كوبونات الراقية تسجيل الدخول
جوري الصيف

انــا وبيتنــا البــارد ...

الأسرة والمجتمع •

السلام عليكم

الصراحه ماعرف من وين ابدا مشكلتي
هي مو مشكلتي انا بس يعني البيت بشكل عام..
اللي اسميه " بيت الاموات " او " المقبره" خخخ
طبعا في سبب .. هو ما مافيه حياه او يمكن جذا انا احس..بخبركم واحكموا بنفسكم

انا اعيش مع امي وخواتي..وكلنا ندرس الا وحده..
المشكله ان بيتنا فيه برود غير طبيعي+امي ماتهتم او يمكن بارده ما افهم كيف بس المهم الي اعرفه انها ماتتكلم معنا كثير
بس مع اختي اكبر وحده فينا..ولا تعبر ولااشي الا حسب مزاجها :27:
ترا طبايعها كذا ولا اعرف اتعامل معها، سواء عصبت زعلت ضحكت ماتعبرني :44: فاصرت اتعامل معها ببرود نفس ماتربيت عليه ولا اعور راسي خخخ بس شي غريب لما تطلع مع ناس او يزورونا تتصرف غيير وتضحك وتسولف وكل شيعادي حتى تكلمنا وتسوي نفسها تمزح معنا ولا اللي يقهر لو كان في بنات نفس عمري تدلعهم وتضحك لهم وتسمع كلامهم كانهم بناتها.. واول مايطلعون تسكت وتكلمنا باسلوب غير يعني عاادي وباررد وطز اي شي وشديده وفيها قسوه بالكلام والمشاعر مو ضرب حتى مره قالت : انا ليش كذا قاسيه ؟ ، وتقعد بغرفتها تقرا قران ولا تصلي او تشوف تيفي وهي الصدق انسانه ملتزمه دينيا، بس مثل ماقلت مع اختي الكبيره غير (تعطيها اللي تبي وتجيب لها هدايا ولو كانت بسيطه وانا مااتكلم اسكت لني اعرف مابتسوي شي + مابي خرب على اختي اخليهم الاثنين براحتهم) ، او مع ولاد خالي بعمري او الصغار ولاحظت انها تحب الاولاد اكثر من البنات مثلا بنات خالاتي ماتحبهم بالرغم انهم لسه صغار بالاعداديه وتحت ( هم بدوله ثانيه)، والله استغرب يعني ليش كذا وش سوينا لها بالمره تتجاهلنا ولا كاننا موجودين حتى مرات صرت اشك انا انسانه مخفيه ولا كيف؟؟ ولو حتى كلمتنا مافي غير الدين وتزوجي وبس اما اي حد غيرنا تسولف معه بكل شي ووتونس حتى اتقلوهم ذكرياتها وهي صغيره او موقف صار لها.. يعني لهادرجه انا نكد؟؟ ومره سالتني ليش انتو كذا جامدين ولاتسولفون ؟ ودي اقولها كله منك بس اسكت عشان مااجرحها، ولو تكلمت بشي جد تاخذها مصخره وانا اصلا موب متعوده على الكلام معها لانها من صغرنا ماتكلمنا غير الاوامر وثم تختفي ..
المهم في شي كمان ، نحنا ماعندنا خدامه فا لمن ارجع من الدوام ياني اطلب من مطعم او اطبخ حق 5 اشخاص اللي ييقهرني انهم فالبيت من الصبح ولايسون شي بس نايمين (امي واختي) ولانزعجهم الصبح بالفطور ولاشي وانا ماطلب ممنها شي ،كم مره قلت لها مش حاله كذا نحن نرجع من الدوام تعبانين وحالتنا يعلم بها الله ودراسه اطبخي اي شي تقول ماحب اطبخ ولا تعبانه ولا تعلمي الطبخ واطبخي ، ولا الجمله المشهوره روحي المطبخ سوي لنفسك اكل والمطبخ اصلا فاضي اروح اشتري على حسابي اكل حقي ومرات حق البيت مع انه عندها المصروف ، والخ من الاعذار واخر مره طبخت قبل 4 شهور وامس والله وبس << بنتظر اربع شهور ثانيه خخخخ :hahaha: ،على فكره هي ربتنا على هالكلام ومن شهر ماصرت اهتم قلت يابنت خلاص تقلي الامر الواقع ، استغرب من البنات كيف امهاتهم يعاملونهم عادي بناتهم مو مثل امي تقول انتو كبرتو سو كل شي لحالكم انا مابدوم لكم للابد ، طيب اعرف كبرت ومحد بيدوم للابد حتى امهات صديقاتي بس مو لهالدرجه تتخلي عني ولوهذا الحين اجل يوم اعرس وش بيصير ههههه:44: حتى صديقاتي يقولون ليه انتي كذا مكبره عمرك كثير تصصرفي عادي ( انا 22 ) اقول فنفسي ماعرف كيف وش تقصدون اتصرف بعمري؟ حتى صرت اكره نفسي من تعليقات البنات ،مره وحده قالت روحي عند دكتوره نفسيه تعالجك من السكوت والهدوء الغريب هذا بس طبعا بشكل غير مباشر..ومره وحده قالت شكلك مهمووم ، مايدرون باللي عندي اقعد افككر وش بطبخ لمن ارجع و متى بلحق ادرس وانام وابي اشتر اغراض اختى للمدرسه وموعد الاسنان متى واخر شي ارجع واصكها نوومه واسحب على كل شي خخخخخ ... حتى من الهدوء صرت احس البنات يكرهوني لاني غريبه الاطوار ما الومهم .! وقررت مابي اداوم الاسبوع الجاي بالرغم اني طالبه مجتهده لاني اعرف وش بيصير..:mad:
اما البيت مايتغير كل يوم نفس الروتين والشكل الممل من اكثر من 3 سنين امي ماتهتم بشكل البيت ولاديكور كذا مره اخبرها بس تقول الميزانيه وانا اعرف انها لوتبي تغير بتغير لان فيه فلوس كثيره تطير عالفاضي ووالميزانيه مابتخسر ذاك الزود الا هو ديكور بسيط مب كاشخ وغالي حتى لو قلت بساعدها ترفض او تاجل الموضوع ،مره اشتريت الكبت وفيه ارفف ينحط عالزاويه ثاني يوم اشوف مليان كتب واكل ومركون في زاويه بعييده وليومه هذا ولو رتبته تزعل ،دايما نتفشل يوم تجيب حد والبيت معفوس او فاضي تقول هذولي ناس طيبين وحالتهم تعبانه وتعطيهم اي شي وماتكون مرتبه اغراض التقديم من قبل حتى مرات هم يحسبون انهم جو في وقت غلطومايبون يفشلونها ،ويوم ازور بيوتهم وقسم بالله حسيت وجهي طاااح وتشتت لاجزاء من الفشيله وش ذاك البيت الحلو مرتب وديكور ولا الضيافه الحين هذولا هم المساكين؟ بعدين فهمت مغزى نظراتهم المليئه بالشفقه اللي مااحبها ؟؟ المهم بعد هذا كله صرت انعزل على نفسي، لاتققولون وين اهلكم ومن هالكلام ترا ماعرفهم ومابيننا شي، والصديقات ماعندي انا صغري انعزاليه او بالاحرى صرت مع الايام كذا كنت احسبه شي طبيعي وكل الناس كذا الين وصلت الجامعه < قصه حزينه اهئهئ خخخ،

