انتي متزوجه .. طيب ادخلي موضوع مهم جدا جدا جدا

حيآكم الله
...



اول شي اعزي كل وحده امها او ابوها متوفين ونقول الله يرحمهم ويغفر لهم وجميع اموات المسلمين


ممكن موضوعي محزن شوي للي متوفين والديهم معليش بخليك تتذكرين لحظات الحزن واذا ماودك اطلعي لاتقرين الموضوع



قبل كم يوم اسولف وانا قريبتي وكانت تتكلم عن ابوها تقول ابوي راح وانا ماشبعت منه نفسي يرجع ودي ان واحد من عيالي مات ولا ابوي ع الاقل الولد ممكن يجيني عيال غيره وينسيني شوي اما ابوي لا مافيه غيره خلاص والله دمعت عيني انا الحمدلله امي وابوي عايشين لكن وربي اني دايم افكر بالموت وابكي من تفكير واقول بنفسي لو يصير لهم شي صدق كان انجن انهبل مقدر اتحمل عشان كذا انا دايم اتمنى اموت قبل امي وابوي مابي اذوق حزنهم ربي يطول بعمرهم :44: وصحيح الموت مايعرف صغير وكبير وماله وقت ويمكن نموت قبلهم مايدري الواحد ...
ابيك تحكين لنا موقفك وشعورك واحساسك انصدمتي بوقتها او بعد وقت استوعبتي لما عرفتي ان امك وابوك راحوا عن الدنيا ؟ كيف وصلك الخبر شفتييهم بالمغسله
ومع الايام كيف احساسك ومع السنوات كيف حالتك تتذكرين



اول مره افقد قريب لي مره واحزن عليه هو جدي الله يغفرله عجزت اصدق للحين اتذكر جلسته وسواليفه وضحكته فجأه راح عن الدنيا معقوله انا لله وانا اليه راجعون وكنت اول مره بحياتي احضر العزا صراخ وصياح الله يبعد عنا الاحزان ويجعلها اخر المصايب ولايعيد ذاك اليوم :44: لكن اذا فكرتي كلنا بنموت يانفقدهم او هم يفقدونا بس شي صعب تفقدين غالي والحمدلله على قدر الله مانعترض والله يصبر كل من فقد غالي يارب





دايم يابنات ادعوا ان ربي يرزقنا برهم ترى اذا قدر الله وماتوا بتندمون زياده على انك بتفقدينهم بتحسين انك مقصره

والله دايم اسمع الحريم الكبار يشتكون من بناتهم وانهم مقصرين تخليوا اعرف حرمه كبيره تتشكى على جارتهم تقول بناتي ماكأني امهم مايزوروني ولايتصلون ياعمري مره تحزن تخيلوا تقول وحده من بناتي لي تقريبا اكثر من شهر وانا مادري عنها هي بنفس الديره معقوله ؟؟ فيه بنات كذا الله يهديها بس

ووحده اعرفها كبيره طاحت بفراشها فجأه وماطولت وتوفت لكن قبل تتوفى تخيلوا بعض بناتها مايجون لها الا بعد مده يعني الام طايحه بالفراش تعبانه مره المفروض كل يوم يجون ويشبعون منها ويخدمونها لو شي بسيط عاد ماطولت وماتت الله يغفر لها ويرحمها لكن كانت دايم تنادي عيالها صحيح كانت كبيره وماتدري وين هي لكن كانت تحس وتنادي واذا قالوا لها الممرضات شي قالت اي اللحين بيجون عيالي يمكن ويمكن وتعذر لهم وهي تعبانه وماتدري عن شي

والله كثير كثير اشوف بعيني بنات مره مقصرين مع والديهم
مو تزوجتي تنسين ترى هذي أم حملت ولدت كبرت ربت تعبت سوت شي انتي جربتي بعيالك انتي حطي نفسك مكانها لو عيالك يطولون مايجونك او مايتصلون اكيد بتحز بنفسك ويضيق صدرك هي وشوله جابت عيال مو عشان تبي تتمتع فيهم وتبيهم حولها وهي مازوجتكم الا تبي لكم الستر و السعاده مازوجتكم تبي الفكه والله بعض البنات همها بيتها وعيالها بس امها ولاشي عندها يعني لو تتعب امها وتدخل المستشفى بتقول مقدر اروح عيالي او بيتي او زوجي مايرضى او ظروفي ماتسمح اروح ارافق مع امي يخلون عند امهم مرافقه من المستشفى وهم مايرافقون عشان ظروفهم

