان مفرغ وعليه تاريخ انتهاء ...واصلا همه هناك عندهم تمر يبيعونه مع الفواكه والخضار..



عزيزتي اتمنى اني اكون اعطيتك المعلومات الوافيه

اذا عندك اي استفسار انا في الخدمه
مع تحياتي ام لمى

ام لمى
حمدا لله على السلامه ان شاء الله عجبتكم استراليا
انا رحت السعوديه والحمد الله ارتحت وشفت اهلي وكنت ناويه اكلمك بس مالحقت لاننا وصلنا ايام الاختبارات واعتقد انتي سافرتي اخر يوم في الاختبارات وسلامي للبنات

الحمدالله علي السلامه يا ام لمي
وانا هنا انتظرك علي الخاص علي الاقل نقوم با الواجب
بس الحمدالله ان مالبورن عجبتك وشفتيها احلي من قولد كوست
لما ذكرت ها الكلام الكل صرخ في وجهي ما صحيح
ومشاالله عليك حتي المدارس زرتيها واذا علي الاسعار لا تقولي شي
احنا ما سكين ايدنا الله يعين
نسيت اخبرك انا في مالبورن الماء صافي احنا نشرب من الحنفيه
وكل اهل البلد يشريوا من الحنفيه ما يشتروا من السوق لان سعر الماء
غالي مثل ما ذكرتي


فاطمه
لا تهتمي الحين دوبك باديه المشوار اكيد الغربه صعبه
لكن انشاالله بتهون وارح تلاقي سعوديين كثير وغير السعوديين
في مالبورن والاسواق العربيه كثيره
انشاالله توصلي بالسلامه واذا محتاجه شي امري