عمرها 11شهر صح والا لا ؟؟
ما أدري اشوف انها لسه صغيره على انك تطلعينها خصوصا اذا ما نتي محتاجه .. يعني حامل أو عندك غيرها اكبر
رأي شخصي وانتي حره
ابسط شي لما يكون نومها متصل ومافيه رضاعه اسهل لك ولها

الله يعينك كم عمر بنتك ؟؟

هذي اول طفله لك؟؟

لأن خوفك مبالغ فيه ربما كنت مثلك بأول طفل لكن بعد التمرس بتضحكين على نفسك وعلى
خوفك المبالغ فيه

الخدامه أكبرخطأ ومع ذلك مصره تنومينها مع بنتك ....
كذا تثبتين لزوجك انك مو قد المسؤوليه وان الخدامه تقوم بمحلك
بنتك محتاجه
لصبرك
تضحيتك

بناااااااات انا عندي نفس الحاله ولدي عمره ثلاث سنوات وشوي والى الان مو قادره اطلعه اخاف عليه وهو متعلق فيني وخواااااف الله يخليكم ساعدوني

موضوع النوم هذا مسبب انشقاق بين العلماء .. وكل طرف عنده وجهة نظر صحيحه الى حد ما .. وكل ام تسوي اللي يريحها والمناسب لها ولعائلتها ..


بالنسبة لي عيالي اطلعهم من هم صغار ..
بنتي من عمر 3 شهور وهي بغرفة لحالها .. من عمرها 8 شهور بدأت تدريبها على النوم من غير مساعدتي او وجودي بالغرفه و الحين عمرها 23 شهر والحمدالله الى حد كبيرالامور مستتبه ..

اخوها بيتم ال 8 شهور قريب ومن اسبوع طلعته فغرفه لحاله .. ولولا بعض الظروف كان طلعته من وههو 3 شهور بعد ..ولسا جاااري تدريبه على النوم من غير مساعده او اعتماد علي ..


وجهة نظري
1- انهم بيكبرون و يعتمدون على انفسهم ، لان هذا انجاز ..
2- اذا انا قاريه عليهم ومستودعتهم الله و اخذت بالاسباب ووضعت جهاز المراقبه .. ان شاء الله ماراح يجيهم شي ..
3- ان الطفل لازم يتعلم ان وقت النوم يختلف عن وقت النهار ..
وقت النوم :للنوم
ووقت النهار: للعب و الجلوس في حضن ماما و محاولة جذب انتباهها بكافة الاشكال :)
4- وحده من الاشياء اللي ما انسى اقولها قبل ما اذكرلك طريقتي مع عيالي .. ان الطفل اللي يعاني من نقص انتباه امه له في النهار وانشغالها عنه .. راح يحاول يعوضه في الليل .. تاكدي من هالشي ..


تجربتي مع بنتي ..
طريقتي هي الطريقه اللي تتبعها سوبر ناني جو فروست ..
طريقه ناجحه على حد علمي ..

اولا السر لنجاح هالطريقه هو : الروتين والاصرار بالاستمرارعلى نفس الخطوات من غير ما تتساهلين يوم و تشدين يوم ..
لان الطفل اذا حس انه فيه مجال للتلاعب راح يستغله الى اقصى حد يقدر ..
اذا حس انه يقدر يقضي الليل كله في غرفته ويخليك انتي الى جانبه بالغصب او رايحه جايه عليه ..راح مايتوانى ..
اذا شافك يوم مصره وتطبقين الخطوات ويوم متساهله وراضيه باللي هو راح يحس بالهشي ويستغله ..




اولا حددي مشكلتك .. طفلك يرفض ينام .. او يرفض ينام لحاله .. او الاثنين !؟

(الطفل اللي يرفض ينام ..) مثل بنتي جنا مثلا
الحل :
اتبع روتين يومي للنوم .. بعد العشا .. الترويشه وتفريش الاسنان
وبعدين نقرا القصه و شوي لعب هااااااااادئ واسولف شوي معاها ..
بعدين خلاص اقولها وقت النوم ,, ماعندي لعب بهالموضوع .. ما اسالها تبين تنامين .. لأ لقولها يلا جنا وقت النوم ..

احطها في سريرها .. نقرا الاذكااار و سور المعوذات و الاخلاص واية الكرسي ..
استودعها الله .. وابوسها على خدها .. واقولها تصبحين على خير ولا اقول كلمة زياده..
اشغل الجهاز حق المراقبة
اطلع واسكر الباب ,,


اذا بكت .. واحيان تسويها تقعد تبكي علشان تدف وقت النوم ..

انتظر 4 دقائق قبل ما ادخل ..
اذا خلصت ال 4 دقائق .. ادخل بهدوء وانا ساكته واخلي الانوار مطفأه ولا اناظر بعينها مباشره لان اذا قعدتي تتكلمين و تناظرينها مباشره تأكدي ان الموضوع بياخذ وقت طويل على الاقل نص ساعه زياده او عدة ساعات بعد ..

المهم .. اذا دخلت اسمي عليها بصوت واطي و اخليها تنسدح وامسح على راسها شوي
وبس اقولها وقت النوم جنا ..
واطلع ..

وهكذا
الى ان تنام
بس زيدي المده قبل ماتدخلين بعد 4 دقائق 8 ثم 12 ثم 16 وهكذا

مع الوقت راح تقل عدد دخلاك وراح توصلها الرساله وتفهم .. ان هذا ليل وقت النوم في سريري لحالي من غير مااحتاج احد ينومني ..

التدريب ياخذ اسابيع ..
بس من جد النتيجه تستحق العناء ..

وطبعا .. وقت المرض ووقت التسنين او اذا صار فيه تغيير قوي في الروتين اليومي .. تاكدي راح يخرب النظام نوعا ما ..
بس تقدرين تصلحينه وتعيدين نفس الخطوات .. وانتي وشطارتك وصبرك ..

طيب .. اذا بنتيك رافضه تنام لحالها او رافضه تنام في سريرها .. ايش تسوين ؟
الحل :

بعد ما تسوين روتين النوم مثلا الروتين اللي ذكرته فوق ..
( العشا الترويشه تفريش الاسنان القصه اللعب الهادئ السوالف القرآن والبوسه وقولة وقت النوم )
طفي اللمبه وخلي باب الغرفه مفتوووح ..
جيبي كرسي واقعد ووجهك على جنب .. يعني مو مقابلتها لا خلك على جنب ..
راح تقعد تبكي وتقول ماما وتحاول تخليك تناظرينها او تلعب معاك ..
المهم انتي لاتناظرين في عيونها مباشره ولا تتكلمين الا بكلمتين " وقت النوم "
كل ماقامت من سريرها رجعيها له وقوليلها بهدوء وقت النوم وارجعي لكرسيك وهكذا الى ان تنام ..
ممكن في البدايه تاخذ منك ساعه ونص كل يوم او ممكن تاخذ منك ربع ساعه فقط الله يعلم
اليوم اللي بعده دني كرسيك اقرب للباب وابعد عن سريرها و عيدي نفس الخطوات ..

وكل يوم اقرب للباب وهكذا الى ان تصلين للباب ..

اليوم اللي بعده خلي الباب مفتوح وروحي وان شاء الله الايام اللي بعدها راح تقدرين تسكرين الباب :)

هذا مافي جعبتي ..:26:
والله يسهل عليك وعلي وعلى الجميع :)
اذا عندك اسأله اطرحيها يمكن تذكريني بشي نسيت اكتبه ..