انفصال امي والضحيه انا واخواني واحرااق امي لنا

السلام عليكم ورحمة الله وبركاته

بنات بستشيركم كيف اتعامل مع امي لاني تعبت ولا عرفت الطريقه اللي الي اتعامل معها واقدر اكسبها
وهذي قصة حياتنا كلها عشان يتوضح لكم من خلال المواقف شخصيتها

في بدايه زواج امي مع ابوي سكنوا في بيت جدتي وحصلت مشاكل على اساس انها ماتبي اهل ابوي ومتضايقه منهم وبعد امي ماجبتني انا واخوي اللي اكبر مني بسنه تطلقت وكانت حامل باخوي الثالث طبعا يوم طلقها ابوي هي مابغت تربينا ولا اخذتنا معها يعني موب ابوي اللي اخذنا منها جت جدتي هي اللي ربتنا انا واخوي وكان عمري وقتها سنه واخوي سنتين وكنا بهالفتره يجون ياخذونا خوالي ونشوفها يومين ونجي ولما اخوي الثالث صار عمره سنتين خلته يروح معنا لجدتي عشان يتربى معنا وبالفتره ابوي تقريبا قعد 6 سنوات ماتزوج متأثر وشايل هم المسؤليه جدتي ماقصرت معنا هي اللي قامت فينا انا واخواني بس ولو وقعد يحاول في امي واهلها بهالفتره ترجع وطبعا رفضت

وبعد 6 سنوات جت وحده من عماتي يوم شافت وضع ابوي كذا فكرت تخطب له وتزوج وبعد تقريبا سنتين من زواجه وجاه ولد وبنت من زوجته الثانيه مادري وش الملابسات السالفه ورجع ابوي امي وطبعا كان قد بنى شقتين حنى بشقه ومرته بشقه وكان عمري تقريبا 8 سنوات واخوي اللي اكبر مني 9 سنوات

قعدت تقريبا معنا 7 سنوات واستمرت المشاكل بينها هي وابوي ولا ارتاحت ان ابوي ماكان يعدل بينها وبين زوجته وكان يفضل زوجته عليها وبهالفتره جابت اخوي الرابع وبعدين زادت المشاكل وتطلقت وانا كنت بالمتوسط طبعا يوم طلعت خلت اخوي الصغير وكان عمره 5 سنوات ونفس الشي صار له راح تربى عند جدتي سنتين ويوم كبر شوي جاء لبيتنا انا واخواني وانا اللي ربيته ودرسته والشكوى لله
واللحين امي منففصله عن ابوي لها تقريبا 10 سنوات ابوي جاب لنا شغاله وقعدنا انا واخواني ودرسنا والحمدلله

وبهالفتره اخوي الكبير قاطعها وماشافها له اللحين 4 سنوات وبقلبه انها جدعتنا وتخلت عننا يوم اننا بحاجتها واذا كلمته اقول معليش عندها ظروف ومافاد كلامي حاقد عليها وبقلبه ومانسى ونحف حوالي 30 كيلو يعني باين ان نفسيته مرره متاثر

وامي تقريبا العام تزوجت وطبعا ماعلمتني لا انا ولا اخواني يوم مره دقيت عليها اسالها عن اخوي اللي اصغر مني فقدته ماجاء قلت يمكن انه عندها قالت ماادري عنه وانا موب بالبيت قلت وينك قالت انا تزوجت مادريتي قلت لا وش يدريني قالت كنت احسبك دريتي من الناس طبعا انصدمت وقلت لها مبروك والله يوفقك وسكرت

ويوم جاء اخوي من عند بيت خالي اللي كانت ساكنه عنده منصدم وان دخل غرفتها لقى اغراضها مشيوله وكذا يعني مهما كان شي مؤثر قلت له ميخالف وهي بعد ضعيفه لازم تشوف حياتها

