انصحيني كمطلقه ثلاثينه اعيش قصه حب💔

السلام عليكم
حبيباتي وخواتي في الله ماجيتكم الا متاكده بعد الله انكم بتكنون السبب بتوجهي للطريق الصحيح انا ضايعه الضياع اللي كل ماقلت اني راح اطلع نفسي بنفسي من هالمشكله الاقي نفسي اتعمق فيها
اولا انا تزوجت بعمر ١٨ كنت متوقعه ان تزوجت رجل قد كلمته وانه قد كلامه
من ضمن شروطي اني اكمل دراستي صدمني بعد شهرين من زواجنا قالك مابخليك تكملين وانا باعطيك راتب شهري لين اخر عمرك ، ماصدقت حكيه ابدا ولا خش مخي وان عطاني ماراح يكون نفس اللي بيدي ووظيفتي
حاولت فيه منا ومنا وقلت باعالج مشكلتي الا اكتشف ان الرجال على قولتهم راسه يابس على طول بدون تردد رحت اهلي وطلبت الطلاق تركني معلقه سنه وعليها وهدده ابوي وجاب ورقتي وطلقني
الحمدلله كملت تعليمي اخذت شهادتي الجامعيه
هالكلام قبل ١٢ سنه

الان داخله الثلاثين ومايتقدم لي الا ناس ماهم كفو
انحسبت علي زواجه انا مظلومه فيها ...
الكل ينظر لي بشفقه والله العظييم اني يوصلني كلام ان الناس تهرج بي انهم يرحموني خصوصا بعد وفاه ابوي
توفى ابوي قبل سنتين وفعلا حسيت بضياع
مشكلتي
قبل فتره بنت خالتي تسولف لي
عن زوجها واخوه ( المطلق )وتمدحه انه شخص طيب ويحب عيالها وحنون عليهم مثل ابوهم حسيت ان مشاعري توجهت للانسان هذاا اقسم بالله انه دخل قلبي من اوسع ابوابه حتى اني ماكنت اعرف سبب طلاقه ورحت سالت بنت خالتي بدون ماتحس قالت انها حرمته تقول مابي اسكن جنب اهله
طليقته تزوجت ولد عمها ومعها ماشالله بنتين
وهو للحين ماتزوج من ٦ سنوات من طلاقهم والله اني احاول قد ماقدر اتناسى الموضوع اذ مافكرت فيه بيومي يجيني باحلامي واقوم منقهره انه حلم
الله اللي بلاني بهالشي مافضفضت لاي احد ولا حكيت لاي مخلوق حطيت هالسر بيني وبين قلبي ودي ربي ينزعه مني نزع لاني مرات اقول لعقلي
انا يمكن اكون اخر خياراته ؟!
ويمكن ماكون من ضمن خياراته ويمكن ماجي على باله ؟!
هو يعرف اني مطلقه ولو يبيني جاني ؟؟
بينا وبين بيتهم مسافه ١٠ دقايق انا انسب وحده له ، اهله يعرفوني ويعرفون اخلاقي ، ويعرفون اسباب طلاقي بالتفصيل معقول مارشحوني له ؟
احاول اقنع نفسي اني ولا شي انا بالنسبه له ولاهله !!!
بالمناسبات اتجاهل اهله لاني اعرف ملامحي بتفضحني واني لو سلمت وسولفت معهم بيقولون الناس اني اتلصق فيهم او بالاصح احس الكل كاشف مشاعري عشان كذا اتهرب قد ماقدر وهو بالحقيقه مافتحت فمي بالموضوع ذا لاي احد حتى صديقاتي ماحكيت لهم
ماعرفت ان المشاعر ماهي بيد الواحد الا بعده

اتمني تعطوني حل واللي عندها لو ذره انسانيه ماتاخذ موضوعي باستهزاء لاني لاحظت بعض ردود العضوات على بعضهم استهزاء بالمشكله وتصغيرها
انا تعبانه نفسيا من جوانب كثيره العمر راح بدون زواج بنات اصغر مني بسنوات ماشالله تزوجوا وانا نفس مانا ويعلم الله اني اول مره افضفض بموضوعي وصلت حدي بشكل لايطاق
حطي نفسك محلي وانصحيني نصيحه لو فيها قسوه لان صديقك من صدقك
مابي نصيحه كاني مراهقه انصحيني كمطلقه ثلاثينيه
الله يرضى على كل وحده ترد علي
الله يرضى عليها ويعطيها ماتتمنى من خيرات الدنيا والاخره ❤️