انفتان الناس زاد عن حده

مرحبا انا صحيح معي جوال واطقطق في السناب والتويتر وافتح واتسلى واذا جونا ظيوف او زرت احد او رحت اقابل احد او جلست مع احد ما اجلس انشغل بلجوال لاني اكون ماليت منه او حتى لو مامليت اقول لاحقه عليه بروح للبيت واطقطق واتسلى اما اني ابنشغل فيه في البيت او برى البيت صراحه ابمل لكن انا اشوف الناس مره مزودينها زي مثلا لما نروح زياره لناس من اقاربنا تدخل البنت او زوجة الولد وتسلم ومن ثم تجلس في طرف المجلس وبس ماترفع عينها من الجوال طول فترة الزياره طيب يا بنت الحلال جاملي ظيوفك شوي لو خمس دقائق حنا مش مطولين وزي مره جتنا بنت خالي وهي دائم تقول لنا انها مشتاقه لنا وتحب الجلسه معنا واول مادخلت اخذتنا في الاحضان وانها مشتاقه وما دريت الا مسكت جوالها وطول الجلسه تبوسم ومارفعت عينها من على الجوال ونصب لها قهوة ونقدم لها حلا ونسولف ونضحك وهي في عالم ثاني انا ما ادري احل ليش جايه المفروض صبرت عن الجوال نص ساعه واذا راحت للبيتها تمسكه لين ما تقول بس خاصه ان فترة زيارتها لنا فقط جلسة المغرب بعدين راحت ولا في الدوام تجلسين مع وحده في فترة البريك وتسولفين معها سوالف حلوه وهي معها الجوال وتبوسهم او مثلا تجلسين تتكلمين مع وحده عن موضوع مهم وضروري وهي ماسكه جوالها ومن ثم اقول فلانه هل انت معي ترفع راسها وتقول هاه ايه ايه ومن ثم تنزل راسه وتكمل قسم بالله اتنرفز يا اختي على الاقل احترميني عطيني وجه بس خمس دقائق وبعدها العبي في جوالك. لين ماتشبعين ولا اذا نادتنا المديره الى اجتماع مهم وتكون المديره تتكلم بموضوع مهم تخيلوا اشوف البعض ماسك جواله ويطقطق ويتبوسم واقول بنفسي يابرد قلوبهم من جد الناس صارو يرفعون الضغط لو ان الي يسوي ها الحركات مراهقين كان ماقلنا شي او مثلا ناس ما تعجبهم الجلسه كان اقول بيتلهون في الجوال ويقضون الوقت انا مدري ليه يسوون كذا هل هم من شدة الحيا ويسوون انفسهم مشغولين بالجوال او وش السالفه