ومصلحتها دارين بس موب بهالطريقه عيالها المفروض تعطينا خبر
وربي كتب بعد فتره تقريبا من زواجها توفى زوجها الله يغفرله ويرحمه
واصلا قبل وفاته ماكانت مرتاحه معه وقال ابي اتطلق وتقولي انه طلع مثل ابوك لا يسافر بي ولا شي قلت معليش يمه اصبري خلي الحياة تمشي قالت لي ماعليك لا عندي منه عيال ولاشي

انا سكت مابيدي حيله وتوفى قبل مايطلقها وبعدين يوم رحت ازورها انا واخواني وهي بالحداد وكانت فيه خالتي قعدت تناظرني وتقول كان اللي صابني عين وتمدح فيه وكذا وانهم كانوا ناوين يزينون لها عزيمه ومات الله يغفرله قبل
قلت انا المفروض يمه انك علمتينا بزواجك ماكان يصلح انك تتزوجين وماتعلمينا قالت خالتي انا اللي قلت لها لاتقولين لعيالك وراحت السالفه
ويوم اخوي الكبير درى اللي مقاطعها انقهر منها زياده وقال امي خربت اخر حبل بيني وبينها وطبعا امي اذا اخذت رقمه تدق عليه يسمع صوتها يسكر مايبي يكلمها ولا شي

المشكله احس انها متفرعه لجوانب كثير يعني مشكله امي مع اخوي اللي مقاطعها ومشكلتها معي انا تكرهني وتحاول انها تحطمني بكل الوسائل لانها تحس اني احب ابوي واني بصف ابوي وهي طبعا حاقد على ابوي ليه مادري وباين كل هاللي صار بحياتنا كله عناد لابوي عشان يتربى وطبعا منقهره بالبدايه من جدتي اللي ربتنا ولا تاثرنا بعدم وجودها وان حياتنا مشت بعدين انقهرت مني ان البيت مشى وودرسنا الحمدلله وكبرنا وتحس اني ماخذه مكانها بالبيت تقولي انتي قعدتي بغرفتي طيب البيت شقه ومافيه مكان انام فيه الا غرفتها وتقولي عيالي انفعوك اكثر مني وانها هي ماتلقى من يوديها وتقولي انتي اللي مكرهه عيالي فيني وبتفرقين بيني وبين عيالي ودعي علي وتتحسب

والله العظيم ان مابيدي حيله اني ماقصر معها ماتطلب مني شي الا اعطيها مكافتي اذا طلبتها مابخلت عليها بس سبحان لله مادري وش فيها
دايم تقولي تخصصك بالجامعه موب زين منتب متوظفه قلت ربي بيرزقني وربي عنده خير
تتطنز بشكلي وتحطمني
وتقولي انانيه وماهمني الا نفسي وشايفه نفسي

ويعلم الله اني ماقصرت مع اخواني ادرسهم واقومهم واذا مرضوا انا اللي بجنبهم بعد هم مساكين مالهم الا الله ثم انا واذا تاخروا ادورهم واول ماتطلقت امي ماكان بالبيت شغاله انا اللي انظف واغسل واطبخ وكنت بالمتوسط وادرس

وكم مره صارت مشاكل مع مرت ابوي عشان اخواني وعيالها وتهاوش واني مارد واسكت واتحمل وابي الحياة تمشي
يعني صبرت بس ماتحس بتعبي بس ودها تنقم مني انا وابووي اخواني اهون شوي مني ماتسوي لهم كذا
وكم مره فكرت اكلم مشايخ ومستاشرين واسريين بس ماحصلت اي فايده
وكلمت وحده من خالتي اللي قريبه منها وكلهم مايهم وموقفين معها ويحسون تصرفها هو الصح وكلمت بنت خالتي الثانيه بعد وقالت امك ترى مريضه وتاكل حبوب نفسيه بس الله يشفيها ويعافيها

بس انا صدق تعبت ولا ادري كيف ابر بها وترضى عني تعبت من كثر ماتضغط علي
جاني الوسواس بطهاره والصلاه نفسيتي والحمدلله

شيروا علي الله يجزاكم الجنه