انصحوني انا مو عارفة كيف اوفي طلبات زوجي

السلام عليكم اخواتي ....
كل مرة اكتب مشكلتي ارجع امسحها ولكن خلاص مو قادرة اتصرف فعلا
انا متزوجة من 7 سنوات ونص وعندي ولدين الحمدلله ...

مشكلتي مع زوجي من اول زواجنا مرت عليه ظروف وديون فكان يعطيني 50 درهم فقط كل شهر مع انه مهندس وانا مهندسة وعايشين بالامارات و راتبه كويس ....و الديون الحمدلله بعد 6 شهور من زواجنا خلصت بس ما كان يعطيني اكثر من ال50 درهم الا بالعيد...و ما كان يخليني اشتغل بعد الزواج فقعدت سنتين بالبيت.....
وبعد ولادة ولدي الاول قطع عني المصروف نهائيا ...قد ما اتكلمت معاه ما نفع ...في مرة اصريت عليه شال الفلوس وراماها بوجهي ....فقررت اني ما اساله وادور على شغل وما اذل نفسيوالحمدلله كان عندي سيارة ...بعدها لقيت شغل وسمح اشتغل لما ولدي كمل سنة ووسطت امه في الموضوع ....اشتغلت بضعف راتبه وبعدها حملت بولدي الثاني ....كان يزعل ويسوي مشاكل على اتفه شي وما يراعي حملي يضربني ويسحبني من ايدي في الارض ويرميني في الغرفة ويقفل علي ....كلمت اهلي وكلمت اهله ما نفع ...
لما دخلت التاسع سوا معاي مشكلة كبيرة ومنعني من شغلي ومنعني حتى اني اتابع مع الطبيبة مواعيدي في الحمل مع اني كانت عندي مشاكل ومؤشرات ولادة مبكرة من الشهر السابع ....وكان 3 شهور ما يجيب اكل في البيت ومخليني ارقد في الارض مع ولدي ....تخيلوا باع غرفة النوم واخذ سرير مفرد ينام هو عليه وانا وولدي بالارض ...اتحملت منه وايد في الاخر انفجرت ورحت اشتكيته وطلبت الطلاق ورحت بيت ابوي ....مجرد ما استلم الاخطار من المحكمة جا يبكي ويعتذر ويترجاني اتراجع ...بعد 18 يوم سحبت الدعوة وتم الصلح بينا وولدت الحمدلله ورجعت بيتي ورجعت شغلي ....هذا كله قبل 5 سنوات ....
قبل 3 سنوات زوجي ترك شغله وفتح شركة خاصة وما عنده زباين فكنت انا اصرف على البيت من الالف الى الياء واصرف على العيال واعطيه فلوس لما يطلب مني ...وحتى فلوس المدرسة وكل شي علي ...المهم هو كان يوهمني بانه يروح الشغل وفعليا هو يروح يقعد بالقهوة ....ولما اواجهه يقول لي انا الاقي الزباين بالقهوة ....صبرت وصبرت سنتين في الاخر قلت له اني مو مستعدة اصبر اكثر انت الرجال انت المفروض تصرف وتتحمل كل شي مو انا اللي ادفع ايجار واكل وشرب ومدارس وكهرباء وموية ....تميت ازن وازن لين ما اشتغل في 2015 وبعدها بديت احمله المسؤولية ....
اللي صار اني في بداية 2015 غيرت شغلي لانها ما تتناسب مع مسؤولياتي تجاه اطفالي ...لان صاروا بالمدرسة ولازم اذاكر معاهم واعطيهم وقت اكثر بالمقابل راتبي اقل ....قلت مو مشكلة المهم اقضي وقت اكثر مع العيال والراتب كافي بالنسبة لي وابوهم يتحمل الباقي ....طبعا سحبت يدي من المدارس وصرت اشتري الشغلات الغير تموينيه ....واذا شي نقص واعرف ان ما عنده اكمل من عندي ....بدون ما اجرحه ...طبعا هو يروح الدوام ساعات 11 ساعات 12 الظهر ويخلص الساعة10 بالليل وبعدها يقعد في القهوة لين الساعة 2 او 3 وينام ....انا دوامي من 7 ونص الى 2 ونص ...لما ارجع انظف وارتب بيتي واجهز الاكل واذاكر للعيال و اخر اليوم على الساعة 11 او 12 انام... ما اشوفه الا يوم الجمعة من صلاة العصر الى صلاة المغرب لان باقي الوقت بالقهوة ....قد ما اتكلمت معاه ما رضى يغير من نمط حياته ....
المشكلة الحين هو طالب اني انتظره لين يجي الساعة 2 او 3 واسوي له عشا واقعد معاه ...وانتظره الصبح اسوي له فطور واقعد معاه والا انا يعتبرني مقصرة في حقه وما بيخليني اشتغل مرة ثانية عندي 3 ايام انفذ طلباته او اقعد بالبيت او نتطلق ....بالاضافة لانه طالب اني اتحمل معاه المصاريف النص بالنص......انا ما عندي مشكله اسوي له كل طلباته ولكن ايش ذنبي اني انتظره لين ما يخلص القهوة براحته وعلى كيفه وبعدها يجي اقوم احط له الاكل واقوم الفجر مع العيال مرة ثانية ....اذا هو يرجع من دوامه مباشرة للبيت ما عندي مشكلة انتظره للفجر لكن هو يروح ويقضي وقت وانا انهار جسديا ما قادرة ...وفي نفس الوقت هو ما يصرف علي نهائيا ...يعني درهم واحد ما يعطيني ....عادي اتسلف من اي حد ولكن منه هو لاء وهذا هو السبب الرئيسي اللي خلاني اشتغل ....وحكايه اني اصرف معاه على البيت انا اصلا اصرف بس مش النص بالنص لا حسب الحوجة وحسب ما عندي ...
شوروا علي وسامحوني اذا كلامي مو مرتب