السلام عليكم ورحمة الله وبركاته
قرأت موضوع متميز لأختي الفارعة في قسم الحياة الأسرية على هالرابط
http://forum.hawaaworld.com/showthread.php?t=2436002
... ولما رغبت في وضع رد وافي وجدت أن ردي اطول من موضوع وبالتالي فضّلت فتح موضوع مستقل مع الشكر العميق لصاحبة الموضوع .. لان الفكرة موجودة عندي من فترة وصورت بعض الأنشطة لكن ما تذكرت اكتبه الا لما قرأت موضوعها ..
وأتمنى أن يبقى الموضوع في قسم "حياة أسرية سعيدة" ولا ينقل لركن الطفل، أولا لأن الأنشطة أسرية لا تقتصر على الاطفال بل فيها متعة كبيرة بمشاركة الام والأب و أي فرد من العائلة .. و ثانيا لأن قسم الحياة الاسرية بحاجة كبيرة الي مواضيع فيها قدر من الترفيه بدل ما تطغى عليها المشاكل الزوجية ..
رح استعرض بعض النشاطات اللي عملتها مع اولادي، وهم زيد 4 سنين و جنى 6 سنين ونص ..
عملنا صناديق حلوة الهم من صناديق الأحذية الله يكرمكم لبسناها من بلايزي اللي ما بدي ياها وواحد منهم بلوزة ابني عشان بده عليها وحش
الفوشي لبنتي و الازرق لابني و الوردي الفاتح عملته للشغالة كانت معنا
ومرة عملت مربى فراولة في البيت و خليتهم يساعدوني في ترتيب المرتبانات وتزيينها ، كتابة البطاقات و ربط الشبر لانه وزعنا على الاقارب والاصدقاء كانها هدية صغيرة وانبسطوا الكل عليها والأهم أنه الأطفال شعروا انها هدية منهم لانهم ساعدوا في تنقية الفراولة وغسلها وتزيين المرتبانات (وقت الطبخ ما دخلتهم المطبخ ابدا)
أول أمس قررنا نعمل معكرونة وطلبوا يساعدوني .. طبعا انا ما الي خلق لكن حزنت عليهم فقلت لهم يعطوني المقادير اللي حابين تكون في الطبق .. ما صورت للأسف لكنهم انشغلوا انشغال ممتاز لمدة ساعة في تجميع علبة ذرة وعلبة مشروم وكيس جزر وبازيلاء، حبة فلفل حلو وبندورة حمراء ومعجون البندورة وطبعا ابني ما ركز منيح جاب شغلات تانية ما الها علاقة .. المهم انهم انبسطوا على هالطبخة واكلوا منها منيح لانهم حسوا انهم شاركوا فيها ..
وفي شغلة رح تستغربوها لكنهم استمتعوا فيها جدا ... عملت لوجهي قناع الزبادي و لما شافوني أصروا يعملوا قناع الهم كمان .. فقلبنا البيت spa و عملوا القناع للوجه و بعدها عملوا لعيونهم قناع الخيار .. صورتهم لكن صعب احط الصور هون للأسف ..
كمان أنشطة عندنا كمية خرز منوعة من العقود والمسابح لانه العقود اما بتنقطع أو بتصير قديمة ففكيناها و عملوا الاولاد منها عقود جديدة وأساور بتصميمهم وانا والشغالة ساعدناهم بالشغلات اللي فيها قص أو استخدام المشابك (المشابك اشتريتها من محل اكسسوار) ..