انصحوني(بتطلق بسبب بنت زوجي)

السلام عليكم ورحمة الله
مشكلتي ياجماعه مع زوجي المعقد انا عندي ولد عمره 4 ونص ومنفصله من ابوه من 3 سنين وزوجي عنده بنت تقريبا في عمر ولدي اتزوجت من 8 شهور وشرطي انه ولدي معاي وهو بنته عند امها تزوره مره بالاسبوع بالبدايه انا قلت لولدي شوف هذا بابا (لان اصلا ابوه مسافر بس الان خلصت بعته يزوره من فتره لفتره) وسمحت لزوجي انه يخاصم ولدي لمن مايسمع كلامي شوي شوي اشوفه صار يزعق لولدي ع كل صغيره وكبيره ولمن اعاتبه يقولي انتي ماتعرفي مصلحته لحد ولدي ماهج من بيتي وراح عند امي ولو ايش مايصير مايرضى يرجع ويخاف من زوجي يقولي هو يزعق ولان كنا نضارب دايم المهم ماعاد في امل لرجعه ولدي كل دا وانا كاتمه بقلبي وصابره ع فراق ولدي ومتحمله الضغط فوق الضغط نجي لقصه بنته اول يوم اشوفها قال قوليلها ياابله لا تقول ماما عشان نفسيه البنت واصلا البنت مااتدري وين الله حاطها وماراعى مشاعري وانا بجنبه بلعتها وسكت بعد كدا صار كل مايجيبها ينكد علي ويخنقني باسلوبه النكره عشان خاطر بنته ويتفنن في تزعيلي مره يقولي لاتكلميها كدا ولا تقومي من جنبها حتى شغل البيت مايبغاني اسويه واقابل وجه بنته ومره وانا بكوي بنطلونه دخل معاها قلت اخلص واسلم تخيلوا مايجيبها عندي تسلم علي لا يدخل غرفتها ويستناني انا اجيها ولمن خلصت جيت جري لا يعملي مشكله الا يقولي بصوت مستنكر فينك كانه مو شايفني باكوي ومره اكلت بنته الحلاوه بالورقه مع انه ولدي قدها ويقشر حلاوته بس وقتها كنت باصور ولدي كنا برا وماشفتها ولمن خلص زوجي الصلاه خاصم انتي ماتشوفيها لمن اقوله ليش كدا تعاملني يقولي لا انتي حساسه زياده عن اللزوم او انك تغيري من بنتي ولا يقولي ييتهيئلك انا ماكنت اكلمك باسلوب جاف والله انا اعرفه لمن يكون هادي ولمن يكون مقهور المهم وبنته غير عن كدا لسانها طويل وماتسمع الكلام اقلها شيلي العابك تطلع بوزها وتبكي وانا اشوف كدا اقولها خلاص روحي اخاف من ابوها ويعلم الله ولدي كان يخدم معاي يشيل السفره معاي ويجيبها وكل مادق جوال زوجي يجري ينط يعطيه المهم اخر مره اتضاربنا بسبب بنته قلتله ياابن الحلال لا تعطل مصالحي بسبب بنتك جيبها تقدر تجيبها في اي يوم مو شرط اكون موجوده ولا تربطني بيها وانا مو ملزومه ببنتك جبلها شغاله لمن تجي مو اسوي شغل البيت وكمان اشيل من ورا بنتك قالي مو ع كيفك وماراح اجيب شغاله قلتله دام كدا انا حاطلع من البيت قالي مع السلامه شوي رجع اتكلم قلتله بنتك دمها تقيل وربي ع القلب بس قلت كدا قام ضربني وطردني اخر الليل وقالي يلا ع بيت اهلك رحت الم اغراضي قالي يلا انقلعي لا اعطيكي بالجالون ع راسك وبس من يومها وانا عند اهلي وهو لا حس ولا خبر وولدي الله يسعده فرحان بجيتي مو عارف من الفرحه ايش يسوي بالله عليكم كيف اتصرف مع دا الزوج وايش اقول لااهله اذا وصلهم الخبر