انــــطردت من بيـــــــــــــــت ابــــــــــــــــــــوي!!

بسم الله الرحمن الرحيم


السلام عليكن ورحمة الله وبركاته
اخواتي العزيزااات


هذي اول مشاركه لي واتمنى ان اجد لديكن التفاعل....

راح ادخل في الموضوع علطوووول بلاشي اللف والدوران

مشكلتي ياعزيزاتي مثل ما قريتو في الموضوع ...

نعم..
انطردت من بيت ابوي لكن بطريقه غير مبااااشره!!

السالفه باختصار شديد

ابوي الله يرحمه بنى لنا بيت (فله دورين ) ودفع دم قلبه وامي الله يحفظها اقتصدت معه وما تطلب الكماليات عشان يتحقق هالحلم!!

تحقق الحلم وسكننا بيتنا ...

اخوي الكبير تزوج بعد ما سكننا بسنه وسكن فوقنا (غرفتين ودورة مياه)
بعد 5 سنين تزوج اخوي الثاني وسكن بعد فوقنا (غرفتين ودورة مياه)

كانو حريم اخواننا زي العسل صح مالهم استقلاليه والمطيخ بس اللي تحت بس عشنا حياة الكل
يحسدنا ومو مصدق ان ما بيننا مشاكل !!
امي كانت شايلتهم فوق راسها واذا ولدت الوحده تخدم فيها وتسهر على راحتها ..
مرت السنين ...
تزوجت اختي الوحيده ..بعد سنه توفي الوالد الله يرحمه

بعد 3 سنوات تزوجت انا
وبكذا يكون مافي البيت اللي تحت الا امي فقط ...لاني اضغر شي
اقترحت امي اقتراح وكان محط اعجاب الجميييع

الاقتراح هو ان يكون البيت السفلي كله لاخوي الكبير والدور العلوي لاخوي الضغير

طبعا وافقو

وعملو ترميم للبيت وزيادة ملاحق وغرفتي وغرفة اختي صارت لبنات اخوي!وغرفة امي وابوي صارت لاخوي وزوجته!

وامي لها غرفه وحده
انبسطو حريم اخواني بالوضع واكيد لانهم توسعو واستغنو عن الايجار ..

لكن اللي حصل لنا بعد هالفكره ما كنا نتوقعه ابدا ابدا

زوجة اخوي الكبير اللي سكنت تحت وامي عندهم تغيرت جدا ..صارت تقط كلام على امي وانها ما اخذت راحتها زي سلفتها اللي فوق وانها ما تقدر تلبس اللي تبيه!!

امي حساسه جدا جدا وصارت تتضااايق من كلامها وهمزها المستمر!!

احيانا امي تبكي عندي وتقول من يوم مات المرحوووم ما عاد لي مكان بها الدنيا محد يبيني!!
اتقطع اذا سمعت هالكلام!!

امي طيبه ياناس مو عشانها امي لا والله الكل يشهد

يكفي انها تقوم بنفاسها وتمسك عيالها وما تحب احد يقولها شي!!

الان انا لما اجي عند امي الاقي زوجة اخوي مبوزه ومتضايقه وما تبيني اجي!!

وتنطل من ذا الحكي..
امي تطلب مني اسكت ... وانا والله ما اقول شي اسمع منا اطلع منا..عشان الغاليه

تميت على هالوضع 6 سنوات وانا كل ما اجيهم تكشر بوجهها وتحاول تحط ان عيالي مزعين( بنت وولد)
انا مو دايم اجيهم احيانا اروح لاخوي اللي فوق بس والله زوجته محترمه جدا وترحب بي وتحب امي ويحق لها لان امي جدا طيبه
امي بعد ما شافتها تتضايق مني انا واختي اذا جينا قامت حطتلنا غرفتين في الدور الثالث!!
وتخسرت فيهم بس مو مشكله كله عشان امي ترتاح
صرنا اذا جينا لامي نروح علطووول فالدور الثالث كأننا حمام!!
بس مو دايم يعني لازم اجي تحت واقعد شوي بعدين اطلع فووووق!

المهم
هالايام حدثت الصاعقه والامر اللي اتمنى انه ماصااار...

قالتلي امي : بصراحه ام فلان(زوجة اخوي) قالتلي : ياعمه بقولس شي انا والله هالايام جتني حالة ضيقه وخنقه من الناس واذا جاني احد في بيتي اقعد ابكي الين الفجر!!

امي صدقتها..
وقالتلي امي خلاص ما عاد لك جيه تحت علطول فوق او عند اخوك الثاني!!

قلت : الى متى؟؟

قالت:والله اذا وجودك يسبب للمسكينه مشاكل وما تنام الليل ..خلاص روحي لاخوك الثاني !!

والله امي على نياتها :::

انا انفجرت بالبكااا

قلت : يعني وش؟؟ خلاص !! انطردت من بيت ابوي !! اللي كل شبر فيه له ذكريات لي..... من قبل ما ادخل اولى ابتدائي!!

يكفي اني تنازلت عن غرفتي لعيالها.. يكفي انك يا يمه تنازلتي عن غرفتك وغرفة ابوي الله يرحمه لهم !!

والحين ما عاد لنا مكاااااااااان!!

حتى المسيار العادي!! ممنوع!!
قالت امي وش السواه اجل!! وجلست تبكي وقالت كلماتها اللي دااايم ترددها(ياليتني مت معك يا بو محمد الحياه بدونك ولا شي.. انا ضعيفه والكل استغل ضعفي مقدر اقول لاحد لآ ابي ارضيك وارضي بنت الناس وش اسوي!!

انا حاولت اجفف دموووعي وقلت خلاص يمه ما يصير لخاطرك الا كل امر طيب وما راح اجيهم ابد عشان ما تمرض الاخت!!

قالت: المهم اني استحلفك بالله وغضبي عليك الى يوم الدين ان قلتي لاخوك أي شي !!

والان اخوي ما يدري وش الطبخه!!

على فكره(اكثر من مره وانا موجوده عندهم تحت لما يجي اخو زوجة اخوي مسير عليها تدخله جوا البيت !! وانا وامي نقعد في غرفتها لين يروووح!!!

ومع ذلك امي تقول لاتقولي لاخوووك خوفا من المشاااكل!!


ااااااااه بس قلبت اوجاااعي

ابي رايكم اخواتي ومين اللي معاه حق؟؟ ووش الحل في نظركم؟؟

ولو افترضنا انها مرضت الان وصادقه بس ما ضيها ما يشفع لها لانها ما تبينا ابد من صار البيت لها

(على فكره : البيت هذا هو الورث الوحيد لنا يعني لي حق فيه انا واختي بس الشكوى على الله -!!

بانتظاااركم واسفه عاالطاله