انطباع عن زوجة الاب

زوجة الاب هي اكبر عقدة بالمجتمع
انطباع الاغلب عنها انها شريرة وماكرة وقاسية
وبعض الاحيان تكون الام الثانية وبل تكون احن من الام على اولاد زوجها
وحدة كانت تقول من خوفي من زوجة الاب على عيالها وصلت لدرجة تدعي على زوجها انه يموت عشان مايتزوج او تتطلق
كل فترة لازم اقرأ بالمنتديات عن زوجة الاب ومعاناة ابناء زوجها معاها واحس بضيق شديد وحالة نفسية لدرجة اني ابقى طول اليوم مكشرة ومعصبة بسبب هكذا مظالم لاني بكل بساطة اكره شي اسمه ظلم وخصوصا ظلم ذوي القربى
انا تعرفت على زوجة الاب مرة وحدة في حياتي
صديقتي لها اختها الكبيرة سيدة اعمال ومناصب

والله تقول صديقتي
اختها الكبيرة عندها ٨ عيال
اربع بنات واربع اولاد
ولهم اخ من ام ثانية وزوجها طلق الزوجة الثانية والولد تشتت بين الام والاب شهر عند الاب وشهر عند الام
اختها ماحرصت تعامله الا بالطيب كل مايجلس عندهم
تقولهم انا اقدر اعذبه واقدر اهينه واضربه ولا احد يعرف اصلا
ابوه مسافر على طول وامه في ديرة ثانية
بس بالنهاية وش رح استفيد من كل هذا غير غضب الله والانتقام
والله تقول مرة كنا معزومين كلنا بقصرهم وخدم وحشم وناس
والله تطلع من عند الناس بس عشان تتفقد ابن زوجها لانه كان صغير عمره ٥ سنين خوف من اهماله
والله يمكن ماتصدقوني بس هذا لي صار
وكان اخوه بعمره شقي يضربه ويتسلط عليه كانت تدافع عنه وتضرب ابنها وحنت عليه بشكل مو طبيعي بوقت زياراته لهم والولد حفظ لها المواقف هذي وصار يحبها لدرجة انه يذكر اسمها بكل وقت ويوم شافها صدفة بالسوق هو وامه ركض عليها مثل المجنون قدام الناس
وبعدها قام الولد يغيب بحكم سكنه مع امه وامه كل فترة تسافر مع اهلها وصار مايتلاقى الا مع اخوه لي قريب من عمره بحكم انهم بنفس المدرسة
يعود لهم وبعدها يروح مع امه لحد ماقطعهم سنتين ورجع لنفس الحي الان وعمره ١٧ سنة وشوفوه
بار في عمته زوجة ابوه اكثر من اخوانه ويحب اخوانه كثير رغم انه ماعاشرهم كثير ومحبته لزوجة ابوه مو طبيعية الله قاذف حبها في قلبه ويتقرب منهم بشكل مبالغ وله اخ صغير عمره ٤ سنوات اخرس مايتكلم يحن عليه اكثر واحد ودوم ياخذه يمشيه ويشتريله لي يبغاه لدرجة يضيع مصروفه على اخوه هذا
كل هذا بسبب ايش
بسبب معاملة عمته الطيبة واحسانها له كل مايزورهم
حصدت لي زرعته
وش كانت بتستفيد لو كانت تعامله بظلم وكراهية غير انه بيتربى على الظلم وبيطلع لها بالمستقبل عدو

والموقف الثاني
ناس يكونو قريبين لبيت جيراننا
وذي القصة على طول الحريم يحشون فيها كل ماجتمعو

اخوات ٢ بنات
ابوهم مطلق امهم من كانو صغار وتزوج على طول وحدة ظالمة وبدت تدز العيال له
وقلبته على عياله لحد ماخلاص قام يكرههم كره مو طبيعي
وصلو البنات لسن العشرين والحال
كالاتي البنتين عاشو معاناة مو طبيعية من ابوهم وزوجته وبناتهم واولادهم لدرجة انه ممنوعين يقعدو معهم على طاولة الاكل وجسمهم ازرق من الضرب وعلى علاج نفسي وانواع العذاب من الجميع والاب مستغل اسمائهم ومطلع ب فيهم اراضي حق حرمته وبناتها واولادها
بس بعدها لازم الدنيا تدور الظلم مارح يدوم
بدأ مسلسل الانتقام الرباني
ابنهم الاول سوا حادث
مامات ولا شي بس تكسر كل جسمه وللان بعد مرور سنتين يعاني من هذا الحادث وحركة يده اصبحت مو سليمة كأنه معوق
ابنها الثاني عاطل عن العمل وكل فترة ينطرد من وظيفة وغير الديون لي فلست اهله من كثر السداد
بنتها زوجها على طول داشر مع اصحابه البحرين وتاركها والحين متزوجة اربع سنين وماجاها عيال والمشكلة منها
وبنتها الثانية عيالها ٢ معاقين وصلو سن ٥ و ٦ سنوات مايقدرون يمشون
والثالثة ماتزوجت للان
وغيره كثير مصايب والاب الان مريض سكر والسكر اكله اكل وهي مصايبها بعيالها
و تقول البنت انها كانت تسجد لربها وهم نايمين بقيام الليل ماتقول الا هذي العبارة
اللهم اني مظلوم ف انتصر
حسبي الله ونعم الوكيل في فلان وبس
دار الزمن وانقلب الحال
البنات اقوياء واهلهم ضعيفين
الحين البنت هذي متزوجة ضابط بالحرس وعايشة اميرة
والثانية تزوجت واحد ارمل ومعتنية في بنته وبيت حماها يحبوها حب مو طبيعي ومعوضينها عن كل شي
ورغم كل هذا ضد عقلهم تفتحي موضوع الاب او وزوجته او اخوانهم معاهم
مقاطعين الاب من سنين هو وحرمته
كله يقولون مارح نسامح مهما حصل واحنا خصوم قدام الله يوم القيامة
وش استفادت زوجة ابوهم من عذابها لهم ؟
دارت عليها الدنيا في الاخر ومصايبها تكفيها
لو انها احتوتهم وربتهم وحننت قلب ابوهم عليهم
يمكن بحسنتهم كان الله دفع عنها وعن عيالها البلاء والمصايب
ولو ان الاب احسن لهم ورفض سماع زوجته لكانو له البنات البارين فيه وكانو قامو فيه وبمرضه وخصوصا انه زوجته الان مطاردته مطاردة وبناتها رغم مصايبهم عاقين فيه
زرعو الشر وحصدوه
اتمنى لي عاشت عند زوجة اب او سمعت موقف او قصة تنشرها هنا