اما ابوي فما احب اكلمه لانه طول الوقت يتمصخر ويتطنز علي وعلى شكلي ويحطم حتى لخواتي ، مره زرناه بعد فتره طويله اول ماشافني وشش توقعون قاال؟؟ قال بلهجه استهزائيه : هه انتي من وين جيتي من فلسطين ؟ ثم ناظرني نظره احتقار

، ابي اشوف وش رايكم بامي هل هذا شي عادي ولا لا، هي مرت بظروف قبل بس خلاص الحين انتهت وصرنا بحال افضل ولكن مادري ليش ماتبغى تلاحظ اننا موجودين حولها ومن شهر تقريبا بدت تهتم بنفسها بعد ما نصحتها بنت وحده من صديقاتها مع اني دايما اقولها ابشتريلك ولا نروح للكوافير تقول ماابي او بعدين يوم ثاني ،ووش اسوي بنفسي عشان اتكلم اكثر مع الناس لاني صرت احب الهدوء و الانعزال ؟! تشوفون احسلي اروح لاخصائيه؟ انا اشوف كذا..
كاني طولت عليكم واتكلم كثير :time:
اسمحولي بس ابي اطلع كل اللي فيني من كم سنه مره وحده !!
طبعا كل هالاحداث واحداث ثانيه سوت لي ازمه نفسيه وصرت ما اكل كثير ولا اطلع اقعد افكر وش بسوي لوحدي ولا خواتي مليت منهم حتى هم مثلي ماعادا الكبيره .فبالتالي اثر علي شكلي اللي اثر على ثقتي اصلن حتى لو كان شكلي تمام ثقتي مابتتغير لاني اعرف ان شخصيتي ضعيفه اجتماعيا واللي حولي يحسون بهذا فا اتوتر اكثر .ابي اثبت نفسي بس ماعرف كيف مليت من الهدوء والصمت والبرود والتطنيش من كل الناس والاكثر مليت من نفسي لاني صرت انسانه خامله وبارده ولا تعطي حد وجه لدرجه الوقاحه ولا اعرف اتصرف بالمواقف مثل البنات لاني كل شي عندي عاادي ومافي طموح واي شي مو مشكله ودايما اتفشل والقط وجهي اللوح :mad:
مادري في شي بعد تبون تعرفونه ؟؟
تطلب مني شجاعه كبيره اني اكتب هنا فاتمنى تاخذون موضوعي بجد مو مثل باقي الناس،، وتساعدوني وافضفض لكم :39:
تحياااتي
30
4K

يلزم عليك تسجيل الدخول أولًا لكتابة تعليق.