بنات والله ان فيه حريم يسوون كذا واردى واذا زارت امها تلقينها لاهيه مع خواتها سوالف وضحك وامها مثل الاطرش بالزفه عطي امك حقها من السواليف والضحك وبعضهم تزعل من امها وتاخذ بخاطرها ميخالف تحمليها كبيره تحتاج انك ماتواخذينها والله لو راحت ان تندمين على سواتك فيها وقطاعتك لها وترى الجنه تحت رجولها ومثل ما زوجك جنتك ونارك هي بعد ممكن تدخلين الجنه او النار بسببها لاتصيرين جافه معها بالكلام والمعامله تذكري يوم كنتي صغيره كيف كانوا يخافون عليك وكيف يخدمونك وكيف امك تعبت عليك ضحت عشانك بكت عليك وكل شي تسويه مانلحق جزاها
وش يضرك لو رحتي كل صبح وتقهويتي معها او عصر ضحكتي وسولفتي وقهويتي يوميا ورجعتي بيتك والله بتفرح ماتصدقون فرحه الام والاب بزياره عيالهم او اتصالهم بفرحون حتى لو مابينوا لكم والله اذكر جدي كان اذا اتصلوا عياله يفرج ويبكي وهو يكلمهم من فرحته واذا خلص مكلم يبدا يتكلم على بناته شفتي ولدي فلان كلمني يسأل عني وهو فرحاااااان الله يجعله بالجنه

وماشاء الله فيه بنات تزوجوا وجابوا عيال وظروفهم صعبه ومع ذلك تتصل على امها يوميا او كل يومين تزورها بالاسبوع اكثر من مره او ع الاقل كل اسبوع مره المهم ماتطول اكثر من اسبوع او تخلي امها تجي عندها يومين ثلاثه وماشاء الله تبر بأمها وتسولف معها وتخدمها وتدلعها وتجيب لها هديه بسيطه ترى والله خصوصا لاصارت امك كبيره بالسن تفرح بالهديه وتفرح بكلمه زينه مثلا ياحبي لك يااميمتي وتقبصين خدها او تبوسين يدينها او تسوين لها مساج وتلمسين رجولها وتساعدينها تروح الحمام وتحنين يدينها وتساعدينها بالترويش وش اقول وش اخلى ماشاء الله ياحظها بالاجر ويسعدها عند ربها ذي
ولاننسى الوالد بعد نفس الشي تكفون بروا فيهم وعاملوهم زين لايموتون الا وهم راضين عنكم لاتطولون عنهم اتصلوا فيهم

واللي والديها متوفين ترى الدعاء والصدقه وصله الرحم واعمال الخير لهم توصل لهم وترضيهم وممكن يدخلون الجنه بسببك

..والله ماكتبت الموضوع الا عشاني اشوف كثير حريم مقصرات مع امهاتهم كثير واشوف الام مره متضايقه وحزينه ..

قال رسول الله صلي الله عليه وسلم
رجلا سأل النبي صلى الله عليه وسلم : أي الأعمال أفضل ؟ قال : ( الصلاة لوقتها ، وبر الوالدين ، ثم الجهاد في سبيل الله )

شوفوا كيف الصلاه اللي هي عمود الدين بعدين بر الوالدين هذا يدل ان بر الوالدين شي عظيم

_____________________________________________


وكان رجل من المتعبدين يقبل كل يوم قدم أمه فأبطأ يوماً على أصحابه فسألوه فقال : كنت أتمرغ في رياض الجنة ، فقد بلغنا أن الجنة تحت أقدام الأمهات . عن معاوية بن جاهمة رضي الله عنهما أن جاهمة جاء إلى النبي صلى الله عليه وسلم فقال : يارسول الله أردت أن أغزو وقد جئت أستشيرك ، فقال صلى الله عليه وسلم (( هل لك من أم )) ؟ قال : نعم ، قال (( فالزمها فإن الجنة عند رجلها)) وفي رواية (( الزمها فإن الجنة تحت أقدامها)) .


_____________________________________________





وروي أن رجلاً لا يصعد على الطابق العلوي وأمه في الطابق السفلي ، فسئل عن ذلك ، فقال : لا أصعد على طابق وأمي تحتي مخافة أن أكون قد عققتها .

وقد قيل : لا تسكن طابق ووالداك في الطابق الذي تحته براً بهما .





_____________________________________________



واخيرا اقول الله يرزقنا برهم
ويطول بعمرهم ويرزقنا رضاهم

ويرحم امواتكم وامواتكم واموات المسلمين