انفجعت في زوجي ..

الله لايوريكم مكروه في قريب او عزيز عليكم
اليوم زوجي كان مسافر صحي الساعه 12 وراح مستعجل المفروض يمشي الصباح الساعه 8 لاكن جاني شيء ردني ماصحيته قلت اخليه يصحى من حاله احسن ..
صار عليه حادث فضييع السياره اتلفت بالكامل والحادث سببه رجال ومعاه اثنين رجال كان ملتهي بشيء الله واعلم يمكن جواله واعترض طريق زوجي وما امداه يهدي السرعه ولا يلف عنه وصدم فيه ..
اثنين منهم جاهم كسور وواحد سلم وزوجي جاه رضوض وكدمات الحمدلله اللي سلمه ..
الساعه 3 العصر زوجي اتصل فيني ويسأل عن اخبارنا ويسولف عادي شوي وقفل قال اكلمك بعدين انتظرته للساعه 5 العصر حسيت ان في شيء مو طبيعي كلمته ورد صوته متغير قال ساعه وانا عندك قلت ليش قال اذا جيت اعلمك قلتله ان شاء الله خير وقفلت ..
جلست ارجف يابنات جاني خوف ونشف الدم بعروقي قلت اكيد احد من اهلي توفى والا صار فيه شيء سبحان الله ماجاء زوجي في بالي لانه كلمني وقال انه بخير .
قمت ما ادري ايش اسوي مره اقول اخوي اللي متزوج وعنده ثلاث بنات وافكر في بناته وزوجته ومره اقول اخوي اللي باقي يدرس في معهد وقلبي مقبوض وارسل لاخواتي مايردون وانا مفجوووعه قمت ادورلي شغله اسويها لاني خلاص ماعد قدرت استحمل احساس الفاجعه صعب جدااا انفجعت مرتين مره بوفاة جدتي الله يرحمها جت عمتي ام زوجي صحتني من النوم قالت جدتك توفت البسي عشان تودعينها ....."
المره الثانيه فجعتي في ابوي الله يرحمه ويغفرله جاء زوجي قال خالي توفى يقصد ابوي قالها بدون مقدمات كانت فاجعه مارح انساها طول عمري ..
عشان كذا ماعد استحمل الاخبار المحزنه ويدي على قلبي لا يجيني خبر عن احد من اهلي ..
لاكن الحمدلله على كل حال قدر الله ومشاء فعل .
الغريب في الامر يابنات البارح زوجي مشانا في منتزه لي شهوووور اطلبه وعشانا فيه وطلبته شيء من البقاله وجاب ضعف طلباتي على غير عادته ويسولف معاي ويضحك بالعاده على جواله مايرفع عينه .سبحان الله قلت في نفسي لايكون زوجي يحس نفسه بيصير عليه شيء لاسمح الله لاكن طنشت وانبسطنا والغريب انه طلعنا للساعه 11 الليل وكانت مفاجأه لي لاني كنت في بيت اهلي زياره رجعت بعدها البيت لقيته رتب البيت كامل وكل شيء من احسن مايكون على غير عاده ...
الحمدلله الف مره انها جت على كذا ولا صابه شيء لاسمح الله .
اتمنى ان كل زوجه وكل اخت وكل بنت تنصح زوجها او اخوها او ابوها انهم مايلتهون بالجوالات وهم يسوقون في الخطوط عواقبها وخيمه ...
زوجي يدعي للرجال اللي الغلط منه ان ربي يشفيه ومايكون متأذي كثير وانا ادعي عليه كذا غصب عني الله يسامحني اذا كنت ظالمته اوضاعنا الماديه مترديه والحين ماعندنا سياره الله يفرجها بس .
زوجي حتى في دوامه ماسمحوله يجلس يومين يرتاح فيها هو عسكري مرابط على الحد وبكره الصباح بيسافر عشان ذا الحرب ان شاء الله تنتهي على خير .........