تسجيل دخول

ارجوانه الماسيه
ارجوانه الماسيه •
ويقولون ليش البنات ينحرفون الله يحفضك خلاص انتي اثقلي ولاعاد تقعدين بنفس المكان الي قاعدين فيه خليك في حالك صدقيني هم بيجونك بعدين وادعي ربك تتزوجي الي يقدرك ويغنيك عنهم
جوري الصيف
جوري الصيف •
ارجوانه الماسيه ارجوانه الماسيه :
ويقولون ليش البنات ينحرفون الله يحفضك خلاص انتي اثقلي ولاعاد تقعدين بنفس المكان الي قاعدين فيه...
شلون بنفس المكان مافهمت \ وعلى طاري الانحراف ترا انحرفت وخلصت بس عالخفيف خخخخخ بس والله كل مره اقول مابي اكون كذا ويارب ساعدني وكذا،وقعدت لحالي ولا حد جا..
اما الزواج يااختي والله كرهته من كثر ما اسمع هالكلمه وكلام المتزوجات عقدني يقولون كله مسؤوليه وارف وانا اصدق بسرعه :04:..

تسلمين عالرد والله يجزاكي الخير
..غلا الكون قرنيه
..غلا الكون قرنيه •
السلام عليكم...كيفك عزيزتي جوري الصيف
انا اشعر بأنك مشتته فلا اعرف ماذا تريدين هل تريدين اخراج هموم تراكمة مع مر السنين ام تشكين وضع ام جامدة المشاعر ام انكي كرهتي العزله والوحدة..فلا الومك فطبيعة البشر اجتماعين ...
اما عن ذهابك لاخصائيه نفسه فبأذن الله استطيع ان افيدك لان علم النفس تخصصي..
حبيت اعرف نوع العلاقه التي بين امك واباكي ...وكيف تزورين اباكي الايعيش معكم..
هنالك حلقات مفقوده من قصتك..ولاكن اليكي اسهل الطرق وانجحها ولاكن ينبغي لكي معرفة الاسلوب والوقت الملائم ومعرفت مدا تقبل الشخص للحوار حاوري امك اخبريها عن حقيقة ماتشعرينه وما تعانينه,,,لماذا الصمت اليست امك ولماذا خصت اختك بهذا القرب والمكانه منها دون البقيه...
عزيزتي هذه همسه مني مهما زادت برودة البيت كوني انتي الشمعه التي تبث الامل والدفي في اركانه كوني انتي التغير فلا شي مستحيل وقد ذكرتي خصله جميله في امك انها ملتزمه وهذا شي جميل...كما قلت لك كوني انتي التغير واذا كنتي فعلا عازمة على تغير وضع اسرتك اعلميني ..
.......
عزيزتي المني شي قراته ارجوا منكي الاضاح
وعلى طاري الانحراف ترا انحرفت وخلصت بس عالخفيف خخخخخ بس والله كل مره اقول مابي اكون كذا ويارب ساعدني وكذا،وقعدت لحالي ولا حد جا..
أنثى بطبعها
أنثى بطبعها •
حبيبتي.. مشكلتك سهلة الحمدلله << جتك الخبيرة :)

والدليل انك انت تشوفينها غلط.. وهالشي منك يكفي عشان أقولك الحمدلله انت لازلت بنوتة طيوبة ووجهك مو لوح زي ما قلتي!

باين امك عندها مشكلة تاني منها.. حاولي تساعدينها بالاسلوب اللي تشوفيه مناسب

في نفس الوقت اللي اشتغلي فيه على نفسك وخواتك الباقيات.. جددي من حيتك اضحكي وامزحي.. وفرفشي

انسي النقد لامك..ليه ما صلحتي؟؟ ليه ...؟؟
مثلا انت لما تعرفين بيجيكم ضيوف..عدلي البيت وجهزي للتقديم.. وخلك منتهى البشاشة

في الدوام حااااولي تندمجين مع البنات .. سولفي اضحكي.. وانسي المقارنات..وتذكري انك احسن حال من ناس كثيييييييييييييييرة الحمدلله
غيري لوكك..تفائلي ..

وقبل كل شي ادعي ربي يعينك ويساعدك.. داااااااااااائما.. ويصلح حالكم جميعا
واقري قرآن وخصوصا سورة البقرة خليها وردك يوميا وكاااااملة..

كل هذا بقلب مليااان عزيمة وتفاؤل,,

وصدقيني بتتعجبين من التغيير اللي رح يصير

اقري كتب ممكن تساعدك في هالمجال

مارسي هوايات تحبينها

والزواج نعمة حلوة وممكن تكون خيرة لك.. لا تكرهينه ولا شي بالعكس تفاااااااائلي .. وقولي يارب



الله يسعدك ويساعدك..ويكون بعونك.. ويرزقك



على فكرة .. وش قصدك بـ (وعلى طاري الانحراف ترا انحرفت وخلصت بس عالخفيف)؟؟!!

انتبهي تخربين على نفسك :)..


سوري طولت عليك :).. دعواتك لي ربي يهون علي
Lelo 2009
Lelo 2009 •
الحال من بعضوووه